ອີງຕາມຂໍ້ມູນຈາກສະຖານທູດຈີນໃຫ້ຮູ້ວ່າ: ຍັງມີບາງປະເທດນອກພາກພື້ນຍັງບໍ່ສົນຕໍ່ຄວາມ ພະຍາຍາມຮ່ວມກັນຂອງບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງໂດຍມີການເຜີຍແຜ່ຂ່າວປອມເຊັ່ນວ່າ: ຈີນຄວບຄຸມເຂື່ອນກັ້ນນ້ຳຢູ່ຍ່ານເໜືອແມ່ນ້ຳຂອງແຕ່ພຽງຝ່າຍດຽວ ອັນໄດ້ເຮັດໃຫ້ ເກີດໄພພິບັດຢູ່ປະເທດລຸ່ມແມ່ນ້ຳຂອງຮຸນແຮງຂຶ້ນ ແລະ ອື່ນໆ, ການປ່ອຍຂ່າວດັ່ງກ່າວ ແມ່ນ ເພື່ອເຈດຕະນາບິດເບືອນຄວາມຈິງ, ຍຸແຍ່ການພົວພັນລະຫວ່າງປະເທດ ແມ່ນ້ຳລ້ານຊ້າງ-ແມ່ນ້ຳຂອງ, ກໍ່ກວນຂະບວນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ.
ຫຼ້າສຸດຝ່າຍຈີນໄດ້ໃຫ້ຄວາມຮູ້ພື້ນຖານຈຳນວນໜຶ່ງເພື່ອໃຫ້ສັງຄົມຮັບຮູ້ເລື່ອງຄວາມເປັນຈິງຢ່າງຖືກຕ້ອງໂດຍຝ່າຍຈີນຢັ້ງຢືນວ່າບໍ່ແມ່ນຕົ້ນເຫດທີ່ກໍ່ໃຫ້ເກີດໄພແຫ້ງແລ້ງຢູ່ພາກພື້ນແມ່ນ້ຳລ້ານຊ້າງ-ແມ່ນ້ຳຂອງ ຊຶ່ງສາເຫດຕົ້ນຕໍແມ່ນຍ້ອນຝົນຕົກບໍ່ພຽງພໍໃນທົ່ວລ້ອງແມ່ນ້ຳ ແຕ່ບໍ່ແມ່ນຍ້ອນຜົນກະທົບຈາກເຂື່ອນກັ້ນນ້ຳຢູ່ຍ່ານເໜືອ, ເຂື່ອນຢູ່ຍ່ານເໜືອແມ່ນ້ຳ ລ້ານຊ້າງໄດ້ສຸມຄວາມພະຍາຍາມຈົນສຸດຄວາມສາມາດເພີ່ມການປ່ອຍນ້ຳໃນລະດູແລ້ງແຕ່ບໍ່ໄດ້ມີລັກສະນະເຄື່ອນໄຫວແບບກົງກັນຂ້າມເຊັ່ນການອວ່າຍແລວນ້ຳແລະອື່ນໆ. ການສ້າງໂຄງການຊັບພະຍາກອນນໍ້າເປັນວິທີທາງອັນສຳຄັນໃນການຄຸ້ມຄອງຕາມຫຼັກວິທະຍາສາດ ແລະນຳໃຊ້ຊັບພະຍາກອນນ້ຳຢ່າງສົມເຫດສົມຜົນ, ແຕ່ບໍ່ແມ່ນສາເຫດສຳ ຄັນ ອັນດັບໜຶ່ງ ທີ່ພາໃຫ້ເກີດໄພພິບັດ.
ໂຄງການຊັບພະຍາກອນນ້ຳສາມາດແກ້ໄຂບັນຫາຄວາມອຸດົມສົມບູນຂອງຊັບພະຍາກອນນ້ຳບໍ່ສະໝ່ຳສະເໝີກັນ, ເປັນວິທີອັນສຳຄັນ ແລະ ທາງເລືອກອັນຈຳເປັນສຳລັບບັນດາ ປະເທດໃນການພັດທະນາເສດຖະກິດ ແລະ ຮັບປະກັນຊີວິດການເປັນຢູ່ຂອງປະຊາຊົນ, ທັງມີຜົນດີຕໍ່ກັບການປ້ອງກັນ ແລະ ຕ້ານແລ້ງຕ້ານຖ້ວມຢ່າງມີປະສິດທິຜົນຫຼາຍກວ່າເກົ່າ. ບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງກໍມີສິດໃນການພັດທະນາ ແລະ ນຳໃຊ້ຊັບພະຍາກອນນ້ຳຢ່າງສົມເຫດສົມຜົນ. ຕາມສະຖິຕິ, ປັດຈຸບັນ, ປະເທດຕ່າງໆຢູ່ລຸ່ມແມ່ນ້ຳຂອງໄດ້ສ້າງເຂື່ອນໄຟຟ້ານ້ຳຕົກປະເພດຕ່າງໆ 300 ກວ່າແຫ່ງຢູ່ຕາມລຳນ້ຳຂອງ ແລະ ສາຂາຕ່າງໆຂອງແມ່ນ້ຳຂອງໂດຍອີງຕາມຄວາມ ຮຽກຮ້ອງຕ້ອງການດ້ານການພັດທະນາຂອງປະເທດຕົນ. ຈີນກໍພວມຕັ້ງໜ້ານຳໃຊ້ໂຄງລ່າງພື້ນຖານຊັບພະຍາກອນນໍ້າເພື່ອປ້ອງກັນໄພພິບັດ, ນຳໃຊ້ແລະອະນຸລັກຊັບພະຍາກອນນ້ຳເຊັ່ນກັນ, ໃນຂະນະດຽວກັນ, ຈີນຍັງໄດ້ສຸມ ໃສ່ການຮ່ວມມືກັບບັນດາປະເທດລຸ່ມແມ່ນ້ຳຂອງຢ່າງເປີດເຜີຍແລະໂປ່ງໃສ, ອະນຸລັກຊັບພະຍາກອນນ້ຳແມ່ນ້ຳລ້ານຊ້າງ-ແມ່ນ້ຳຂອງເພື່ອບັນລຸການພັດທະນາຮ່ວມກັນ.
