ວິຊາການພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງສະຫວັນນະເຂດ ຮ່ວມກັບກຸ່ມບໍລິສັດທ່ອງທ່ຽວໄດ້ລົງສໍາຫຼວດແຫຼ່ງທ່ອງທ່ຽວຫຼາຍແຫ່ງເມື່ອບໍ່ດົນມານີ້ ໂດຍສະເພາະຖໍ້າໂຫດຫ້ຽວ ເມືອງພະລານໄຊ, ຕາດສະໂຄຍ, ວັດພຣະໃຫຍ່, ຕູ້ຄັງເງິນສະໄໝສົງຄາມຝຣັ່ງ ແລະ ຕາດສະດີ ຢູ່ເມືອງເຊໂປນເພື່ອກຽມພັດທະນາພື້ນຖານໂຄງລ່າງໃນອະນາຄົດ.
ທ່ານ ປອ ໂພໄຊ ສິດທິຊົນ ຕາງໜ້າພະແນກ ຖວທ ແຂວງສະຫວັນນະເຂດ ໄດ້ກ່າວກ່ຽວກັບການລົງສໍາຫຼວດແຫຼ່ງທ່ອງທ່ຽວໃນຄັ້ງນີ້ວ່າ: ບັນດາແຫຼ່ງທ່ອງທ່ຽວດັ່ງກ່າວເປັນແຫຼ່ງທ່ອງທ່ຽວທີ່ສວຍງາມແຕ່ການເຂົ້າຫາແຫຼ່ງທ່ອງທ່ຽວນັ້ນຍັງມີຄວາມຫຍຸ້ງຍາກຍ້ອນສະພາບເສັ້ນທາງທີ່ບໍ່ໄດ້ຮັບການພັດທະນາ, ບໍ່ມີຈຸດພັກລົດ ແລະ ອື່ນໆ. ພາຍຫຼັງທີ່ລົງສໍາຫຼວດເກັບກໍາຂໍ້ມູນໃນຄັ້ງນີ້ຈະໄດ້ມີການປຶກສາຫາລືກັນລະຫວ່າງພະແນກ ຖວທ ແລະ ບໍລິສັດທ່ອງທ່ຽວທີ່ມີຄວາມສົນໃຈໃນການລົງທຶນພັດທະນາ ຫຼື ສໍາປະທານແຫຼ່ງທ່ອງທ່ຽວໃດໜຶ່ງເພື່ອນໍາໄປສູ່ການພັດທະນາເປັນແຫຼ່ງທ່ອງທ່ຽວທີ່ສວຍງາມເພື່ອດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ໃນຍຸກລາວທ່ຽວລາວ ຫຼື ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ຊຶ່ງຍັງບໍ່ສາມາດເວົ້າໄດ້ວ່າພະຍາດດັ່ງກ່າວນີ້ຈະສິ້ນສຸດມື້ໃດ.
ຂໍ້ມູນ: ຖວທ ແຂວງສະຫວັນນະເຂດ
