ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ເນັ້ນໜັກວຽກງານຈຸດສຸມຈຳນວນໜຶ່ງໃຫ້ອໍານາດການປົກຄອງແຂວງຄໍາມ່ວນໄປແກ້ໄຂ ເນື່ອງໃນໂອກາດທີ່ຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນ ໃນມື້ວັນທີ 8 ກໍລະກົດ 2020. ທ່ານໄດ້ເນັ້ນໃຫ້ ເພີ່ມທະວີການນໍາພາດ້ານການເມືອງ-ແນວຄິດ ຂອງພະນັກງານ ແລະ ປະຊາຊົນ ໃຫ້ໜັກແໜ້ນ, ເຂັ້ມແຂງ, ສືບຕໍ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ຮີບຮ້ອນດຳເນີນກອງປະຊຸມໃຫຍ່ 03 ຂັ້ນ ໃຫ້ສຳເລັດ ເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ ຄັ້ງທີ XI ຂອງພັກ, ເພີ່ມທະວີສະຕິລະວັງຕົວໃຫ້ ຫຼາຍຂຶ້ນກວ່າເກົ່າ, ຕີຖອຍບັນຫາສິ່ງຫຍໍ້ທໍ້ ແລະ ຫາງສຽງທີ່ເກີດຂຶ້ນ ໃນຂົງເຂດການບໍລິຫານ-ຄຸ້ມຄອງລັດ, ຄຸ້ມຄອງສັງຄົມ ເພື່ອບໍ່ໃຫ້ພວກຄົນບໍ່ດີສ ວຍໃຊ້ໂຄສະນາໂຈມຕີພວກເຮົາ.
ເນື່ອງໃນໂອກາດດັ່ງກ່າວ, ທ່ານ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄໍາມ່ວນ ໄດ້ຂຶ້ນລາຍງານສະພາບລວມໂດຍຫຍໍ້ໃນການຈັດຕັ້ງປະຕິບັດຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງຄຳມ່ວນ ຕໍ່ທ່ານປະທານປະເທດວ່າ: ມີຜົນສຳເລັດພົ້ນເດັ່ນໃນຫຼາຍດ້ານເຖິງວ່າໄດ້ຮັບຜົນກະທົບ ແລະ ມີຄວາມຫຍຸ້ງຍາກຫຼາຍດ້ານ, ບວກໃສ່ກັບໄພທໍາມະຊາດ ແລະ ການລະບາດຂອງພະຍາດ ໂຄວິດ- 19 ໂດຍສະເພາະທົ່ວແຂວງໄດ້ພ້ອມກັນພະຍາຍາມບຸກບືນ, ສູ້ຊົນດ້ວຍຄວາມຮັບຜິດຊອບສູງ ເພື່ອບັນລຸບັນດາຄາດໝາຍໃຫຍ່ທີ່ໄດ້ກໍານົດອອກໃຫ້ປະກົດຜົນເປັນຈິງ, ດ້ານວຽກງານວັດທະນະທໍາ-ສັງຄົມ ກໍໄດ້ຮັບການເອົາໃຈໃສ່ ແລະ ມີດ້ານຂະຫຍາຍຕົວທີ່ຕໍ່ເນື່ອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກຂອງປະຊາຊົນ ໄດ້ຮັບການເອົາໃຈໃສ່ແກ້ໄຂ ເຮັດໃຫ້ຕົວເລກຄອບຄົວທຸກຍາກຫຼຸດລົງຍັງເຫຼືອ 684 ຄອບຄົວ.
ສະເພາະການກະກຽມດຳເນີນກອງປະຊຸມໃຫຍ່ ຂອງອົງຄະນະພັກແຂວງ, ທ່ານໂອໂດໄດ້ລາຍງານວ່າ: ຈະ ສືບຕໍ່ຍູ້ຂະບວນການດ້ານຕ່າງໆ ໃຫ້ແຂງແຮງກວ່າເກົ່າ, ສູ້ຊົນປະຕິບັດບັນດາຄາດໝາຍທີ່ກອງປະຊຸມໃຫຍ່ຂອງຕົນໄດ້ຮັບຮອງ, ຕິດພັນກັບການເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຕ່າງໆ ໃຫ້ໝົດໄປເທື່ອລະກ້າວ ໂດຍປຸກລະດົມປະຊາຊົນໃຫ້ມີສ່ວນຮ່ວມ ແລະ ສືບຕໍ່ຊຸກຍູ້ປະຊາຊົນທໍາການຜະລິດເປັນສິນຄ້າ ແກ້ໄຂຄວາມທຸກຍາກ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ແລະ ອື່ນໆ.
ຂ່າວ: ວຽງຈັນທາຍ
