ວິນາທີນີ້ສາມາດເປັນໄປໄດ້, ທີມຊາດລາວ U17 ປີ ອາດເປັນມ້າມືດຄອງເຈົ້າອາຊຽນ 2026 ຫຼື ອາດຄວ້າແຊ້ມໃນການແຂ່ງຂັນກິລາບານເຕະ U17 ປີ ຊີງແຊ້ມອາຊຽນ ປະຈຳປີ 2026 ທີ່ປະເທດອິນໂດເນເຊຍ ເພາະເຈົ້າອາຊຽນຢ່າງ ຊ້າງສຶກ ຫຼື ທີມຊາດໄທU17 ປີ, ທີມຊາດລາວ U17 ປີ ກໍເອົາຊະນະມາແລ້ວທັງທີ່ທີມຊາດໄທຂຶ້ນນໍາໄປກ່ອນເຖິງສອງຄັ້ງ.
ທີມຊາດລາວ U17 ປີ ຢູ່ກຸ່ມ B ລວມມີ ທີມຊາດມຽນມາ, ທີມຊາດຟີລິບປິນ, ທີມຊາດໄທ ແລະ ທີມຊາດລາວ ຜ່ານການແຂ່ງຂັນ 3 ນັດຜ່ານມາ, ທີມຊາດລາວ U17ປີ ສະເໝີກັບທີມຊາດມຽນມາ 0:0, ຊະນະທີມຊາດຟີລິບປິນ 4:3 ແລະ ຊະນະທີມຊາດໄທ 3:2 ເປັນແຊ້ມຂອງກຸ່ມ ມີ 7 ຄະແນນ ຜ່ານເຂົ້າຮອບຮອງຊະນະເລີດພົບກັບທີມຊາດມາເລເຊຍ ທີ່ຈະມີການແຂ່ງຂັນໃນມື້ວັນພຸດທີ 22 ເມສາ2026 ນີ້ ຫຼື ມື້ອື່ນ ເວລາ 13:30 ທີ່ ສະໜາມ Gelora Delta Stadium ປະເທດອິນໂດເນເຊຍ ແລະ ຄູ່ທີ່ສອງມີການແຂ່ງຂັນໃນວັນດຽວກັນ, ທີມຊາດຫວຽດນາມ U17 ປີ ຈະພົບກັບ ທີມຊາດອົດສະຕຣາລີ ໃນເວລາ 18:30.
ຖ້າຫາກທີມຊາດລາວ U17 ປີ ສາມາດເອົາຊະນະທີມຊາດມາເລເຊຍໄດ້ ກໍຈະເຂົ້າໄປລໍຊີງຊະນະເລີດພົບກັບທີມໃດທີມໜຶ່ງຂອງຄູ່ທີສອງ.
ມາລຸ້ນ, ຮັບຊົມ ແລະ ເຊຍທີມຊາດລາວ U17 ປີ ໃນມື້ອື່ນນໍາກັນ.
ການແຂ່ງຂັນກິລາບານເຕະ U17 ປີ ຊີງແຊ້ມອາຊຽນ ປະຈຳປີ 2026 ນີ້ໂດຍແມ່ນປະເທດອິນໂດເນເຊຍ ເປັນເຈົ້າພາບ ໃນລະຫວ່າງວັນທີ 11-24 ເມສາ 2026 ນີ້.
ສໍາລັບ ການແຂ່ງຂັນລາຍການນີ້ ແມ່ນຄັດເອົາອັນດັບທີ 1 ຂອງແຕ່ລະກຸ່ມ 3 ກຸ່ມເປັນ 3 ທີມ ແລະ ເອົາອັນດັບ 2 ທີ່ດີທີ່ສຸດ 1 ທີມ ເຂົ້າຮອບ 4 ທີມສຸດທ້າຍ ເຊິ່ງມີ 12 ຊາດເຂົ້າຮ່ວມດັ່ງນີ້: ກຸ່ມ A: ອິນໂດເນເຊຍ ເຈົ້າພາບ, ຫວຽດນາມ, ມາເລເຊຍ ແລະ ຕີມໍ ເລສເຕ; ກຸ່ມ B: ໄທ, ລາວ, ມຽນມາ ແລະ ຟິລິບປິນ ແລະ ກຸ່ມ C: ອົດສະຕຣາລີ, ກໍາປູເຈຍ, ສິງກະໂປ ແລະ ບຣູໄນ.
ຂ່າວ: ວຽງຈັນທາຍ
