ໂຄງການພັດທະນາຊົນລະກະເສດ ແລະ ພັດທະນາຊົນນະບົດຮອບດ້ານແຂວງສະຫວັນນະເຂດ ຈະສໍາເລັດການກໍ່ສ້າງໃນປີ 2023 ທີ່ຈະມາເຖິງນີ້ພາຍຫຼັງທີ່ເລີ່ມລົງມືກໍ່ສ້າງມາແຕ່ປີ 2015 ທີ່ຜ່ານມາ ໂດຍໄດ້ມີພິທີວາງສີລາລຶກການກໍ່ສ້າງຢ່າງເປັນທາງການເມື່ອບໍ່ດົນມານີ້ ທີ່ບ້ານ ແບ່ງຄໍາໄຫຼ ເມືອງສອງຄອນ ໂດຍການເຂົ້າຮ່ວມຂອງທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດ ແລະ ທ່ານ ມຸ ຮົງ ອິມ ເອກອັກຄະລັດຖະທູດ ສ.ເກົາຫຼີ ປະຈໍາລາວ.
ໂຄງການດັ່ງກ່າວມີມູນຄ່າການກໍ່ສ້າງຫຼາຍກວ່າ 53 ລ້ານໂດລາສະຫະລັດ, ໃນນີ້ 46 ລ້ານໂດລາແມ່ນກູ້ຢືມດ້ວຍດອກເບັ້ຍຕໍ່າ ຈາກທະນາຄານ ຂາເຂົ້າ-ຂາອອກ ສ.ເກົາຫຼີ ແລະ 7 ລ້ານກວ່າໂດລາແມ່ນເປັນທຶນການປະກອບສ່ວນຂອງລັດຖະບານລາວ ໂດຍຈັດຕັ້ງປະຕິບັດຢູ່ 2 ເມືອງ ຄື: ເມືອງສອງຄອນ ແລະ ເມືອງຈໍາພອນ ແຂວງສະຫວັນນະເຂດ ຊຶ່ງຈະມີປະຊາຊົນໄດ້ຮັບຜົນປະໂຫຍດລວມມິ 13 ບ້ານ (2.855 ຄອບຄົວ ແລະ ພົນລະເມືອງ 16.761 ຄົນ).
ທ່ານ ບຸນຄໍາ ສີດາວົງ ຫົວໜ້າກົມຊົນລະປະທານ ກະຊວງກະສິກໍາ ແລະ ປ່າໄມ້ໄດ້ກ່າວໃນພິທີກ່ຽວກັບໂຄງການດັ່ງກ່າວວ່າ: ໜ້າວຽກຂອງໂຄງການນີ້ ປະກອບມີການກໍ່ສ້າງພື້ນຖານຊົນລະກະເສດ ໃນນີ້ໄດ້ຟຶ້ນຟູອ່າງ ເກັບນໍ້າສຸຍ ເມືອງຈໍາພອນ, ກໍ່ສ້າງລະບົບຫົວງານຈັກສູບນໍ້າ, ກໍ່ສ້າງລະບົບສົ່ງນໍ້າ ພ້ອມ ດ້ວຍອາຄານ, ຄອງເໝືອງ ແລະ ລະບົບຄອງລະບາຍ ເພື່ອຮັບປະກັນ ການສະໜອງນໍ້າໃຫ້ແກ່ການ ຜະລິດໄດ້ທັງສອງລະດູໃນ ເນື້ອທີ່ 2.900 ເຮັກຕາ, ໃນນີ້ ເມືອງຈໍາພອນຈໍານວນ 1.700 ເຮັກຕາ ແລະ ເມືອງສອງຄອນ 1.200 ເຮັກຕາ.
ທ່ານ ບຸນຄໍາ ໄດ້ກ່າວຕື່ມວ່າ: ນອກນັ້ນຍັງມີການກໍ່ສ້າງເສັ້ນທາງຂົນສົ່ງສິນຄ້າກະສິກໍາລຽບ ຕາມຄອງ ເໝືອງຢູ່ພາຍໃນຂອບເຂດໂຄງການຍ່ອຍທີ່ມີຄວາມຍາວ 44 ກິໂລແມັດ, ບຸກເບີກ ແລະ ປັບພື້ນ ທີ່ນາເປັນນາໄຮ່ໃຫຍ່ຢູ່ເມືອງ ສອງຄອນ ຈໍານວນ 50 ເຮັກຕາ ແລະ ເມືອງຈໍາພອນ 50 ເຮັກຕາ. ສະເພາະ ວຽກງານພັດທະນາ ຊົນນະບົດ ແມ່ນຈະໄດ້ປັບປຸງ ເສັ້ນທາງທີ່ມີແລ້ວພາຍໃນ ຂອບເຂດ ໂຄງການຍ່ອຍ ເມືອງ ຈໍາພອນມີ 3,5 ກິໂລແມັດ, ສ້າງສູນພັດທະນາເຕັກນິກກະສິກໍາຊຸມຊົນ ຢູ່ເມືອງລະ 1 ແຫ່ງ, ສ້າງໂຮງສີເຂົ້າທັນສະໄໝ ແລະ ສາງ ເກັບມ້ຽນເຂົ້າທີ່ອົບແຫ້ງຢູ່ ເມືອງສອງຄອນ ແລະ ຊື້ກົນຈັກ ກະສິກໍາ ຈໍານວນ 4 ຊຸດ ແລະ ກໍ່ສ້າງສາງເກັບມ້ຽນຈໍານວນ 2 ແຫ່ງ.
ຂ່າວ-ພາບ: ສພຂ
