Vientiane Times Lao
ຊົມທະເລໝອກ, ສໍາພັດກັບອາກາດໜາວ ແລະ ເບີ່ງຕາເວັນຂຶ້ນ ແລະ ຕົກ ທີ່ຜາຊົມນາງ-ໜອງຂຽວ ຢູ່ ເມືອງງອຍໃນຍຸກລາວທ່ຽວລາວ

ຊົມທະເລໝອກ, ສໍາພັດກັບອາກາດໜາວ ແລະ ເບີ່ງຕາເວັນຂຶ້ນ ແລະ ຕົກ ທີ່ຜາຊົມນາງ-ໜອງຂຽວ ຢູ່ ເມືອງງອຍໃນຍຸກລາວທ່ຽວລາວ

ຜາຊົມນາງ-ໜອງຂຽວ ຢູ່ ເມືອງງອຍ ແຂວງຫຼວງພະບາງ ເປັນສະຖານທີ່ທ່ອງທ່ຽວໃໝ່ແຫ່ງໜຶ່ງທີ່ກໍາລັງໄດ້ຮັບ ຄວາມນິ ຍົມຈາກນັກທ່ອງທ່ຽວພາຍໃນຍ້ອນວ່າແຫຼ່ງທ່ອງທ່ຽວດັ່ງກ່າວນີ້ມີຈຸດຊົມວິວທີ່ສາມາດ ແນມເຫັນເທດສະບານເມືອງງອຍ ແລະ ທໍາມະຊາດຢູ່ອ້ອມຮອບເມືອງງອຍ ນອກນັ້ນໃນຍາມເຊົ້າຍັງສາມາດເບີ່ງນໍ້າໝອກທີ່ປົກຄຸມໃນບໍລິເວນແຫຼ່ງທ່ອງທ່ຽວດັ່ງກ່າວ.

ຜູ້ສໍາປະທານຜາຊົມນາງ-ໜອງຂຽວ, ທ່ານນາງໄພວັນ ທອງວິໄລສານ ໄດ້ກ່າວຄວາມເປັນມາກ່ຽວກັບສະຖານທີ່ທ່ອງທ່ຽວແຫ່ງນີ້ຕໍ່ທີມງານວຽງຈັນທາຍເມື່ອບໍ່ດົນມານີ້ວ່າ:  ໄດ້ລິເລີ່ມພັດທະນາ ແລະ ເປີດບໍລິການຜາຊົມນາງ-ໜອງຂຽວ ໃຫ້ນັກທ່ອງທ່ຽວ ນັບແຕ່ເດືອນ ຕຸລາ 2019 ເປັນຕົ້ນມາ ຊຶ່ງໃນເດືອນກຸມພາ  2020 ໄດ້ປິດການບໍລິການຍ້ອນວ່າມີການແຜ່ລະບາດຂອງພະຍາດໂຄວິດ-19 ຊຶ່ງໃນໄລຍະປິດນີ້ກໍ່ໄດ້ປັບປຸງສະຖານເພີ່ມເຕີມ ໂດຍສະເພາະທີ່ພັກ, ຈຸດຊົມວິວ ແລະ ສິ່ງອໍານວຍຄວາມສະດວກຕ່າງໆ ແລະ ໄດ້ເລີ່ມເປີດບໍລິການຄືນໃໝ່ນັບແຕ່ເດືອນ ພະຈິກ 2020 ນີ້ເປັນຕົ້ນມາ.

ທ່ານນາງໄພວັນໄດ້ກ່າວຕື່ມວ່າ: ນັກທ່ອງທ່ຽວທີ່ມາທ່ຽວ ທີ່ ຜາຊົມນາງ-ໜອງຂຽວນີ້ຈະໄດ້ຂື້ນໄປທ່ຽວຊົມທຳມະຊາດ ກັບອາກາດສົດໆ ລວມທັງສາຍໝອກ ແລະ ຊົມຕາເວັນຂື້ນ ແລະ ຕາເວັນຕົກ, ເພີດເພີນກັບສຽງນົກກາຮ້ອງພ້ອມດ້ວຍກິດຈະກຳຕັ້ງແຄ້ມ, ກາງເຕັ້ນນອນໃນຍາມຄໍ່າຄືນ ໂດຍມີເຕັ້ນ ແລະ ອາຫານລາວຫຼັກໆເຊັ່ນ: ປີ້ງປາ, ຕຳແຈ່ວ, ເຂົ້າໜຽວ ໄວ້ຄອຍບໍລິການນັກທ່ອງທ່ຽວ ນອກຈາກອາຫານບ້ານໆແລ້ວ, ຍັງມີອາຫານປະເພດ ຊີ້ນດາດ ແລະ ບາບີຄິວ ໄວ້ຄອຍບໍລິການນັກທ່ອງທ່ຽວນໍາອີກ ຊຶ່ງມີລາຄາເລີ່ມຕົ້ນພຽງແຕ່ 150.000ກີບຕໍ່ຄົນຕໍ່ຄືນ. ນອກນັ້ນສະເພາະນັກທ່ອງທ່ຽວທີ່ມາເປັນກຸ່ມຈະມີການຫຼຸດລາຄາເປັນພິເສດ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ