Vientiane Times Lao
ນາຍົກລັດຖະມົນຕີແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດອາຊີ-ເອີຣົບ ຄັ້ງທີ 13

ນາຍົກລັດຖະມົນຕີແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດອາຊີ-ເອີຣົບ ຄັ້ງທີ 13

ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດອາຊີ-ເອີຣົບ ຄັ້ງທີ 13 ຜ່ານລະບົບກອງປະຊຸມທາງໄກ ໄດ້ຈັດຂຶ້ນໃນລະຫວ່າງວັນທີ 25-26 ພະຈິກ 2021ນີ້ ພາຍໃຕ້ຫົວຂໍ້ “ສ້າງຄວາມເຂັ້ມແຂງການຮ່ວມມືຫຼາຍຝ່າຍ ເພື່ອການຈະເລີນເຕີບໂຕຮ່ວມກັນ”, ໂດຍເປັນປະທານຂອງ ສົມເດັດ ຮຸນເຊັນ ນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ແລະ ມີບັນດາຜູ້ນຳຈາກຄູ່ຮ່ວມມື 51 ປະເທດ ແລະ 2 ອົງການຈັດຕັ້ງສາກົນ ຈາກພາກພື້ນອາຊີ ແລະ ເອີຣົບ ເຂົ້າຮ່ວມ.

ກອງປະຊຸມຄັ້ງນີ້ ໄດ້ຍົກເອົາຫຼາຍຫົວຂໍ້ຂຶ້ນມາປຶກສາຫາລືຮ່ວມກັນ ໂດຍສະເພາະ ບັນດາຜູ້ນໍາ ໄດ້ປຶກສາຫາລື ແລະ ແລກປ່ຽນຄຳຄິດເຫັນ ເພື່ອວາງທິດທາງການຮ່ວມມືໃນຕໍ່ໜ້າ ໂດຍສະເພາະການຮ່ວມມືໃນການຟື້ນຟູ ແລະ ພັດທະນາເສດຖະກິດ-ສັງຄົມຮອບດ້ານ​ ຈາກການແຜ່ລະບາດຂອງເຊື້ອພະຍາດໂຄວິດ-19 ໃນສອງພາກພື້ນ ເພື່ອປັບປຸງຊີວິດການເປັນຢູ່ຂອງປະ ຊາຊົນໃຫ້ດີຂຶ້ນ ແລະ ສາມາດປັບຕົວເຂົ້າກັບສະພາບວິຖີຊີວິດແບບໃໝ່ ໄດ້ຢ່າງມີປະສິດທິຜົນ.

ໃນໂອກາດນີ້, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ປະກອບ ຄຳເຫັນໃນຫົວຂໍ້: “ການພັດທະນາ ແລະ ການຟື້ນຟູເສດ ຖະກິດ-ສັງຄົມ ພາຍຫຼັງການແຜ່ລະບາດຂອງເຊື້ອພະຍາດໂຄວິດ-19” ຊຶ່ງໄດ້ເນັ້ນເຖິງຄວາມສຳຄັນຂອງການຮ່ວມມື ແລະ ການຊ່ວຍເຫຼືອເຊິ່ງກັນແລະກັນ ລະຫວ່າງສອງພາກພື້ນອາຊີ- ເອີຣົບ ເພື່ອແກ້ໄຂຜົນກະທົບຂອງການແຜ່ລະບາດຂອງເຊື້ອພະຍາດໂຄວິດ-19 ແລະ ຟື້ນຟູເສດຖະກິດ-ສັງຄົມໃຫ້ສາມາດເຕີບໃຫຍ່ຂະຫຍາຍຕົວໂດຍໄວ ແນໃສ່ເພີ່ມທະວີການຊ່ວຍເຫຼືອດ້ານເຕັກນິກວິທະຍາສາດ, ການແລກປ່ຽນຂໍ້ມູນຂ່າວສານການແພດ ແລະ ການສ້າງຄວາມເຂັ້ມແຂງດ້ານສາທາລະນະສຸກ ເພື່ອຮັບປະກັນໃຫ້ປະ ຊາຊົນສາມາດເຂົ້າເຖິງລະບົບສາທາລະນະສຸກທີ່ທັນສະໄໝ ລວມທັງການເຂົ້າເຖິງຢາປົວພະຍາດ ແລະ ການສະໜອງວັກຊິນໃຫ້ພຽງພໍ ແລະ ທົ່ວເຖິງ.

ກອງປະຊຸມສຸດຍອດ ອາຊີ-ເອີຣົບ ຖືກສ້າງຕັ້ງຂຶ້ນໃນປີ 1996 ແລະ ໄດ້ວາງເປົ້າໝາຍເພື່ອເພີ່ມທະວີຄວາມເຂົ້າໃຈຊຶ່ງກັນ ແລະ ກັນ, ສົ່ງເສີມ ແລະ ຮັດແໜ້ນການຮ່ວມມື ລະຫວ່າງ ອາຊີ-ເອີຣົບ ໂດຍຜ່ານການປຶກສາຫາລື, ສ້າງເງື່ອນໄຂທີ່ເໝາະສົມ ເພື່ອພັດທະນາເສດຖະກິດ-ສັງຄົມ ແນໃສ່ຮັດແໜ້ນການຮ່ວມມືອັນດີ ລະຫວ່າງສອງພາກພື້ນ ອາຊີ-ເອີຣົບ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ