ທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານເມື່ອບໍ່ດົນມານີ້ ກ່ຽວກັບການຊ່ວຍເຫຼືອ ຫຼື ການຊອກຫາວິທີຫຼຸດຜ່ອນຜົນກະທົບທີ່ບັນດາຫົວໜ່ວຍທຸລະກິດໄດ້ຮັບຈາກພະຍາດໂຄວິດ-19 ວ່າ: ສໍາລັບນະໂຍບາຍດ້ານການເງິນຕໍ່ກັບຜູ້ລົງທຶນ, ຫົວໜ່ວຍທຸລະກິດໃດທີ່ໄດ້ຮັບຜົນກະທົບຈາກ ການແຜ່ລະບາດຂອງພະຍາດ ໂຄວິດ-19 ຊຶ່ງເຮັດໃຫ້ບໍລິສັດມີການຂາດທຶນ. ຜູ້ດໍາເນີນທຸລະກິດທີ່ເສຍ ອາກອນກໍາໄລຕາມລະບົບການຖືບັນຊີທີ່ມີການຂາດທຶນໃນປີ, ໂດຍມີການຢັ້ງຢືນຈາກອົງການກວດ ສອບ ບັນຊີ ຫຼື ບໍລິສັດກວດສອບບັນຊີເອກະລາດ ແລະ ມີການຮັບຮູ້ຈາກຂະແໜງການສ່ວຍສາອາກອນ ແມ່ນມີສິດຍົກເງິນຂາດທຶນດັ່ງກ່າວ ໄປຫັກອອກຈາກກໍາໄລຂອງປີຖັດໄປພາຍໃນເວລາຫ້າປີຕິດຕໍ່ກັນ. ສ່ວນທຸລະກິດກ່ຽວກັບການປູກຝັງ, ລ້ຽງສັດ ທີ່ຂາດທຶນຍ້ອນເກີດພະຍາດລະບາດ ຫຼື ໄພພິບັດຈາກ ທໍາມະຊາດມີສິດຍົກເງິນຂາດທຶນດັ່ງກ່າວ ໄປຫັກອອກຈາກກໍາໄລຂອງປີຖັດໄປ ບໍ່ເກີນ 10 ປີ. ເມື່ອໝົດ ກໍານົດແລ້ວເງິນຂາດທຶນທີ່ຍັງຫັກບໍ່ໝົດນັ້ນ ຈະບໍ່ອະນຸຍາດໃຫ້ຫັກຕໍ່ໄປອີກ ຍົກເວັ້ນກິດຈະການທີ່ມີລາຍ ຮັບ ຫຼື ກໍາໄລ ຫຼັງຈາກການລົງທຶນເກີນກວ່າຫ້າປີ.
