ອໍານາດການປົກຄອງ ເມືອງໄຊຍະບູລີ ແຂວງໄຊຍະບູລີ ໄດ້ຈັດພິທີປະກາດ 14 ຫ້ອງ ການເປັນກົມກອງວັດທະນະທຳ ເມື່ອບໍ່ດົນມານີ້ ທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານ ຂອງທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ ແຂວງໄຊຍະບູລີ.
ທ່ານ ຂັນທອງ ວິໄລສັກ ຮອງຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ໄດ້ກ່າວໃນພິທີດັ່ງກ່າວວ່າ: ເມືອງໄຊຍະບູລີ ມີກົມກອງທັງໝົດ 29 ກົມກອງ ຊຶ່ງເຄື່ອນໄຫວຢູ່ພາຍໃຕ້ການຊີ້ນໍາ-ນໍາພາໂດຍກົງຂອງອົງຄະນະພັກເມືອງ. ກ່ອນທີ່ຈະປະກາດ 14 ຫ້ອງການຂຶ້ນເປັນກົມກອງວັດທະນະທຳໄດ້ປະຕິບັດທັງໝົດຕາມ 5 ບາດກ້າວ, ຜ່ານການປະເມີນຕາມ 6 ມາດຖານໃນການ ສ້າງຄົນ, 4 ມາດຖານໃນການສ້າງກົມກອງວັດທະນະທໍາແມ່ນເຫັນວ່າ 14 ກົມກອງ ແມ່ນຄົບຕາມເງື່ອນໄຂມາດຖານຄົບຖ້ວນຊຶ່ງປະກອບມີ: ຫ້ອງການຄະນະໂຄສະນາອົບຮົມເມືອງ, ຫ້ອງການຄະນະຊາວໜຸ່ມປະຊາຊົນປະຕິວັດລາວເມືອງ, ຫ້ອງການສະຫະພັນແມ່ຍິງເມືອງ, ຫ້ອງການສະຫະພັນນັກຮົບເກົ່າເມືອງ, ຫ້ອງການສາທາລະນະສຸກເມືອງ, ຫ້ອງການແຮງງານ ແລະ ສະຫວັດດີການສັງຄົມເມືອງ, ອົງການກາແດງເມືອງ, ຫ້ອງການກະສິກຳ ແລະ ປ່າໄມ້ເມືອງ, ຫ້ອງການວິທະຍາສາດ ແລະ ເຕັກໂນໂລຊີເມືອງ, ຫ້ອງການພະລັງງານ ແລະ ບໍ່ແຮ່ເມືອງ, ຫ້ອງການໄປສະນີ, ໂທລະຄົມມະນາຄົມ ແລະ ການສື່ສານເມືອງ, ສານປະຊາຊົນເຂດ I ແຂວງໄຊຍະບູລີ, ອົງການໄອຍະການປະຊາຊົນເຂດ I ແຂວງໄຊຍະບູລີ ແລະ ກອງບັນຊາການ ປກສ ເມືອງ.
ຂ່າວ-ພາບ: ສົມພົງ ສີສະຫັວດ
