ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ຮ່ວມມືກັບລັດວິສາຫະກິດ ແລະ ຜູ້ປະກອບການ ເລັ່ງປ້ອງກັນແມ່ຄ້າ-ພໍ່ຄ້າຊາວຂາຍສວຍໂອກາດຂຶ້ນລາຄາເຂົ້າສານໜຽວ, ເຂົ້າສານຈ້າວ, ພຶດປອດສານພິດ ແລະ ຊີ້ນໝູ ໃນທີ່ມີສືບຕໍ່ມາດຕະການປ້ອງກັນພະຍາດໂຄວິດ-19 ອີກ 15 ວັນ ໂດຍການຕັ້ງຈຸດຂາຍສິນຄ້າດັ່ງກ່າວ ແລະ ໄດ້ວາງລາຄາຂາຍຕາມການຊີ້ນໍາຂອງລັດຖະບານ ຊຶ່ງມີຈຸດບໍລິການຈໍາໜ່າຍເຂົ້າ, ພຶດປອດສານພິດ ແລະ ຊີ້ນໝູດັ່ງນີ້: ບໍລິສັດລັດວິສາຫະກິດສະບຽງອາຫານນະຄອນຫຼວງວຽງຈັນຈະນໍາເອົາເຂົ້າກິນ ແລະ ຊີ້ນໝູມາຈໍາໜ່າຍຢູ່ໃນນະຄອນຫຼວງວຽງຈັນຢູ່ 2 ຈຸດ ຄື: ບ້ານສີຫອມ ເມືອງຈັນທະບູລີ ຊຶ່ງລາຄາເຂົ້າສານໜຽວປະເພດ 1ທີ່ກໍານົດລາຄາໄວ້ແມ່ນ 35.000 ກີບ/ຖົງ( 1ຖົງ/5ກິໂລ), ເຂົ້າສານຈ້າວລາຄາ 42.000 ກີບ/ຖົງ ( 1 ຖົງ/5 ກິໂລ), ຊີ້ນໝູປະເພດ 1 ລາຄາສູງສຸດ 48.000 ກີບ/ກິໂລ, ຊີ້ນໝູປະເພດ 2 ລາຄາສູງສຸດ 44.000 ກີບ/ກິໂລ ແລະ ຢູ່ຕະຫຼາດບຶງທາດຫຼວງມີສະເພາະຊິ້ນຫມູ ແຕ່ວັນຈັນ ຫາ ວັນສຸກ ນັບແຕ່ເວລາ 8:00 ໂມງ-17:00 ໂມງ.
ບໍລິສັດຊີພີລາວຈໍາກັດນໍາເອົາສິນຄ້າປະເພດ ຊີ້ນໜູອອກຈໍາໜ່າຍຢູ່ຮ້ານຊີຟີຟັອກຊັອບ 20 ຮ້ານ ຢູ່ໃນນະຄອນຫຼວງວຽງຈັນ ຮອດວັນທີ 23 ພຶດສະພາ 2021 ນັບແຕ່ເວລາ 6:00 ໂມງ-19:00ໂມງໃນແຕ່ລະວັນ. ບໍລິສັດຄໍາແພງເພັດ ແຈ້ງສະຫວ່າງສົ່ງເສີມການກະເສດຂາອອກ – ຂາເຂົ້າ ຈໍາກັດຜູ້ດຽວ ນໍາເອົາສິນຄ້າປະເພດ ເຂົ້າກິນ ອອກຈໍາໜ່າຍຢູ່ໃນນະຄອນຫຼວງວຽງຈັນ ຢູ່ບ້ານນາສ້ຽວ ເມືອງນາຊາຍທອງ ຫຼື ຕະຫຼາດແຈ້ງສະຫວ່າງ ນັບແຕ່ເວລາ 8:00 ໂມງ-17:00 ໂມງຂອງທຸກໆວັນ.
ສະເພາະກຸ່ມກະສິກໍາອິນຊີ ນະຄອນຫຼວງຈະຈໍາຫນ່າຍພືດປອດສານພິດ ຢູ່ບ້ານ ດົງນາໂຊກ ຂາຍໝົດມື້ໃນມື້ວັນຈັນ ແລະ ວັນພະຫັດ, ຕະຫຼາດຊ້າງຄູ້ ຂາຍຕອນບ່າຍ ໃນມື້ວັນຈັນ ແລະ ວັນພະຫັດ, ຕະຫຼາດຫ້ວຍຫົງ ຂາຍສະເພາະຕອນບ່າຍ ຂອງວັນເສົາ, ຕະຫຼາດຫຼັກ 8 ສົມຫວັງ ຂາຍທາງອອນໄລ ແລະ ສົ່ງເປັນມື້. ຮ້ານຄ້າກອງທັບຫຼັກ5 ຂາຍສະເພາະຕອນບ່າຍ ວັນຈັນ ແລະ ວັນພະຫັດ, ຕະຫຼາດທົ່ງຂັນຄໍາ ຂາຍຕອນເຊົ້າສະເພາະ ວັນອາທິດ, ຕະຫຼາດ ຊໍາເກດລາວສໍາພັນ ຂາຍສະເພາະຕອນເຊົ້າ ວັນອາທິດ, ເດີ່ນສູນການຄ້າລາວ-ໄອເຕັກ ຂາຍສະເພາະຕອນເຊົ້າ ຂອງວັນພຸດ ແລະ ວັນເສົາ.
