Vientiane Times Lao
ແຂວງຫຼວງພະບາງ ຕັ້ງເປົ້າບໍລິຈາກເລືອດໃຫ້ໄດ້ 4.800 ຖົງເພື່ອຊ່ວຍຄົນເຈັບປີນີ້

ແຂວງຫຼວງພະບາງ ຕັ້ງເປົ້າບໍລິຈາກເລືອດໃຫ້ໄດ້ 4.800 ຖົງເພື່ອຊ່ວຍຄົນເຈັບປີນີ້

ທ່ານ ດຣ ວຽງສະຫວັນ ກະເສີມສຸກ ຫົວໜ້າອົງການກາແດງລາວ ແຂວງຫຼວງພະບາງໄດ້ໃຫ້ສໍາພາດຕໍ່ນັກຂ່າວແຂວງ ເມື່ອບໍ່ດົນມານີ້ວ່າ: ໃນທຸກໆປີຢູ່ບັນດາປະເທດຕ່າງໆໃນທົ່ວໂລກໄດ້ພ້ອມກັນສະເຫຼີມສະຫຼອງວັນບໍລິຈາກເລືອດໂລກ (14 ມິຖຸນາ) ເພື່ອເປັນການສະແດງຄວາມຂອບໃຈ ຕໍ່ຜູ້ ບໍລິຈາກເລືອດດ້ວຍຄວາມສະໝັກໃຈເພື່ອຊ່ວຍຄົນເຈັບ ເປັນຂອງຂວັນທີ່ມີຄ່າທີ່ສຸດຕໍ່ຊີວິດ ຊຶ່ງຜະລິດ ຕະພັນເລືອດທີ່ໄດ້ຮັບບໍລິຈາກໃນແຕ່ລະປີ ຢູ່ທົ່ວໂລກສາມາດຊ່ວຍຊີວິດຄົນເຈັບໄດ້ນັບລ້ານ.

ສໍາລັບ ສປປ ລາວ ຕາມສະຖີຕິປີ 2020 ໄດ້ຮັບບໍລິຈາກເລືອດທັງໝົດ 60.358 ຖົງ, ສະເພາະແຂວງຫຼວງພະບາງ ໄດ້ຮັບບໍລິຈາກເລືອດ ທັງໝົດ 4.587 ຖົງ ໃນນີ້ 90% ຂອງການບໍລິຈາກເລືອດທັງໝົດແມ່ນບໍລິຈາກດ້ວຍຄວາມສະໝັກໃຈ ບໍ່ຮຽກຮ້ອງສິ່ງຕອບແທນ ແລະ 10% ແມ່ນມາຈາກການບໍລິຈາກເລືອດແບບພີ່ນ້ອງ ທົດແທນ ແລະ  ປີນີ້ ການບໍລິຈາກເລືອດ ຢູ່ແຂວງ ຫຼວງພະບາງ ຄາດວ່າຈະໄດ້ 4.800 ຖົງ ເພື່ອຊ່ວຍ ຄົນເຈັບ.

ທ່ານ ດຣ ວຽງສະຫວັນ ກະເສີມສຸກ ຍັງໄດ້ກ່າວອີກວ່າ: ໃນໂອກາດສະເຫຼີມສະຫຼອງວັນບໍລິຈາກເລືອດໂລກ ທີ່ໄດ້ໝູນວຽນມາອີກຄັ້ງໜຶ່ງ, ອົງການກາແດງລາວ ແຂວງຫຼວງພະບາງ ຂໍເຊີນຊວນໃຫ້ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນນັກສຶກສາ, ພໍ່ຄ້າຊາວຂາຍ ຕະຫຼອດຮອດພໍ່ແມ່ປະຊາຊົນທົ່ວແຂວງຫຼວງພະບາງ ຜູ້ທີ່ມີເງື່ອນໄຂ ອາຍຸ 17-60 ປີ ມີນໍ້າໜັກແຕ່ 45 ກິໂລຂຶ້ນໄປ ຢູ່ໃນໄລຍະທີ່ມີສຸຂະພາບແຂງແຮງດີ ໄປຮ່ວມບໍລິຈາກເລືອດທີ່ສູນເລືອດ ແຂວງຫຼວງພະບາງ ໄດ້ທຸກເວລາ.

ສໍາລັບກິດຈະກໍາສະເຫຼີມສະຫຼອງວັນຜູ້ບໍລິຈາກເລືອດໂລກປີນີ້ ທາງສູນເລືອດອົງການກາແດງລາວ ຫຼວງພະບາງ ຈະໄດ້ຈັດຂຶ້ນໃນວັນທີ 14 ມິຖຸນາ 2021 ນີ້ ຢູ່ເດີ່ນຫ້ອງການຊາວໜຸ່ມ ແຂວງຫຼວງພະບາງ ພາຍໃຕ້ຫົວຂໍ້ ໃຫ້ເລືອດເພື່ອຕໍ່ລົມຫາຍໃຈໃຫ້ເພື່ອນຮ່ວມໂລກ ເລີ່ມແຕ່ ເວລາ 8:00 ໂມງ ຈົນເຖິງ 16:00 ໂມງ.

ຂໍ້ມູນຂ່າວ: ສີສຸວັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ