ກະຊວງແຮງງານ ແລະ ສະຫວັດດີການສັງຄົມ ແຈ້ງໃຫ້ຮູ້ວ່າ: ໃນໄລຍະ 5 ປີຜ່ານມາ (2016-2020), ທົ່ວປະເທດ ມີຜູ້ເສຍຊີວິດເຖິງ 121 ຄົນ ແລະ ສູນຫາຍ 45 ຄົນຈາກໄພພິບັດທີ່ເກີດຂຶ້ນທັງໝົດ 235 ຄັ້ງ ແລະ ປະຊາຊົນຫຼາຍກວ່າ 1,8 ລ້ານຄົນ ໄດ້ຮັບຜົນກະທົບ ຊຶ່ງໄພພິບັດທີ່ຮ້າຍແຮງທີ່ສຸດແມ່ນສັນເຂື່ອນເຊປຽນ-ເຊນໍ້ານ້ອຍແຕກໃນປີ 2018.
ທ່ານ ວິໄລພົງ ສີສົມຫວັງ ຫົວໜ້າກົມສັງຄົມສົງເຄາະ ທັງເປັນຫົວໜ້າກອງເລຂາ ຄະນະກຳ ມະການຄຸ້ມຄອງໄພພິບັດຂັ້ນສູນກາງ ໄດ້ລາຍງານສະພາບໄພພິບັດໃນໄລຍະ 5 ປີຜ່ານມາ ທີ່ກອງປະຊຸມວຽກງານຄຸ້ມຄອງໄພພິບັດທົ່ວປະເທດ ປະຈໍາ ປີ 2020 ທີ່ໄດ້ຈັດຂຶ້ນເມື່ອວັນທີ 10 ມີນາ 2021 ທີ່ຜ່ານມາຢູ່ ກະຊວງແຮງງານ ແລະ ສະຫວັດດີການສັງຄົມ ວ່າ: ໄພພິບັດຮ້າຍແຮງທີ່ເກີດຂຶ້ນ ໃນໄລຍະ 5 ປີທີ່ຜ່ານມາແມ່ນນໍ້າຖ້ວມທີ່ເກີດຈາກພາຍຸຊັນຕິນ ແລະ ຄູກັນນໍ້າເຂື່ອນໄຟຟ້າເຊປ່ຽນ-ເຊນໍ້ານ້ອຍແຕກ ຢູ່ແຂວງອັດຕະປື ປີ 2018, ພາຍຸເບບິນກາ ທີ່ໄດ້ເຮັດໃຫ້ນໍ້າຖ້ວມໃນປີ 2019. ສະເພາະບັນຫາຜົນກະທົບຈາກການລະບາດຂອງພະຍາດໂຄວິດ-19 ທີ່ເກີດຂຶ້ນໃນປີ 2020 ໄດ້ເຮັດໃຫ້ແຜນວຽກງານຕ່າງໆຂອງທຸກໆຂະແໜງການໃນຂອບເຂດທົ່ວປະເທດແມ່ນບໍ່ສາມາດບັນລຸໄດ້ຕາມແຜນ ນອກນັ້ນລັດຖະບານ ຈໍາເປັນຕ້ອງດັດແກ້ປັບຕົວເລກການຂະຫຍາຍຕົວຂອງເສດຖະກິດ ປີ 2020 ລົງຈາກ 6,5% ມາເຫຼືອພຽງ 3,3%-3,6%.
ທ່ານ ວິໄລພົງໄດ້ກ່າວຕື່ມວ່າ: ໄພພິບັດທີ່ກ່າວມານັ້ນໄດ້ສ້າງຄວາມເສຍຫາຍໃຫ້ຂະແໜງກະສິກໍາ, ການປະມົງ, ລ້ຽງສັດ, ປ່າໄມ້ ແລະ ຊົນລະປະທານ ເສຍຫາຍເຖິງ 57% ແລະ ເສັ້ນທາງ, ຂົວ, ແລະ ອາຄານຂອງລັດຖະບານເສຍຫາຍເຖິງ 66% ຂອງຄວາມເສຍຫາຍທັງໝົດ. ສັງລວມແລ້ວຜົນເສຍຫາຍຈາກໄພພິບັດໃນໄລຍະ 5 ປີທີ່ຜ່ານມາໄດ້ສ້າງຄວາມເສຍຫາຍຕໍ່ຊີວິດ, ທີ່ຢູ່ອາໄສ, ການສຶກສາ, ສາທາລະນະສຸກ ແລະ ໂພຊະນາການ, ວັດທະນະທໍາ, ການຜະລິດ ກະສິກໍາ, ອຸດສາຫະກໍາ ແລະ ການຄ້າ, ທ່ອງທ່ຽວ, ໂຄງລ່າງພື້ນຖານ, ຂົນສົ່ງ, ໄຟຟ້າ, ນໍ້າໃຊ້ ແລະ ສຸຂາພິບານ, ທາງນໍ້າ ແລະ ອື່ນໆ ຄິດເປັນມູນຄ່າປະມານ 5.538 ຕື້ກວ່າກີບ.
