ກະຊວງແຜນການ ແລະ ການລົງທຶນ ແຫ່ງ ສສ ຫວຽດນາມ ໄດ້ມອບເຄື່ອງຊ່ວຍເຫຼືອມູນຄ່າ 10,000 ໂດລາສະຫະລັດ ເພື່ອນຳໃຊ້ເຂົ້າໃນການສະກັດກັ້ນພະຍາດ ໂຄວິດ-19 ຢູ່ ສປປ ລາວ.
ພິທີມອບ-ຮັບເຄື່ອງຊ່ວຍເຫຼືອດັ່ງກ່າວຈັດຂື້ນໃນວັນທີ 15 ເມສາ 2020 ຢູ່ທີ່ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ເຊີ່ງມອບໂດຍ ທ່ານ ຫງວຽນຈີ່ຢູ້ງ ລັດຖະມົນຕີກະຊວງແຜນການ ແລະ ການລົງທຶນ ແຫ່ງ ສສ ຫວຽດນາມ, ປະທານຄະນະກຳມາທິການຮ່ວມມືຫວຽດນາມ-ລາວ ແລະ ຮັບໂດຍ ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ເພື່ອສົ່ງຕໍ່ໃຫ້ກະຊວງແຜນການ ແລະ ການລົງທຶນ ແຫ່ງ ສປປ ລາວ ແລະ ຄະນະກຳມາທິການຮ່ວມມືລາວ-ຫວຽດນາມ.
ໃນໂອກາດນີ້ ທ່ານ ຫງວຽນຈີ່ຢູ້ງ ໄດ້ອວຍພອນຜູ້ນຳພັກ-ລັດ ແລະ ປະຊາຊົນລາວ ເນື່ອງໃນໂອກາດປີໃໝ່ລາວ ພສ 2563 ຈົ່ງມີແຕ່ຄວາມຜາສຸກ ພ້ອມກັນຜ່ານຜ່າຄວາມຍຸ້ງຍາກຈາກພະຍາດໂຄວິດ-19 ແລະ ກັບຄືນສູ່ສະພາບປົກກະຕິໂດຍໄວ.
ຂ່າວ: ວຽງຈັນທາຍ
ພາບ: ໂອລຳ ຈັນທະວິໄລ
