Vientiane Times Lao
ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ຈະໄດ້ພິຈາລະນາ ແລະ ຮັບຮອງເອົາຫລາຍ ບັນຫາທີ່ສຳຄັນຂອງຊາດ

ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ຈະໄດ້ພິຈາລະນາ ແລະ ຮັບຮອງເອົາຫລາຍ ບັນຫາທີ່ສຳຄັນຂອງຊາດ

ກອງປະຊຸມສະໄໜສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໄດ້ໄຂຂຶ້ນໃນຕອນເຊົ້າຂອງມື້ນີ້ ວັນທີ 7 ເດືອນພະຈິກ ແລະ ຈະດຳເນີນໄປຮອດ ວັນທີ 6 ທັນວາ 2019 ຈະໄດ້ສຸມໃສ່ພິຈາລະນາ ແລະ ຮັບຮອງເອົາຫລາຍບັນຫາທີ່ສຳຄັນຂອງຊາດ.

ທ່ານ ປະທານປະເທດ ບຸນຍັງ ວໍລະຈິດ, ທ່ານ ນາຍົກລັດຖະມົນຕີ ທອງລຸນ ສີສຸລິດ ແລະ ທ່ານ ນາງ ປານີ ຢາທໍ່ຕູ້, ບັນດາທ່ານ ລັດຖະມົນຕີ, ບັນດາທ່ານ ສະມາຊິກ ແລະ ແຂກຖືກເຊີນ ໄດ້ເຂົ້າຮ່ວມພິທີເປີດກອງປະຊຸມຢ່າງພ້ອມພຽງໃນມື້ເຊົ້ານີ້.

ທ່ານ ນາງ ປານີ ໄດ້ກ່າວເປີດກອງປະຊຸມຄັ້ງນີ້ໂດຍມີເນື້ອໃນບາງຕອນສຳຄັນວ່າ ຕະຫຼອດໄລຍະເກືອບ10ເດືອນກວ່າທີ່ຜ່ານມາສະພາບການຂອງໂລກ ແລະ ພາກພື້ນຍັງສືບຕໍ່ປະເຊີນກັບສິ່ງທ້າທາຍຫຼາຍດ້ານ ເປັນຕົ້ນແມ່ນການເຕີບໂຕທາງດ້ານເສດຖະກິດໂລກມີທ່າອ່ຽງທົດຖອຍ ລວມທັງໄພທຳມະຊາດ, ສົງຄາມການຄ້າ ແລະ ເຫດການອື່ນໆເຊິ່ງໄດ້ເຮັດໃຫ້ລາຄານ້ຳມັນ, ລາຄາຄຳ ແລະ ລາຄາສະກຸນເງິນຕາມີການເໜັງຕິງພໍສົມຄວນ.

ພາຍໃນປະເທດຂອງພວກເຮົາກໍ່ຍັງປະເຊີນກັບຄວາມຫຍຸ້ງຍາກຫຼາຍປະການ ເສດຖະກິດມະຫາພາກມີຄວາມບອບບາງ .ນອກນັ້ນຍັງໄດ້ຮັບຜົນກະທົບຈາກພະຍາດລະບາດອະຫິວາໝູ ,ຕັກແຕນກິນສາລີ, ພະຍາດໄຂ້ຍຸງລາຍ ແລະ ສະພາບນ້ຳຖ້ວມຢູ່ 13 ແຂວງ ແຕ່ຮ້າຍແຮງກວ່າໝູ່ ແມ່ນຢູ່ 6 ແຂວງພາກກາງ ແລະ ພາກໃຕ້ ເຊິ່ງສະພາບການດັ່ງກ່າວໄດ້ສົ່ງຜົນກະທົບບໍ່ໜ້ອຍຕໍ່ເສດຖະກິດ ແລະ ການເງິນຂອງປະເທດ ການເກັບລາຍຮັບບໍ່ໄດ້ຕາມແຜນ ເງິນກີບອ່ອນຄ່າ ລາຄາສິນຄ້າຫຼາຍປະເພດເໜັງຕິງ ຊີວິດການເປັນຢູ່ຂອງພະນັກງານ, ທະຫານ ,ຕຳຫຼວດກໍ່ຄືປະຊາຊົນບັນດາເຜົ່າພົບກັບຄວາມຫຍຸ້ງຍາກ.

ທ່ານ ນາງ ປານີ ໄດ້ກ່າວຕື່ມວ່າ ກອງປະຊຸມຄັ້ງນີ້ ມີຄວາມໝາຍສຳຄັນ ແລະ ເປັນກອງປະຊຸມທ້າຍປີ ສະນັ້ນຈະໄດ້ພິຈາລະນາ ຕົກລົງຫຼາຍບັນຫາທີ່ສຳຄັນພື້ນຖານຂອງປະເທດຊາດເປັນຫຼັກເຊັ່ນ : ພິຈາລະນາ ຮັບຮອງເອົາການສະເໜີແຕ່ງຕັ້ງບຸກຄະລາກອນລັດຖະບານຕາມການສະເໜີຂອງທ່ານນາຍົກລັດຖະມົນຕີ, ຮັບຟັງ ແລະ ພິຈາລະນາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານພົ້ນເດັ່ນ ປະຈຳປີ 2019 ແລະທິດທາງແຜນວຽກຈຸດສຸມປະຈຳປີ 2020 ຂອງລັດຖະບານ; ບົດລາຍງານ ຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ; ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດມະຫາພາກ ແລະ ຜົນກະທົບຈາກອຸທົກກະໄພ, ແຜນງົບປະມານແຫ່ງລັດ, ແຜນເງິນຕາ ປະຈຳປີ 2019 ແລະ ທິດທາງແຜນການ ປະຈຳປີ 2020.ແລະ ຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະ ທິດທາງແຜນການປະຈຳປີ 2020 ຂອງອົງການກວດສອບແຫ່ງລັດ, ຮັບຟັງການປະກອບຄຳເຫັນຂອງຄະນະປະຈຳສະພາແຫ່ງຊາດຕໍ່ບົດລາຍງານຂອງລັດຖະບານ ອົງການກວດສອບແຫ່ງລັດ ແລະ ອົງການກວດກາລັດຖະບານ, ພິຈາລະນາ ຮັບຮອງເອົາບົດລາຍງານຜົນການຕິດຕາມກວດກາຂອງຄະນະປະຈຳສະພາແຫ່ງຊາດກ່ຽວກັບການຈັດຕັ້ງປະຕິບັດກົດໝາຍ ແລະ ນິຕິກຳກົດໝາຍທີ່ຕິດພັນກັບການເກັບລາຍຮັບ, ພິຈາລະນາ ຮັບຮອງເອົາບົດລາຍງານຂອງອົງການໄອຍະການປະຊາຊົນສູງສູດ ກ່ຽວກັບການເຄື່ອນໄຫວແຜນງານປະຈຳປີ 2019 ແລະ ທິດທາງແຜນການປີ 2020, ພິຈາລະນາ ຮັບຮອງເອົາບົດລາຍງານກ່ຽວກັບການເຄື່ອນໄຫວວຽກງານຂອງສະພາແຫ່ງຊາດປະຈຳປີ2019 ແລະ ທິດທາງແຜນການປີ 2020, ພິຈາລະນາ ຮັບຮອງເອົາການຈັດຕັ້ງ ການປະເມີນຜົນການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ,  ພິຈາລະນາ ຮັບຮອງເອົາການສ້າງ ແລະ ປັບປຸງກົດໝາຍຈຳນວນ 8 ສະບັບປະກອບມີຂົງເຂດເສດຖະກິດ 4 ສະບັບ ແລະ ໃນຂົງເຂດວັດທະນະທຳ-ສັງຄົມ 4 ສະບັບ. ນອກຈາກເນື້ອໃນສຳຄັນທີ່ກ່າວມານັ້ນກອງປະຊຸມຍັງຈະໄດ້ຮັບຟັງການຊີ້ແຈງການອະທິບາຍຈາກ 5 ກະຊວງກ່ຽວຂ້ອງກ່ຽວກັບນະໂຍບາຍ ວິທີການມາດຕະການເພື່ອຊຸກຍູ້ການຜະລິດສະບຽງອາຫານ ການສົ່ງເສີມການຜະລິດພາຍໃນ ເພື່ອທົດແທນການນຳເຂົ້າສິນຄ້າ ແລະ ເພື່ອການສົ່ງອອກ, ການຄຸ້ມຄອງລາຄາສິນຄ້າ ແລະ ຄຸ້ມຄອງອັດຕາເງິນເຟີ້ ແລະ ອັດຕາແລກປ່ຽນ ການປະຕິບັດນະໂຍບາຍປະຢັດ ການຄຸ້ມຄອງການເຂົ້າ-ອອກເມືອງ ແລະ ຮັບຟັງການປະກອບຄຳເຫັນຂອງສູນກາງແນວລາວສ້າງຊາດ ແລະ ອື່ນໆ.

ຂ່າວ: ສົມພາວັນ

ພາບ: ຄຳພັນ

Related Articles

Leave a Reply