ສະຖາບັນການແພດ ແລະ ການຢາພື້ນເມືອງ ກະຊວງສາທາລະນະສຸກ ໄດ້ຮ່ວມມືກັບບໍລິສັດ ກູນຕີວາ ຈໍາກັດ ໃນການກໍ່ສ້າງອາຄານຫ້ອງທົດລອງຄົ້ນຄວ້າ ວິໄຈຄົບຊຸດທີ່ຢັ້ງຢືນຄຸນນະພາບພືດທີ່ເປັນຢາ ແລະ ພືດເສດຖະກິດຂອງລາວທີ່ມີຄຸນນະພາບທຽບເທົ່າກັບຫ້ອງວິໄຈຂອງບັນດາປະເທດເພື່ອນບ້ານ ແລະ ສາກົນ. ຫ້ອງທົດລອງດັ່ງກ່າວນີ້ຈະຢັ້ງຢືນຄຸນນະພາບ ແລະ ຄວາມປອດໄພດ້ານພືດເປັນຢາ ແລະ ພືດເສດຖະກິດ ຕາມມາດຕະຖານຂອງພາກພື້ນ ແລະ ສາກົນ ແລະ ສາມາດກໍານົດເປັນ ມາດຕະຖານຂອງລາວ.
ພິທີເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມືສ້າງຫ້ອງທົດລອງດັ່ງກ່າວໄດ້ຈັດຂຶ້ນເມື່ອມໍ່ໆມານີ້ ທີ່ກະຊວງສາທາລະນະສຸກ, ເຊັນໂດຍທ່ານ ປອ.ດຣ ບຸນເລື່ອນ ດວງເດືອນ ຫົວໜ້າສະຖາບັນການແພດ ແລະ ການຢາພື້ນເມືອງ ແລະ ທ່ານ ພອນສະຫວັນ ຟາມ ປະທານບໍລິສັດ ກູນຕິວາ ຈໍາກັດ, ໂດຍເປັນກຽດເຂົ້າຮ່ວມເປັນສັກຂີພິຍານ ກິດຕິມະສັກ ມີ ທ່ານ ປອ.ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ.
ຂໍ້ມຸນ-ພາບ: ສູນຂ່າວສານການແພດ
