ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 22 ມີນາ 2021, ຊຶ່ງບັນດາຜູ້ແທນກອງປະຊຸມໄດ້ພິຈາລະນາ ແລະ ລົງຄະແນນສຽງເລືອກຕັ້ງເອົາ ທ່ານ ໄຊສົມພອນ ພົມວິຫານ ເປັນປະທານສະພາແຫ່ງຊາດ ຊຸດທີ IX ພ້ອມນັ້ນກອງປະຊຸມສະພາຄັ້ງນີ້ ຍັງໄດ້ເລືອກຕັ້ງເອົາຮອງປະທານສະພາແຫ່ງຊາດຊຸດທີ IX ຈຳນວນ 5 ທ່ານ ຊຶ່ງປະກອບມີ : ທ່ານນາງ ສູນທອນ ໄຊຍະຈັກ, ທ່ານ ຈະເລີນ ເຢຍປາວເຮີ, ທ່ານ ຄໍາໃບ ດໍາລັດ, ທ່ານ ສົມມາດ ພົນເສນາ ແລະ ທ່ານ ພົນໂທ ສຸວອນ ເລືອງບຸນມີ.
ສໍາລັບ ກອງປະຊຸມຄັ້ງນີ້ ຈະດໍາເນີນໄປຈົນເຖິງວັນທີ 26 ມີນາ2021 ເພື່ອພິຈາລະນາຮັບຮອງເອົາຫຼາຍໂຄງປະກອບກົງຈັກຂອງສະພາແຫ່ງຊາດຊຸດທີIX, ການແຕ່ງຕັ້ງປະທານກໍາມາທິການສະພາແຫ່ງຊາດ, ເລຂາທິການ ແລະ ຮອງປະທານກໍາມາທິການຂອງສະພາແຫ່ງຊາດຊຸດທີIX; ພິຈາລະນາ, ຮັບຮອງການເລືອກຕັ້ງປະທານປະເທດ, ຮອງປະທານປະເທດ; ພິຈາລະນາ, ຮັບຮອງການເລືອກຕັ້ງນາຍົກລັດຖະມົນຕີ, ໂຄງປະກອບລັດຖະບານ, ການແຕ່ງຕັ້ງຮອງນາຍົກລັດຖະມົນຕີ ແລະ ສະມາຊິກລັດຖະບານຊຸດໃໝ່; ພິຈາລະນາ, ຮັບຮອງການເລືອກຕັ້ງຫົວໜ້າອົງການໄອຍະການປະຊາຊົນສູງສຸດ, ປະທານສານປະຊາຊົນສູງສຸດ, ປະທານອົງການກວດສອບແຫ່ງລັດ ແລະ ປະທານອົງການກວດກາແຫ່ງລັດ; ພິຈາລະນາ, ຮັບຮອງເອົາວຽກງານຂອງລັດຖະບານ, ວຽກງານຂອງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ,ອົງການກວດສອບແຫ່ງລັດ ແລະ ວຽກງານອົງການກວດກາແຫ່ງລັດ ພ້ອມທັງການພິຈາລະນາ, ຮັບຮອງເອົາວຽກງານຂອງສະພາແຫ່ງຊາດຊຸດທີ IX.
ຂໍ້ມູນ: Pathedlao
