ສຸກພະໄຊ ສິດທິສານ, ນັກກິລາຢູໂດ ໜຶ່ງດຽວທີມຊາດລາວ ຊຶ່ງຢູ່ອັນດັບທີ 105 ຂອງໂລກ (ຮຸ່ນນ້ຳໜັກ -60 ກິໂລ) ພ້ອມດ້ວຍນັກກິລາທີມຊາດລາວ ອີກ 5 ຄົນ ຄື: ລອຍ ນ້ຳ 2 ຄົນ, ແລ່ນ-ລານ 2 ຄົນ ແລະ ມວຍສາກົນ 1 ຄົນ ຈະເຂົ້າຮ່ວມແຂ່ງຂັນໃນງານມະຫະກຳກິລາໂອລິມປິກ 2020 ທີ່ນະຄອນຫຼວງໂຕກຽວ ປະເທດຍີ່ປຸ່ນ ທີ່ເລື່ອນ ມາແຂ່ງຂັນໃນປີ 2021 ຍ້ອນການແຜ່ລະບາດຂອງ ພະຍາດໂຄວິດ-19, ຊຶ່ງການແຂ່ງຂັນງານມະຫະກໍາກິລາ ດັ່ງກ່າວ ຈະເລີ່ມໃນວັນທີ 23 ກໍລະກົດ ນີ້.
ສຸກພະໄຊ ສິດທິສານ ໄດ້ໂຄຕາເຂົ້າຮ່ວມການແຂ່ງຂັນ ໃນ ງານມະຫະກຳກິລາໂອລິມປິກ ເປັນຄັ້ງທີ 2 ຕິດຕໍ່ກັນ ຫຼັງຈາກທີ່ຜູ້ກ່ຽວເຄີຍຄວ້າໂຄຕາໄປແຂ່ງໃນງານມະຫະກຳກິລາໂອລິມປິກ ຄັ້ງທີ່ຜ່ານມາ ທີ່ປະເທດເບຣຊິນ ປີ 2016.
ປະຈຸບັນ, ສຸກພະໄຊ ສິດທິສານ ອາຍຸ 25 ປີ ເກີດທີ່ ແຂວງສະຫວັນນະເຂດ ໄດ້ເລີ່ມເດີນທາງໄປແຂ່ງຂັນ ເກັບຄະແນນໃນທົ່ວໂລກ ຕັ້ງແຕ່ປີ 2017 ເປັນຕົ້ນມາ (ຫຼັງຈາກມະຫະກຳກິລາໂອລິມປິກຄັ້ງກ່ອນ) ຈົນມາ ຮອດ ປີ 2021 ມີຄະແນນສະສົມ 318 ຄະແນນ ຊຶ່ງ ສຸກພະໄຊ ສິດທິສານ ຈະລົງແຂ່ງຂັນໃນ ຮຸ່ນ-60 ກິໂລ ໃນວັນທີ 24 ກໍລະກົດ 2021 ນີ້.
ຂໍ້ມູນ: ສະຫະພັນຢູໂດ
