ພະແນກສາທາລະນະສຸກ ແຂວງຫຼວງນໍ້າທາ ໄດ້ຈັດພິທີສັກຢາວັກຊີນປ້ອງກັນພະຍາດໂຄວິດ – 19 ເຂັມທໍາອິດ ໃຫ້ກຸ່ມທີ່ມີຄວາມສ່ຽງສູງ ເມື່ອວັນທີ 9 ມີນາ 2021 ທີ່ຜ່ານມານີ້ ຢູ່ທີ່ໂຮງໝໍແຂວງຫຼວງນໍ້າທາ ໂດຍໃຫ້ກຽດເຂົ້າຮ່ວມສັກຢາວັກຊີນດັ່ງກ່າວໃນຄັ້ງນີ້ນໍາໂດຍທ່ານ ຄໍາຟອງ ອິນມະນີ ຮອງເລຂາພັກແຂວງ ຫົວໜ້າຄະນະປ້ອງກັນ ສະກັດກັ້ນ ແລະ ຄວບຄຸມພະຍາດໂຄວິດ -19 ຂັ້ນແຂວງ , ທ່ານ ດຣ ແກ້ວ ອິນທະວົງ ຫົວໜ້າພະແນກສາທາລະນະສຸກແຂວງ, ມີຄະນະສະເພາະກິດຂັ້ນແຂວງ, ພະນັກງານແພດໝໍ, ບຸກຄະລາກອນທີ່ມີຄວາມສ່ຽງ, ພະນັກງານທີ່ເຮັດວຽກຢູ່ດ່ານເຂົ້າ-ອອກປະເທດ, ພະນັກງານອໍານວຍຄວາມສະດວກຢູ່ຈຸດຈໍາກັດບໍລິເວນເຂົ້າຮ່ວມ.
ທ່ານ ດຣ ແກ້ວ ອິນທະວົງ ຫົວໜ້າພະແນກສາທາລະນະສຸກແຂວງຫຼວງນໍ້າທາ ໄດ້ກ່າວໃນພິທິດັ່ງກ່າວວ່າ: ການສັກວັກຊີນປ້ອງກັນພະຍາດໂຄວິດ – 19 ໃນຄັ້ງນີ້ໄດ້ແບ່ງອອກເປັນ 3 ກຸ່ມເປົ້າໝາຍ ເຊີ່ງກຸ່ມທີ 1 ທີ່ໄດ້ຈັດພິທີໃນມື້ນີ້ແມ່ນ ກຸ່ມຄະນະນໍາຂອງແຂວງ, ເມືອງ, ພະນັກງານແພດ-ໝໍ, ບັນດາຜູ້ໃຫ້ບໍລິການນັກທ່ອງທ່ຽວເຈົ້າຂອງເຮືອນ ພັກ, ໂຮງ ແຮມ, ຮ້ານອາຫານ, ກຸ່ມຄົນທີ່ປະຕິບັດໜ້າທີ່ຕາມຈຸດຜ່ານດ່ານສາກົນຕ່າງໆ. ກຸ່ມທີ 2 ແມ່ນພາກສ່ວນທີ່ຢູ່ໃນຂອບເຂດທີ່ມີຄວາມສຽ່ງໜ້ອຍ ແລະ ຈະເລີ່ມຈັດຕັ້ງປະຕິບັດສັກວັກຊິນໃນວັນທີ 15 ມີນາ 2021 ເປັນຕົ້ນໄປ ແລະ ພາກສ່ວນອື່ນໆຕາມລໍາດັບ.
ແຂວງຫຼວງນໍ້າທາໄດ້ຮັບວັກຊີນກັນພະຍາດໂຄວິດ – 19 ທັງໝົດ 5.000 ໂດສ , ໃນນີ້ແບ່ງໃຫ້ໂຮງໝໍແຂວງ 1.500 ໂດສ, ເມືອງສີງ 1.000 ໂດສ, ເມືອງລອງ 700 ໂດສ, ເມືອງວຽງພູຄາ 500 ໂດສ, ເມືອງນາແລ 550 ໂດສ, ໂຮງໝໍເສນາຮັກ 250 ໂດສ ແລະ ແຮສາງແຂວງ 500 ໂດສ.
ຂ່າວ: ສົມພອນ ຂຸນດາວົງ
