ອໍານາດການປົກຄອງ ເມືອງສັງທອງ ໃຫ້ຮູ້ວ່າ: 6 ສະຖານທ່ອງທ່ຽວແຫ່ງໃໝ່ຢູ່ເມືອງສັງທອງ ປະກອບມີສະຖານທີ່ພັກສະເດັດສຸພານຸວົງ ທີ່ຜູ້ນໍາລາວຈຳນວນ 16 ທ່ານໂຕນອອກຈາກຄຸກໂພນເຄັງແລ້ວໄປພັກຢູ່ສາຍພູພະນັງເຂດບ້ານທ່ານາຂາມໃນເມື່ອກ່ອນ, ທີ່ຕັ້ງຂອງກອງຮ້ອຍຟ້າງຸ່ມ (ບ້ານຫີນສີ່ວ), ອະນຸສອນສະຖານວິລະຊົນສີທອງ, ເຂດດົງປ່າແຕ້-ປ່າແຄນ ຕິດພັນກັບການທ່ອງທ່ຽວຕາມສາຍນໍ້າສັງ, ເຂດດອນເຈົ້າ ແລະ ຄ້ອຍແລນມານ (ພັດທະນາເປັນຈຸດຊົມວີວ, ຈຸດພັກລົດ ແລະ ບໍລິການອາຫານ) ຕ້ອງການໃຫ້ນັກລົງທຶນລາວ ແລະ ຕ່າງປະເທດຜູ້ທີ່ສົນໃຈລົງທຶນພັດທະນາ .
ທ່ານ ພົງສະຫວັນ ສິລິພັນ ເຈົ້າເມືອງສັງທອງ ໃຫ້ກ່າວເມື່ອບໍ່ດົນມານີ້ວ່າ: 6 ສະຖານທີ່ແຫຼ່ງທ່ອງທ່ຽວດັ່ງກ່າວ ເປັນແຫຼ່ງທ່ອງທ່ຽວໃໝ່ທີ່ຍັງບໍ່ມີການພັດທະນາ, ປັດຈຸບັນນີ້ຍັງຢູ່ໃນຂັ້ນຕອນສະເໜີ ຫຼື ແຈ້ງການເຖິງຄວາມຕ້ອງການອໍານາດການປົກຄອງເມືອງສັງທອງ ທີ່ຕ້ອງການໃຫ້ນັກລົງທຶນທີ່ມີຄວາມສົນໃຈຢາກພັດທະນາເປັນແຫຼ່ງທ່ອງທ່ຽວໃດໜຶ່ງໃຫ້ຮັບຮູ້ ແລະ ຖ້ານັກລົງທຶນມີຄວາມສົນໃຈສາມາດພົວພັນໄດ້ ທີ່ອົງການປົກຄອງເມືອງສັງທອງ ເຊື່ອວ່າຖ້າແຫຼ່ງທ່ອງທ່ຽວດັ່ງກ່າວໄດ້ຮັບການພັດທະນາຈະສາມາດດຶງດູດນັກທ່ອງທ່ຽວໄດ້ແນ່ນອນເພາະເມືອງສັງທອງແມ່ນບໍ່ໄກຈາກຕົວເມືອງນະຄອນຫຼວງວຽງຈັນ ນອກນັ້ນເສັ້ນທາງກໍ່ສະດວກສະບາຍຕາມສາຍທາງເລກທີ 11 (ເລາະແຄມຂອງ) ແລະ ມີຄວາມງາມຂອງທໍາມະຊາດຕະຫຼອດສອງຟາກທາງນັບແຕ່ເມືອງສີໂຄດຕະບອງ ຫາເມືອງສັງທອງ.
ຂ່າວ: ບຸນຕຽງ
ພາບ: ປ໋ອງ
