Vientiane Times Lao
ຮອງນາຍົກແນະນຳໃຫ້ເມືອງວັງວຽງຕ້ອງ ເພີ່ມຄວາມສະເໜ່ເພື່ອດຶງດູດການທ່ອງທ່ຽວ

ຮອງນາຍົກແນະນຳໃຫ້ເມືອງວັງວຽງຕ້ອງ ເພີ່ມຄວາມສະເໜ່ເພື່ອດຶງດູດການທ່ອງທ່ຽວ

ຮອງນາຍົກລັດຖະມົນຕີໄດ້ຊີ້ນຳອໍານາດການປົກຄອງເມືອງວັງວຽງ ແຂວງວຽງຈັນ ໃຫ້ເອົາໃຈໃສ່ ໃນການປັບປຸງຕົວເມືອງໃຫ້ມີມົນສະເໜ່ຫຼາຍຂຶ້ນເພື່ອດຶງດູດນັກທ່ອງທ່ຽວ.

ໃນໄລຍະທີ່ ທ່ານ ປອ. ບຸນທອງ ຈິດມະນີ ຮອງນາຍົກລັດຖະມົນຕີ ໄດ້ໄປຢ້ຽມຢາມ ເມືອງວັງວຽງ ແລະ ໄດ້ມີໂອກາດໂອ້ລົມພະນັກງານຫຼັກແຫຼ່ງ ໃນມື້ວານນີ້ ວັນທີ 16 ມັງກອນ 2020 ນີ້, ທ່ານໄດ້ແນະນຳໃຫ້ອົງການປົກຄອງທ້ອງຖິ່ນເອົາໃຈໃສ່ພັດທະນາ ແລະ ປັບປຸງຕົວເມືອງໃຫ້ ຈັບ ອົກຈັບໃຈແກ່ນັກທ່ອງທ່ຽວ, ພັດທະນາແຫຼ່ງ ທ່ອງທ່ຽວໃຫ້ດຶງດູດໃຈ, ຮັບປະກັນຄວາມປອດ ໄພແກ່ນັກທ່ອງທ່ຽວ ຄຽງຄູ່ກັນນີ້ກໍ່ຕ້ອງພັດ ທະນາບຸກຄະລາກອນທ່ອງທ່ຽວ ລວມທັງ ບໍລິສັດທ່ອງທ່ຽວໃຫ້ມີຄຸນນະພາບສາມາດ ຮອງຮັບນັກທ່ອງທ່ຽວແຕ່ລະປະເທດ.

ນອກຈາກນັ້ນ ທ່ານ ຮອງນາຍົກຍັງໄດ້ຊີ້ນຳການ ກໍ່ສ້າງທາງລົດໄຟ ລາວ-ຈີນ, ທາງດ່ວນວຽງ ຈັນ-ວັງວຽງ ໃຫ້ຄະນະຮັບຜິດຊອບສືບຕໍ່ ແກ້ໄຂຈຸດທີ່ຍັງຄ້າງຄາໃຫ້ສໍາເລັດ ເພື່ອອໍານວຍ ຄວາມສະດວກໃຫ້ການກໍ່ສ້າງທັງສອງເສັ້ນໃຫ້ສໍາເລັດຕາມກໍານົດເວລາ.

ທ່ານ ຍັງຊີ້ນຳ ສາມວຽກໃຫຍ່ຕໍ່ ກັບການ ກະກຽມກອງປະຊຸມ 3 ຂັ້ນ ຂອງເມືອງຄື: ໜຶ່ງ ວຽກງານຊຸກຍູ້ ຂະບວນການແມ່ນ ໃຫ້ຕິດພັນ ກັບຂະບວນການແຂ່ງຂັນຮັກຊາດ ແລະ ພັດທະນາ ແລະ ວຽກງານສາມສ້າງໃຫ້ຄຽງ ຄູ່ກັນໄປ ໂດຍສະເພາະແມ່ນການແຂ່ງຂັນ ລົບລ້າງຄວາມທຸກຍາກຂອງປະຊາຊົນ, ສໍາລັບ ສໍານັກງານອົງການແມ່ນ ສ້າງຂະບວນການ ປະຕິບັດລະບຽບກົດໝາຍ, ການແຂ່ງຂັນກັນ ປະຕິບັດໜ້າທີ່ ວິຊາສະເພາະ ແລະ ຄາດໝາຍ ສູ້ຊົນຕ່າງໆ.

ສອງ ດ້ານເນື້ອໃນຕ້ອງກະກຽມບົດລາຍງານ ການເມືອງ, ແຜນພັດທະນາເສດຖະກິດ-ສັງຄົມ, ບົດສຳຫຼວດການນຳພາລວມຂອງຄະນະພັກຕ້ອງຕີລາຄາໃຫ້ຖືກຕ້ອງ ເພື່ອຊອກໃຫ້ເຫັນທ່າແຮງ ທີ່ບົ່ມຊ້ອນ ແລະ ວາງທິດທາງໃນການພັດທະນາ ຕໍ່ໜ້າໃຫ້ແທດເໝາະກັບຕົວຈິງກັບທ່າແຮງແຕ່ ລະຂົງເຂດກໍ່ຄືຂອງເມືອງ.

ສາມ ການກະກຽມບຸກຄະລາກອນຕ້ອງ ໄດ້ມີ ການດຳເນີນຊີວິດການເມືອງ ສຳຫຼວດກວດ ກາສະມາຊິກພັກ, ພະນັກງານໃຫ້ເລິກເຊິ່ງ ຕິດພັນກັບຄວາມຮັບຜິດຊອບຂອງສະມາຊິກ ພັກແຕ່ລະສະຫາຍ; ຮັບປະກັນທາງດ້ານມາດ ຖານ, ເງື່ອນໄຂ ແລະ ປະຕິບັດຕາມທິດຫັນ ເປັນໜຸ່ມ, ເພດ, ເຜົ່າ ໃຫ້ສົມສ່ວນໃນແຕ່ລະ ຂົງເຂດວຽກງານ.

ໂອກາດນີ້ ທ່ານ ປອ. ບຸນທອງ ຮອງນາຍົກລັດ ຖະມົນຕີ ພ້ອມຄະນະຍັງໄດ້ໄປຢ້ຽມຊົມສະຖານ ທີ່ທ່ອງທ່ຽວຂອງເມືອງວັງວຽງຄື: ຖໍ້າປູຄໍາ, ຖໍ້າ ນາງຟ້າ ແລະ ລົງຕິດຕາມເບິງໂຄງການກໍ່ສ້າງ ຂົວຂ້າມນໍ້າຊອງແຫ່ງໃໝ່ ເພື່ອອໍານວຍຄວາມສະ ດວກໃຫ້ປະຊາຊົນ ແລະ ນັກທ່ອງທ່ຽວ.

ຂ່າວ: ວຽງຈັນທາຍ

ພາບ: ພູນຊັບ

Related Articles

Leave a Reply