ສູນກາງແນວລາວສ້າງຊາດໄດ້ແຈ້ງໃຫ້ຮູ້ວ່າ: ຍັງພົບນາຍ ແລະ ພົນທະຫານ-ຕຳຫລວດ, ຜູ້ທີ່ເສຍອົງຄະພັກຜ່ອນບຳນານ ທີ່ມີຄຸນງາມຄວາມດີ ຈາກການປະຕິວັດ ແລະ ມີເງື່ອນໄຂຄົບຖ້ວນແຕ່ບໍ່ໄດ້ຮັບນະໂຍບາຍ (ເງິນ ແລະ ອື່ນໆ) ກົງກັນຂ້າມ ຜູ້ທີ່ບໍ່ມີເງື່ອນໄຂຄົບ ຖ້ວນພັດໄດ້ຮັບ.
ທ່ານ ນາງ ຄຳຈັນ ພົມແສງສະຫວັນ ຮອງປະ ທານສູນກາງແນວລາວສ້າງຊາດ ໄດ້ສະເໜີລັດ ຖະບານ ຢູ່ ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີVI ໃນບໍ່ດົນມານີ້ ກ່ຽວກັບການປະຕິບັດນະໂຍບາຍຕ່າງໆຕໍ່ນາຍ ແລະ ພົນທະຫານ-ຕຳຫລວດ, ຜູ້ເສຍອົງຄະທີ່ ໄດ້ພັກຜ່ອນຮັບອູດໜູນບຳນານ ທີ່ມີຄຸນງາມ ຄວາມດີ ຈາກການປະຕິວັດວ່າ : ການປະຕິບັດນະໂຍບາຍຕໍ່ພະນັກງານຜູ້ທີ່ເສຍ ສະຫຼະຕໍ່ການປະຕິວັດ ຫຼື ຜູ້ທີ່ຕໍ່ສູ້ກູ້ຊາດ ນັບແຕ່ປີ 1954 ຄືນຫຼັງ ຜູ້ທີ່ມີຄຸນງາມຄວາມດີ ແລະ ມີເງື່ອນໄຂຄົບຖ້ວນຈໍານວນໜຶ່ງ ພັດບໍ່ໄດ້ ຮັບນະໂຍບາຍຈາກລັດຖະບານກໍ່ຍັງມີຫຼາຍ ແຕ່ກົງກັນຂ້າມພັດພົບເຫັນຜູ້ທີ່ບໍ່ມີເງື່ອນໄຂຄົບຖ້ວນພັດໄດ້ຮັບ ຕໍ່ກັບບັນຫານີ້ກະຊວງກ່ຽວ ຂ້ອງຄວນກວດກາຄືນ ແລະ ແກ້ໄຂໃຫ້ໄດ້.
ທ່ານ ນາງ ຄຳຈັນ ໄດ້ສະເໜີຕື່ມວ່າ: ຢາກໃຫ້ລັດ ຖະບານຄວນອອກດຳລັດໃນການມອບໂອນນາຍ ແລະ ພົນທະຫານ-ພົນຕຳຫລວດ, ຜູ້ເສຍອົງຄະໃຫ້ສອງກະຊວງທີ່ກ່ຽວຂ້ອງຄື : ກະຊວງປ້ອງກັນປະເທດ ແລະ ກະຊວງປ້ອງກັນ ຄວາມສະຫງົບ ເພື່ອຄຸ້ມຄອງດູແລ ຕາມຂໍ້ຕົກລົງ ຂອງຄະນະເລຂາສູນກາງສູນກາງພັກທີ່ໄດ້ອອກຂໍ້ຕົກລົງກ່ຽວກັບເລື່ອງນີ້ມາແຕ່ທ້າຍປີ 2018 ແຕ່ບໍ່ທັນໄດ້ປະຕິບັດຕົວຈິງ.
ຂ່າວ: ສົມພາວັນ
