ຈາກກໍລະນີທີ່ພາຍຸລະດູຮ້ອນພັດຖະຫຼົ່ມບ້ານນາທ່ຽງ ເມືອງຊະນະຄາມ ແຂວງວຽງຈັນ ໃນຕອນແລງຂອງວັນທີ 29 ມີນາ 2021 ເວລາປະມານ 16 ໂມງ 30 ໄດ້ເຮັດໃຫ້ເສົາໄຟຟ້າຫັກຈໍານວນ 9 ຕົ້ນ ແລະ ເຮືອນປະຊາຊົນເປ່ເພ 5 ຫຼັງ ໂຊກດີບໍ່ມີຜູ້ເສຍຊີວິດ ແລະ ໄດ້ຮັບບາດເຈັບ ແລະ ຮອດປັດຈຸບັນນີ້ປະຊາຊົນພາຍໃນເມືອງຍັງບໍ່ມີໄຟຟ້າໃຊ້.
ທ່ານສະໝານ ວິເສດຍະວົງ ເຈົ້າເມືອງຊະນະຄາມ ແຂວງວຽງຈັນໄດ້ລາຍງານຕໍ່ທີມງານ ວຽງຈັນທາຍໃນຕອນເຊົ້າຂອງວັນທີ 30 ມີນາ ນີ້ກ່ຽວກັບສະພາບຄວາມເສຍຫາຍທີ່ ເກີດຈາກ ພາຍຸທີ່ເກີດຂຶ້ນວ່າ: ພາຍຫຼັງທີ່ເກີດພາຍຸລະດູຮ້ອນໃນຕອນ ແລງຂອງມື້ວານນີ້ໄດ້ເຮັດໃຫ້ ປະຊາຊົນທົ່ວເມືອງຊະນະຄາມບໍ່ມີໄຟຟ້າໃຊ້ຍ້ອນເສົາໄຟຟ້າຈໍານວນໜຶ່ງໄດ້ຫັກ ແລະ ຮອດມື້ນີ້ຍັງບໍ່ສາມາດເປີດກະແສໄຟຟ້າມາຮັບໃຊ້ພາຍໃນເມືອງໄດ້ຍ້ອນເຈົ້າໝ້າທີ່ໄຟຟ້າລາວກໍາລັງເກັບກູ້ເສົາໄຟຟ້າທີ່ຫັກ ເພື່ອປ່ຽນຖ່າຍ ແລະ ກໍາລັງຂຸດດິນເພື່ອຈະຝັງເສົາໄຟຟ້າໃໝ່ ຄາດວ່າປະຊາຊົນຈະໄດ້ໃຊ້ໄຟຟ້າໃນມື້ອື່ນວັນພຸດທີ 31 ມີນາ 2021 ຍ້ອນວ່າເມື່ອຝັງເສົາໄຟ ຟ້າແລ້ວ ຕ້ອງໄດ້ລໍຖ້າໃຫ້ປູນທີ່ເທຕີນເສົາແຫ້ງກ່ອນຈຶ່ງຈະສາມາດດຶງສາຍໄຟຟ້າໄດ້.
ຂ່າວ: ວຽງຈັນທາຍ
