Vientiane Times Lao
ການເຕີບໂຕເສດຖະກິດຂອງລາວປີນີ້ບໍ່ບັນລຸເປົ້າໝາຍ

ການເຕີບໂຕເສດຖະກິດຂອງລາວປີນີ້ບໍ່ບັນລຸເປົ້າໝາຍ

ການແກ້ໄຂຂໍ້ຫຍຸ້ງຍາກທາງດ້ານເສດຖະກິດ 2019 ໄດ້ຮັບຜົນກະທົບຈາກໄພ ທຳມະຊາດ ເຊັ່ນ : ນ້ຳຖ້ວມ ແລະ ໄພແຫ້ງແລ້ງ ອັນໄດ້ສົ່ງຜົນຕໍ່ການປູກພຶດ ລວມທັງການປະມົງ, ການລ້ຽງສັດ ແລະ ປະລິມານນ້ຳເພື່ອສະໜອງການຜະ ລິດນ້ຳປະປາບໍ່ພຽງພໍ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ລາຍງານຕໍ່ສະ ມາຊິກສະພາ ໃນກອງປະຊຸມສະໃໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ທີ່ໄດ້ເປີດຢ່າງເປັນທາງການມື້ເຊົ້າຂອງ ວັນທີ 7 ພະຈິກ 2019 ນີ້ວ່າ : ນອກນັ້ນຍັງມີການລະບາດຂອງພະຍາດອະຫິວາໝູອາຟຣິກກາ, ການລະບາດຂອງ ບົ້ງສາລີ ແລະ ຕັກແຕນ, ລັດຖະບານໄດ້ຫັນງົບປະມານປົກກະຕິໄປສູ່ການແກ້ໄຂ ໄພພິບັດ ແລະ ເລັ່ງປັບປຸງ ໂຄງລ່າງພື້ນຖານທີ່ຖືກເສຍຫາຍ. ທ່ານ ທອງລຸນ ໄດ້ ກ່າວ ຕື່ມວ່າ : ຜ່ານການປະຕິບັດວຽກງານຕົວຈິງຂອງລັດຖະບານໃນໄລຍະ 9 ເດືອນທີ່ຜ່ານລັດຖະບານໄດ້ສຸມທຸກຄວາມພະຍາຍາມໃນການແກ້ໄຂບັນຫາຕ່າງໆຢູ່ພາຍໃນ ແລະ ມີວຽກງານທີ່ພົ້ນເດັ່ນຫຼາຍວຽກງານ ເປັນຕົ້ນຍັງຮັກສາໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມເຖິງແມ່ນວ່າຈະມີບາງເຫດການເກີດຂື້ນຢູ່ພາຍໃນ ແລະ ບໍລິເວນຊາຍແດນບາງຈຸດກໍ່ຕາມ ແຕ່ລັດຖະບານກໍ່ໄດ້ແກ້ໄຂຢ່າງຮຽບຮ້ອຍ, ລັດຖະບານໄດ້ສືບຕໍ່ການຄຸ້ມຄອງບໍລິຫານລັດຢ່າງຮັດກຸມ, ປະຕິບັດກົດໝາຍຢ່າງເຄັ່ງຄັດ, ຈຳກັດການຄ້າ-ຂາຍເຖື່ອນ,ປາບປາມຢາເສບຕິດ, ຕົວເລກເຕີບໂຕເສດຖະກິດ ບັນລຸໄດ້ 6,4% (ຄາດຄະເນໝົດປີ) ເຊິ່ງຫຼຸດຄາດໝາຍທີ່ທາງສະພາຮັບຮອງ ແຕ່ກໍ່ເປັນຕົວເລກການເຕີບໂຕໃນລະດັບດີຕໍ່ເນື່່ອງ, ໄດ້ແກ້ໄຂບັນຫາໜີ້ສິນໂຄງການລົງທືນຂອງລັດຢ່າງຕໍ່ເນື່ອງ, ໄດ້ສຳເລັດການສ້າງດຳລັດວ່າດ້ວຍກອງທືນ ສຳລັບເສດຖະກິດຂະໜາດນ້ອຍ ແລະ ກາງ, ໄດ້ແກ້ໄຂບັນຫາການຜະລິດໄຟຟ້າທີ່ບໍ່ມີຕະຫຼາດຮອງຮັບ, ດຳເນີນ ແລະ ສຳເລັດການກວດກາໂຄງການເຊົ່າ ແລະ ສຳປະທານດິນລັດ, ໄດ້ສືບຕໍ່ຈັດຕັ້ງປະຕິບັດຄຳສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້, ໄດ້ສຳເລັດການປັບປຸງ ແລະ ສ້າງກົດໝາຍໃໝ່ 9 ສະບັບ ນອກນັ້ນຍັງໄດ້ສຸມທືນຈຳນວນ 600 ຕື້ກີບ ເພື່ອແກ້ໄຂສຸກເສີນ ແລະ ຟື້ນຟູໄພພິບັດ.
ສະເພາະທິດທາງແຜນການປີ 2020 ທ່ານໄດ້ກ່າວວ່າ ລັດຖະບານຈະສຸມ ທຸກກຳລັງແຮງສ້າງໃຫ້ມີສະຖຽນລະພາບທາງດ້ານການເມືອງ, ຮັບປະກັນໄດ້ວຽກງານປ້ອງກັນຊາດ ປ້ອງກັນຄວາມສະຫງົບ, ເອົາໃຈໃສ່ຄຸ້ມຄອງສະຖຽນລະພາບທາງດ້ານການເງິນ ແລະ ເງິນຕາ, ເພີ້ມທະວີ ແລະ ແກ້ໄຂທຸກອຸປະສັກຕໍ່ການສົ່ງເສີມການຜະລິດ ແລະ ການບໍລິການ, ສືບຕໍ່ສົ່ງເສີມການຜະລິດອຸດສາຫະກຳປຸງແຕ່ງ, ພັດທະນາພື້ນຖານໂຄງລ່າງ ພາຍໃນປະເທດ ແລະ ເພື່ອເຊື່ອມຈອດກັບພາກພື້ນ, ພັດທະນາແຫຼ່ງທ່ອງທ່ຽວ ລະບົບຂົນສົ່ງ ແລະ ໂຄງລ່າງທີ່ຈຳເປັນອື່ນໆທີ່ຕິດພັນກັບການຜະລິດສະອາດ, ຈະເນັ້ນການພັດທະນາຄົນ ປັບປຸງລະບົບການສືກສາເຂົ້າສູ່ຍຸກໃໝ່ ປັບປຸງຕານາງລະບົບສາທາລະນະສຸກ, ພັດທະນາຊົນນະບົດ ແລະ ແກ້ໄຂຄວາມທຸກຍາກ ແລະ ປັບປຸງການບໍລິຫານລັດໃຫ້ມີຄວາມເຂັ້ມແຂງ.
ຂ່າວ: ສົມພາວັນ
ພາບ: ຄຳພັນ

Related Articles

Leave a Reply