ເຈົ້າໜ້າທີ່ກອງບັນຊາການປ້ອງກັນຄວາມສະຫງົບ (ປກສ) ແຂວງ ຫຼວງນໍ້າທາ ແລະ ພາກສ່ວນທີ່ກ່ຽວຂ້ອງ ໄດ້ລົງເຄື່ອນໄຫວກວດພົບ ແລະ ທໍາລາຍສວນຝິ່ນທີ່ລັກລອບປູກຂອງປະຊາຊົນ ໃນເນື້ອທີ່ເກືອບ 40 ເຮັກຕາ.
ທ່ານ ພັທ ອາລຸນຍະເດດ ບົວສີສະຫວັດ ຫົວໜ້າພະແນກກວດກາ ແລະ ຄວບຄຸມຢາເສບຕິດ ປກສ ແຂວງ ຫຼວງນໍ້າທາ ໃຫ້ຮູ້ວ່າ: ນັບແຕ່ຕົ້ນເດືອນມັງກອນ ຫາ ເດືອນກຸມພາ 2021, ເຈົ້າໜ້າທີ່ ໄດ້ລົງເຄື່ອນໄຫວກວດພົບ ແລະ ທໍາລາຍສວນຝິ່ນທີ່ລັກລອບປູກຂອງປະຊາຊົນ ໃນຂອບເຂດ 5 ເມືອງ ຊຶ່ງປະກອບມີ: ເມືອງວຽງຄໍາ ມີປະຊາຊົນປູກຝິ່ນ 5 ບ້ານ, ເມືອງສິງ ມີປະຊາຊົນປູກຝິ່ນ 2 ບ້ານ, ເມືອງນາແລ ມີປະຊາຊົນປູກຝິ່ນ 2 ບ້ານ, ເມືອງລອງ ມີປະຊາຊົນປູກຝິ່ນ 16 ບ້ານ, ເມືອງຫຼວງນໍ້າທາ ມີປະຊາຊົນປູກຝິ່ນ 3 ບ້ານ ຊື່ງລວມເນື້ອທີ່ເກືອບ 40 ເຮັກຕາ.
ໃນການລົງທຳລາຍສວນຝິ່ນຄັ້ງນີ້, ເຈົ້າໜ້າທີ່ ຍັງໄດ້ສຶກສາອົບຮົມ ແລະ ກ່າວເຕືອນຜູ້ທີ່ເປັນເຈົ້າຂອງສວນຝິ່ນ ພ້ອມທັງສ້າງບົດບັນທຶກຢຸດເຊົາ ແລະ ອະທິບາຍໃຫ້ຮູ້ລະບຽບກົດໝາຍ ເພື່ອບໍ່ໃຫ້ມີການລັກລອບປູກຝິ່ນຕື່ມອີກ ແລະ ສົ່ງເສີມໃຫ້ພໍ່ແມ່ປະຊາຊົນບັນດາເຜົ່າຢຸດປູກຝິ່ນ, ພ້ອມກັນຫັນມາປູກຝັງ-ລ້ຽງສັດໃຫ້ກາຍເປັນສິນຄ້າ ເພື່ອສ້າງລາຍໄດ້ໃຫ້ຄອບຄົວຢ່າງ ຖືກຕ້ອງຕາມລະບຽບກົດໝາຍ ຂອງ ສປປ ລາວ.
ຂໍ້ມູນ: ປກສ
