ລັດຖະບານຍັງສືບຕໍ່ອະນຸຍາດການລົງທຶນຕາມປົກກະຕິ, ພ້ອມທັງຊຸກຍູ້ໃຫ້ໂຄງການລົງທຶນຕ່າງໆດຳເນີນກິດຈະການຕໍ່ໄປໄດ້ທ່າມກາງການແຜ່ລະບາດຂອງພະຍາດໂຄວິດ-19 ຮອບໃໝ່ ແຕ່ຕ້ອງປະຕິບັດມາດຕະການຕ່າງໆຂອງພາກສ່ວນກ່ຽວຂ້ອງ ວາງອອກ.
ທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ (ຜທ) ໄດ້ລາຍງານເມື່ອບໍ່ດົນມານີ້ກ່ຽວກັບການຈັດຕັ້ງປະຕິບັດ ການອໍານວຍຄວາມສະດວກໃຫ້ນັກລົງທຶນທັງພາຍໃນ ແລະ ຕ່າງປະເທດ ໃນໄລຍະການແຜ່ລະບາດ ຂອງພະຍາດໂຄວິດ-19 ຮອບໃໝ່ນີ້ໃຫ້ຮູ້ວ່າ: ການຈັດຕັ້ງປະຕິບັດວຽກງານສົ່ງເສີມການລົງທຶນແມ່ນຍັງດໍາເນີນໄປຕາມກົນໄກປົກກະຕິ, ໄດ້ນໍາໃຊ້ລະບົບອອນລາຍ ເຂົ້າມາຊ່ວຍໃນການຈັດກອງປະຊຸມທາງໄກ ແລະ ຈໍາກັດຈໍານວນຜູ້ເຂົາຮ່ວມລົງເພື່ອຮັກສາໄລຍະຫ່າງ, ສ່ວນນະໂຍບາຍສະໜັບສະໜູນການລົງທຶນ ເລີ່ມຕັ້ງແຕ່ ຂັ້ນຕອນການອະນຸຍາດການລົງທຶນ, ໃບອະນຸຍາດການລົງທຶນ, ເອກະສານຂໍ້ຕົກລົງ, ໃບອະນຸຍາດນໍາເຂົ້າ ວັດຖຸອຸປະກອນ, ກົນຈັກ, ນະໂຍບາຍດ້ານວິຊາເຂົ້າ-ອອກປະເທດ ແລະ ການປະສານງານກັບຂະແໜງການຕ່າງໆແມ່ນ ຍັງຈັດຕັ້ງປະຕິບັດປົກກະຕິ.
ທ່ານຮອງລັດຖະມົນຕີກະຊວງ ຜທ ກ່າວອີກວ່າ: ເພື່ອສືບຕໍ່ຊຸກຍູ້ການດໍາເນີນທຸລະກິດ ກໍຄື ການອະນຸຍາດການລົງທຶນ ຢູ່ ສປປ ລາວ ໃຫ້ເປັນປົກກະຕິທາງກະຊວງ ຜທ ໄດ້ມີການຈັດຕັ້ງປະຕິ ບັດດັ່ງນີ້: ໄດ້ສືບຕໍ່ຊຸກຍູ້ໃຫ້ບັນດາວິສາຫະກິດຕ່າງໆ ໃຫ້ຈັດຕັ້ງປະຕິບັດຕາມຄໍາສັ່ງ ແລະ ແຈ້ງການຂອງ ພາກສ່ວນກ່ຽວຂ້ອງໄດ້ວາງອອກ, ພ້ອມທັງຊຸກຍູ້ໃຫ້ບັນດາວິສາຫະກິດດັ່ງກ່າວໃຫ້ສາມາດດໍາເນີນກິດຈະການຂອງຕົນເອງໄດ້ ເປັນຕົ້ນແມ່ນໂຄງການໄຟຟ້າ, ໂຄງການບໍ່ແຮ່, ໂຄງການ ທາງລົດໄຟ, ທາງດ່ວນ, ພ້ອມທັງອໍານວຍຄວາມສະດວກໃຫ້ນໍາເຂົ້າຊ່ຽວຊານ ແລະ ແຮງງານຕ່າງປະເທດ ເຂົ້າມາຮັບໃຊ້ໃນໂຄງການຕ່າງໆຕາມກໍານົດເວລາ ໂດຍໃຫ້ປະຕິບັດມາດຕະການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດ. ຜ່ານການຈັດຕັ້ງປະຕິບັດຕົວຈິງເຫັນວ່າ ວິສາຫະກິດຈໍານວນ ໜຶ່ງກໍໄດ້ຢຸດການເຄື່ອນໄຫວ ແລະ ປິດກິດຈະການຊົ່ວຄາວ, ແຕ່ກໍມີຈໍານວນໜຶ່ງ ສືບຕໍ່ດຳເນີນກິດຈະການ ເນື່ອງຈາກວ່າມີການຕິດພັນກັບສັນຍາຜູກພັນກັບຄູ່ຄ້າ ແຕ່ກໍໄດ້ປະຕິບັດມາດ ຕະການຕາມຄະນະສະເພາະກິດວາງອອກຢ່າງເຄັ່ງຄັດ.
ຂ່າວ-ພາບ: ສໍານານ
