Visit BigblueAgency
ກອງທັບປະຊາຊົນລາວ ຮ່ວມມືກັບກໍາລັງປະກອບອາວຸດ ແຫ່ງ ສ.ຣັດເຊຍ ເກັບກູ້ລະເບີດບໍ່ທັນແຕກ 1.​000 ກວ່າໜ່ວຍ ຢູ່ແຂວງ ຊຽງແຂວງ  

ກອງທັບປະຊາຊົນລາວ ຮ່ວມມືກັບກໍາລັງປະກອບອາວຸດ ແຫ່ງ ສ.ຣັດເຊຍ ເກັບກູ້ລະເບີດບໍ່ທັນແຕກ 1.​000 ກວ່າໜ່ວຍ ຢູ່ແຂວງ ຊຽງແຂວງ  

ກອງທັບປະຊາຊົນລາວ ແລະ ກໍາລັງປະກອບອາວຸດ ແຫ່ງ ສ.ຣັດເຊຍ ໄດ້ສໍາເລັດການຮ່ວມມືກວດກູ້ທໍາລາຍລະເບີດບໍ່ທັນແຕກ ທີ່ສະໜາມບິນທົ່ງໄຫຫີນ ແຂວງຊຽງຂວາງ ຊຶ່ງສາມາດກວດພົບລະເບີດບໍ່ທັນແຕກໄດ້ 1.003 ໜ່ວຍ ໃນພື້ນທີ່ 3,47 ເຮັກຕາ.

ພິທີສະຫຼຸບຜົນສໍາເລັດການຮ່ວມມືກວດກູ້ທໍາລາຍລະເບີດບໍ່ທັນແຕກ ລະຫວ່າງກອງທັບປະຊາຊົນລາວ ກັບ ກໍາລັງປະກອບອາວຸດ ແຫ່ງ ສ.ຣັດເຊຍ ໄດ້ຈັດຂຶ້ນເມື່ອບໍ່ດົນມານີ້ ທີ່ ແຂວງຊຽງຂວາງ ໂດຍການເຂົ້າຮ່ວມຂອງສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ແລະ ສະຫາຍ ວາລາດີເມຍ ກາລີນິນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສ. ຣັດເຊຍ ປະຈໍາ ສປປ ລາວ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ທ່ານ ພັນເອກ ປາດຖະໜາ ບຸດຕິຈັກ ຮອງຫົວໜ້າຫ້ອງການ ກົມໃຫຍ່ເສນາທິການກອງທັບ ຕາງໜ້າຄະນະຮັບຜິດຊອບວຽກງານການຮ່ວມມືໄດ້ລາຍງານຜົນສໍາເລັດວຽກງານຮອບດ້ານໃນການຮ່ວມມືກັບກໍາລັງປະກອບອາວຸດ ແຫ່ງ ສ.ຣັດເຊຍ ວ່າ: ຜ່ານການຮ່ວມມືປະຕິບັດງານພາກສະໜາມກວດກູ້ ແລະ ທໍາລາຍລະເບີດບໍ່ທັນແຕກ ໄດ້ເລີ່ມແຕ່ວັນທີ 05 ທັນວາ 2020-25 ມີນາ 2021 ໃນບໍລິເວນເນື້ອທີ່ໄດ້ຮັບການຢັ້ງຢືນເປັນພື້ນທີ່ສໍາເລັດການກວດກູ້ລະເບີດບໍ່ທັນແຕກ 3,47 ເຮັກຕາ ແລະ ກວດພົບລະເບີດບໍ່ທັນແຕກໄດ້ 1.003 ໜ່ວຍ, ສະເກັດລະເບີດ 420.850 ຊິ້ນສ່ວນ ແລະ ເສດໂລຫະຕ່າງໆ 535.700 ຊິ້ນສ່ວນ.

ພ້ອມກັນນັ້ນ ວຽກງານການທໍາລາຍລະເບີດບໍ່ທັນແຕກ ຍັງໄດ້ຮ່ວມມືແລກປ່ຽນປະສົບການ ແລະ ບົດຮຽນໃນການທໍາລາຍລະເບີດບໍ່ທັນແຕກທີ່ກວດພົບ ໃນນັ້ນ ຈໍານວນທີ່ບໍ່ສາມາດເຄື່ອນຍ້າຍໄປທໍາລາຍບ່ອນອື່ນໄດ້ ເປັນຕົ້ນແມ່ນບົມບີ ແລະ ລະເບີດບາງຊະນິດໄດ້ວາງແຜນ ແລະ ທໍາລາຍກັບທີ່ ຈໍານວນ 421 ໜ່ວຍ ແລະ ເຄື່ອນຍ້າຍລະເບີດບໍ່ທັນແຕກ ຊະນິດທີ່ມີຄວາມສ່ຽງຕໍ່າໄປທໍາລາຍຈໍານວນ 582 ໜ່ວຍ.

ຂ່າວ: ວຽງຈັນທາຍ

Related Articles

Leave a Reply