ສະມາຄົມສຽງແຄນລາວ, ບໍລິສັດ ລາວຈະເລີນສິນ ຈໍາກັດ ແລະ ສວນອາຫານມັງກອນທອງ ຮ່ວມມືກັນໃນການລົງທຶນຜະລິດ ແຄນ ແລະ ຈຳໜ່າຍແຄນລາວ

ສະມາຄົມສຽງແຄນລາວຊຶ່ງເປັນເຈົ້າຂອງລິຂະສິດແຄນໄດ້ເຊັນສັນຍາກັບບໍລິສັດລາວຈະເລີນສິນຈຳກັດ ແລະ ສວນອາຫານມັງກອນທອງ ເມື່ອວັນທີ່ 11 ມີນາ 2021 ທີ່ຜ່ານມາ ທີ່ບໍລິສັດ ລາວຈະເລີນສິນຈຳກັດ ນະຄອນຫຼວງວຽງຈັນ ໃນການຮ່ວມມືກັນກຽ່ວກັບໂຄງການຮ່ວມມືຜະລິດ ແລະ ຈຳໜ່າຍ ຜະລິດຕະພັນແຄນລາວ ໂດຍການເຂົ້າຮ່ວມຂອງທ່ານ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂຄສົກລັດຖະບານ, ປະທານກິດຕິມະສັກສະມາຄົມສຽງແຄນລາວ.
ທ່ານ ຄຳພັນ ເໝືອນສິດທິດາ ປະທານສະມາຄົມສຽງແຄນລາວໄດ້ກ່າວໃນພິທີດັ່ງກ່າວວ່າ: ໂຄງການດັ່ງກ່າວນີ້ແມ່ນເພື່ອສົ່ງເສີມແຄນລາວ ແລະ ສຽງແຄນລາວຊຶ່ງເປັນດົນຕີປະຈໍາຊາດລາວໃຫ້ເປັນທີ່ເອກອ້າງສົມກັບເປັນມໍລະດົກໂລກທັງເປັນການສົ່ງເສີມດົນຕີພື້ນເມືອງລາວ ຊຶ່ງສຽງແຄນເປັນສິລະປະວັດທະນະທໍາລາວທີ່ຕິດພັນກັບການທ່ອງທ່ຽວເພື່ອໃຫ້ທົ່ວສັງຄົມໄດ້ຮັບຮູ້ ແລະ ຊົມໃຊ້ແຄນລາວຢ່າງກວ້າງຂວາງທັງເປັນການໃຫ້ນັກທ່ອງທ່ຽວພາຍໃນ ແລະ ຕ່າງປະເທດໄດ້ຮັບຮູ້ຄວາມເປັນເອກະລັກຂອງແຄນທີ່ເປັນດົນຕີພື້ນເມືອງລາວ ແລະ ອື່ນໆ.

ຂ່າວ: ວັນເພັງ

ພາບ: ຍຸພິນທອງ