ກະຊວງສາທາລະນະສຸກ ແຈ້ງໃຫ້ຮູ້ເມື່ອບໍ່ດົນມານີ້ວ່າ: ການປ້ອງກັນພະຍາດໂຄວິດ-19 ປະຊາຊົນທຸກທົ່ວໜ້າຕ້ອງໄດ້ເພີ່ມມາດຕະການປ້ອງກັນຂຶ້ນກວ່າເກົ່າຍ້ອນພະຍາດດັ່ງກ່າວໄດ້ກາຍພັນແລ້ວໂດຍເຮັດໃຫ້ຕິດເຊື້ອໄວກວ່າເກົ່າຫຼາຍເທົ່າ ແລະ ນອກນັ້ນຜູ້ຕິດເຊື້ອທີ່ກວດພົບໃນປັດຈຸບັນນີ້ແມ່ນບໍ່ສະແດງອາການໃດໆ ເຊັ່ນ: ຄິງຮ້ອນ, ໄອ-ຈາມ ແລະ ອາການອື່ນໆທີ່ເປັນນິຍາມຕິດເຊື້ອພະຍາດໂຄວິດ-19 ດັ່ງກໍລະນີ ຜູ້ຕິດເຊື້ອນ້ຳເບີ 48 ຫຼື ຜູ້ທີ 48 ທີ່ຕິດເຊື້ອພະຍາດດັ່ງກ່າວ ທີ່ໄດ້ກວດພົບຕິດເຊື້ອເມື່ອວັນທີ 9 ມີນາ 2021 ທີ່ຜ່ານມາ ເປັນເພດຊາຍ, ສັນຊາດລາວຊຶ່ງຜູ້ກຽ່ວມີສຸຂະພາບແຂງແຮງດີ, ບໍ່ມີອາການສະແດງຫຍັງ.
ກະຊວງສາທາລະນະສຸກ ແຈ້ງໃຫ້ຮູ້ຕື່ມອີກວ່າ: ສັງລວມແລ້ວການກວດວິເຄາະຫາພະຍາດໂຄວິດ-19 ນັບແຕ່ ເດືອນມັງກອນ 2020 ຮອດ ວັນທີ 10 ມີນາ 2021 ກວດພົບເຊື້ອສະສົມທີ່ຕິດເຊື້ອພະຍາດໂຄວິດ-19 ຢູ່ລາວ ທັງໝົດ 48 ຄົນຊຶ່ງທັງໝົດແມ່ນໄດ້ເດີນທາງມາແຕ່ຕ່າງປະເທດ (ບໍ່ພົບຜູ້ຕິດເຊື້ອພາຍໃນປະເທດ) ໃນນີ້ປິ່ນປົວຫາຍດີແລ້ວ 42 ຄົນ ຊຶ່ງທັງ 6 ຄົນ(ຈຳປາສັກ 2 ຄົນ, ນະຄອນຫຼວງ 3 ຄົນ ແລະ ສະຫວັນນະເຂດ 1 ຄົນ) ຊຶ່ງທັງ 6 ຄົນແມ່ນມີສຸຂະພາບແຂງແຮງດີ ບໍ່ມີອາການຫຍັງ.
ຕໍ່ກັບສະພາບການແຜ່ລະບາດຂອງພະຍາດດັ່ງກ່າວຢູ່ບັນດາປະເທດອ້ອມຂ້າງ ສປປ ລາວ ແລະ ໃນໂລກທີ່ຍັງມີການແຜ່ລະບາດເປັນວົງກວ້າງ, ຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຮຽກຮ້ອງໃຫ້ປວງຊົນຊາວລາວ ແລະ ຕ່າງປະເທດທີ່ອາໄສຢູ່ ສປປ ລາວ ແລະ ທຸກພາກສ່ວນໃນສັງຄົມຈົ່ງມີສະຕິລະວັງຕົວ ໃນການປະຕິບັດມາດຕະການປ້ອງກັນພະຍາດດັ່ງກ່າວຕາມການແຈ້ງການ ຫຼື ທາງຄະນະສະເພາະກິດວາງອອກຢ່າງເຂັ້ມງວດ.
