ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ ) ໄດ້ຖະແຫຼງຂ່າວເມື່ອວັນທີ 9 ພຶດສະພາ 2021 ທີ່ຜ່ານມານີ້ກ່ຽວກັບການຈັດຕັ້ງຜັນຂະຫຍາຍຄຳສັ່ງເລກທີ 15 ຂອງນາຍົກລັດຖະມົນຕີ ແລະ ແຈ້ງການຕ່າງໆ ຂອງຄະນະສະເພາະກິດວາງອອກໂດຍມີເນື້ອໃນບາງຕອນທີ່ສໍາຄັນວ່າ: ພາຍຫຼັງທີ່ມີຄໍາສັ່ງດັັ່ງກ່າວກະຊວງ ຖວທ ໄດ້ອອກແຈ້ງ ການໃຫ້ປິດຊົ່ວຄາວຮ້ານກິນດື່ມ, ຮ້ານບັນເທີງ, ຄາຣາໂອເກະ, ຮ້ານເກມ, ການຈັດງານລ້ຽງສັງສັນ, ການຈັດງານບຸນປະເພນີ ແລະ ຄຳແນະນຳ ແຈ້ງການຕ່າງໆ ເຖິງຂະແໜງການທີ່ກ່ຽວຂ້ອງ ໂດຍເຫັນວ່າໄດ້ຮັບການຮ່ວມມືໃນການຈັດຕັ້ງປະຕິບັດເປັນຢ່າງດີ, ແຕ່ຄຽງຄູ່ກັນນັ້ນຍັງມີຮ້ານບັນເທີງ, ຮ້ານກິນດື່ມ, ຮ້ານເກມຈຳນວນໜຶ່ງທີ່ຍັງຝ່າຝືນບໍ່ປະຕິບັດຕາມແຈ້ງການ ແລະ ຄະນະຮັບຜິດຊອບຢູ່ແຕ່ລະທ້ອງຖິ່ນໄດ້ຕັກເຕືອນ ແລະ ປະຕິບັດວິໄນໄປແລ້ວ ບາງຮ້ານແມ່ນໃຫ້ສັ່ງປິດຮ້ອນວ່າບໍ່ມີໃບອະນຸຍາດໃນການດໍາເນີນທຸລະກິດ.
ສະເພາະຂະແໜງການທ່ອງທ່ຽວທີ່ໄດ້ຮັບຜົນກະທົບຈາກພະຍາດໂຄວິດ-19, ທ່ານ ສະຫວັນຄອນ ໄດ້ກ່າວວ່າ: ກະຊວງ ຖວທ ໄດ້ກຽມຊ່ວຍເຫຼືອຜູ້ປະກອບການດ້ານການທ່ອງທ່ຽວ ແລ້ວໂດຍມີແຜນສະເໜີລັດຖະບານ ແລະ ຂໍການຊ່ວຍເຫຼືອ ດ້ານທຶນຮອນຈາກອົງການຈັດຕັ້ງສາກົນເພື່ອມາຟື້ນຟູ, ພັດທະນາທຸລະກິດດ້ານການທ່ອງທ່ຽວ, ສ້າງແຜນກິດຈະກຳຫຼາຍຮູບແບບສົ່ງເສີມລາວທ່ຽວລາວ ພາຍຫຼັງທີ່ສາມາດຄວບຄຸມການແຜ່ລະບາດຂອງພະຍາດໂຄວິດ-19 ໄດ້ແລ້ວ, ຈັດກຸ່ມນັກທ່ອງທ່ຽວຈາກປະເທດທີ່ບໍ່ມີການແຜ່ລະບາດມາທ່ຽວລາວ, ເພີ່ມທະວີການໂຄສະນາການທ່ອງທ່ຽວໃນຫຼາຍຮູບການ ແລະ ອື່ນໆ. ສະເພາະການຊ່ວຍເຫຼືອແກ້ໄຂຜົນກະທົບໃນບາງດ້ານນັ້ນ ລັດຖະບານ ກໍ່ຄື ກະຊວງທີ່ກ່ຽວຂ້ອງຈຳນວນໜຶ່ງກໍ່ໄດ້ມີແຈ້ງການອອກໄປແລ້ວເປັນຕົ້ນ: ຫຼຸດຄ່ານ້ຳ, ຄ່າໄຟ, ຫຼຸດດອກເບ້ຍ ແລະ ນະໂຍບາຍອື່ນໆ.
