Vientiane Times Lao
ນາຍົກເນັ້ນໃຫ້ຄະນະພັກແຂວງຄໍາມ່ວນເອົາໃຈໃສ່ການເຮັດວຽກທີ່ມີຄຸນນະພາບ, ທັນສະໄໝ, ໂປ່ງໃສ

ນາຍົກເນັ້ນໃຫ້ຄະນະພັກແຂວງຄໍາມ່ວນເອົາໃຈໃສ່ການເຮັດວຽກທີ່ມີຄຸນນະພາບ, ທັນສະໄໝ, ໂປ່ງໃສ

ເນື່ອງໃນໂອກາດທີ່ທ່ານທອງລຸນ ສີສຸລິດ ນາຍຍົກລັດຖະມົນຕີ ແລະ ຄະນະໄດ້ລົງເຄື່ອນໄຫວວຽກງານຢູ່ແຂວງຄໍາມ່ວນ ເມື່ອບໍ່ດົນມານີ້ ຊຶ່ງທ່ານໄດ້ແນະນໍາໃຫ້ຄະນະພັກແຂວງຊຸດໃໝ່ໃຫ້ມີການແບ່ງໜ້າທີ່ ແລະ ຄວາມຮັບຜິດຊອບກັນ ຢ່າງລະອຽດຈະແຈ້ງ ໂດຍມີລະບອບແບບແຜນ ໃນການຕິດຕາມ, ຊຸກຍູ້ ແລະ ກວດກາ ຄວາມຮັບຜິດ-ຮັບຊອບໃນແຕ່ລະໄລຍະ ຄັກແນ່, ການນຳພາ-ຊີ້ນຳວຽກງານໃຫ້ເລັ່ງໃສ່ຄຸນນະພາບ, ທັນສະໄໝ, ໂປ່ງໃສ, ຮັດກຸມ, ມີປະສິດທິພາບ ແລະ ປະສິດທິຜົນ, ພ້ອມກັນນັ້ນຕ້ອງເປັນແບບຢ່າງທີ່ດີ ຕໍ່ສະມາຊິກພັກ-ພະນັກງານ, ຊຶ່ງສະມາຊິກພັກ-ພະນັກງານ ກໍ່ຕ້ອງເປັນແບບຢ່າງທີ່ດີ ໃຫ້ແກ່ສັງຄົມ ແລະ ປະຊາຊົນ ເຮັດໃຫ້ເຂົາເຈົ້າ ມີຄວາມເຊື່ອໝັ້ນ, ໄວ້ເນື້ອເຊື່ອໃຈ ແລະ ເຄົາລົບນັບຖື.

ທ່ານທອງລຸນ ໄດ້ກ່າວຕື່ມວ່າ: ສຳລັບການພັດທະນາວຽກງານການຄ້າ, ການລົງທຶນ, ການບໍລິການ, ການທ່ອງທ່ຽວ ແລະ ການຜະລິດອຸດສາຫະກຳປຸງແຕ່ງ ຕິດພັນກັບການຜະລິດກະສິກຳສະອາດ ເພື່ອນຳພາແຂວງ ຮັ່ງມີເຂັ້ມແຂງ, ປະຊາຊົນບັນດາເຜົ່າ ມີຊີວິດການເປັນຢູ່ທີ່ດີຂຶ້ນເປັນກ້າວໆ, ເອົາໃຈໃສ່ປົກປັກຮັກສາປ່າໄມ້, ສິ່ງແວດລ້ອມ, ແຫຼ່ງນໍ້າ, ສັດນໍ້າ-ສັດປ່າ ໃຫ້ມີຄວາມຍືນຍົງ, ສືບຕໍ່ພັດທະນາ ແລະ ປັບປຸງໂຄງລ່າງພື້ນຖານການທ່ອງທ່ຽວ ເພື່ອຮັບປະກັນສາມາດຮອງຮັບວຽກງານດັ່ງກ່າວໃນຕໍ່ໜ້າ, ເອົາໃຈໃສ່ ວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການສຶກສາອົບຮົມການເມືອງແນວຄິດ ໃຫ້ພະນັກງານ, ທະຫານ, ຕຳຫຼວດ ແລະ ປະຊາຊົນບັັນດາເຜົ່າ ໃຫ້ດີ ແລະ ເປັນປົກກະຕິ ເພື່ອໃຫ້ເຂົາເຈົ້າ ເຂົ້າໃຈຢ່າງຖືກຕ້ອງ ແລະ ເຂົ້າຮ່ວມຂະບວນການ ປົກປັກຮັກສາ ແລະ ສ້າງສາພັດທະນາປະເທດ ກໍ່ຄືການຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ທີ່ພົ້ນເດັ່ນໃນສັງຄົມ ເປັນຕົ້ນ ບັນຫາຢາເສບຕິດ, ການໂຄສະນາຊວນເຊື່ອ ແລະ ໃສ່ຮ້າຍປ້າຍສີ ຂອງກຸ່ມຄົນທີ່ບໍ່ຫວັງດີ ແລະ ອື່ນໆ.

ຂ່າວ-ພາບ: ກົມປະຊາສຳພັນ ຫສນຍ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ