ອຳນາດການປົກຄອງເມືອງທ່າໂທມ ແຂວງໄຊສົມບູນ ໄດ້ປະກາດ 3 ບ້ານເປັນບ້ານພັດທະນາ ປະຈຳປີ 2021 ຄື: ບ້ານນາຫ້ອງ, ບ້ານໂພນຮົ່ມ ແລະ ບ້ານວັງໄຮ ເມື່ອບໍ່ດົນມານີ້ ໂດຍການເຂົ້າຮ່ວມຂອງທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພອນຄຳ ສີສຸພັນ ເລຂາພັກບ້ານວັງໄຮ ຕາງໜ້າໃຫ້ອົງການປົກຄອງບ້ານ ແລະ ປະຊາຊົນ 3 ບ້ານດັ່ງກ່າວ ລາຍງານວ່າ: ທັງ 3 ບ້ານມີພົນລະເມືອງ 2.800, ຍິງ 1.400 ກວ່າຄົນ, ມີ 487 ຫຼັງຄາເຮືອນ ແລະ 490 ຄອບຄົວຊຶ່ງມີ 3 ຊົນເຜົ່າອາໄສຢູ່ຮ່ວມກັນ ໂດຍການຍຶດຖືອາຊີບປູກຝັງ-ລ້ຽງສັດ ແລະ ຄ້າຂາຍ ໃນນັ້ນເນື້ອທີ່ນາມີ 330 ກວ່າເຮັກຕາ, ປະຊາຊົນໄດ້ຮັບຜົນຜະລິດເຂົ້າສະເລ່ຍ 393 ກິໂລຕໍ່ຄົນຕໍ່ປີ ຊຶ່ງເຮັດໃຫ້ຊິວິດປະຊາຊົນດີຂຶ້ນເລື້ອຍໆ.
ການສ້າງບ້ານພັດທະນາແມ່ນໄດ້ປະຕິບັດຕາມມະຕິຕົກລົງຂອງກົມການເມືອງສູນກາງພັກສະບັບເລກທີ່ 03 ວ່າດ້ວຍການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ, ເມືອງທ່າໂທມແມ່ນໄດ້ຕົກລົງເອົາ 3 ບ້ານດັ່ງກ່າວເປັນບ້ານເປົ້າໝາຍສ້າງບ້ານພັດທະນານັບແຕ່ປີ 2016 ເປັນຕົ້ນມາ ໂດຍປະຕິບັດຕາມ ມາດຖານ, ເງື່ອນໄຂ, ຕາມ 7 ຂັ້ນຕອນ, ເປັນຕົ້ນແມ່ນວຽກງານດ້ານຂະແໜງການອື່ນໆຂອງບ້ານກໍ່ໄດ້ຮັບການພັດທະນາທີ່ດີຂື້ນຈົນສາມາດປະກາດເປັນບ້ານພັດທະນາໄດ້ໃນປີ 2021 ນີ້.
ໃນໂອກາດດັ່ງກ່າວ ທ່ານ ພົນຕີ ຄຳລຽງ ອຸທະໄກສອນ ໄດ້ສະແດງຄວາມຍ້ອງຍໍຊົມເຊີຍຕໍ່ການນຳເມືອງ, ບ້ານ ແລະ ພໍ່ແມ່ປະຊາຊົນ ທີ່ຍາດໄດ້ຜົນງານອັນໃຫຍ່ຫຼວງ ພ້ອມກັນນັ້ນ ທ່ານ ຍັງໄດ້ເນັ້ນ ໃຫ້ມີການສຶກສາອົບຮົມທາງດ້ານການເມືອງແນວຄິດໃຫ້ປະຊາຊົນ, ເອົາໃຈໃສ່ວຽກງານປ້ອງກັນຊາດປ້ອງກັນຄວາມສະຫງົບໃຫ້ເຂັ້ມແຂງ, ປັບປຸງລະບົບການເມືອງຮາກຖານບ້ານ, ເພີ່ມທະວີຄວາມສາມັກຄີທັງພາຍໃນ ແລະ ພາຍນອກໃຫ້ກວ້າງຂວາງ, ພ້ອມທັງປົກປັກຮັກສາມູນເຊຶື້້ອບ້ານພັດທະນາທີ່ໄດ້ປະກາດໄປແລ້ວນັ້ນໃຫ້ມີຄວາມຍືນຍົງຕະຫຼອດໄປ.
ຂ່າວ: ພູເງິນ
