ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ກຽມໂຮມຊຸມນຸມເພື່ອສະເຫຼີມສະຫຼອງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 70 ປິ (13 ສິງຫາ 1950-13 ສິງຫາ 2020, ໃນວັນທີ 14 ສິງຫາ 2020 ທີ່ຈະມາເຖິງນີ້ຢູ່ຫໍວັດທະນະທໍາແຫ່ງຊາດ, ໂດຍການເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.
ພິທີໂຮມຊຸມນຸມດັ່ງກ່າວ ຈະມີຫຼາຍກິດຈະກໍາ ເປັນຕົ້ນແມ່ນ ການລາຍງານມູນເຊື້ອ ແລະ ຜົນງານທີ່ພົ້ນເດັ່ນຂອງສື່ມວນຊົນ ແລະ ການພິມຈໍາໜ່າຍ, ນອກນັ້ນຍັງຈະມີການມອບລາງວັນ ໃຫ້ອົງການສື່ມວນຊົນ ແລະ ການພິມຈໍາໜ່າຍ ທີ່ປະກອບສ່ວນວຽກງານກ່ຽວກັບການມີສ່ວນຮ່ວມຕ້ານໄພພິບັດລະດັບຊາດ (ອຸປະຕິເຫດເຂື່ອນແຕກ, ໄພນໍ້າຖ້ວມ ແລະ ພະຍາດໂຄວິດ-19 ແລະ ໄພທໍາມະຊາດອື່ນໆ), ພ້ອມທັງຈະມີງານວາງສະແດງຜົນງານສື່ມວນຊົນ ແລະ ການພິມຈໍາໜ່າຍ ທັງພາກລັດ ແລະ ເອກກະຊົນ.
ຕະຫຼອດໄລຍະ 70 ປີ ຜ່ານມາ, ວຽກງານສື່ມວນຊົນໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວເປັນກ້າວໆມາ, ຊຶ່ງຮອດປັດຈຸບັນນີ້ມີສື່ສິ່ງພິມທັງໝົດຫຼາຍກວ່າ 100 ສະບັບ, ໃນນັ້ນມີໜັງສືພິມ 10 ກວ່າສະບັບ, ເປັນລາຍວັນ 11 ສະບັບ (ມີທັງພາສາລາວ, ອັງກິດ) ມີວາລະສານທັງໝົດ 100 ສະບັບ ນັບທັງຂອງລັດ ແລະ ເອກະຊົນຢູ່ສູນກາງ ແລະ ທອ້ງຖິ່ນ.
ຂ່າວ: ວຽງຈັນທາຍ
