ກອງປະຊຸມວິຊາການວຽກງານແຮງງານ ແລະ ສະຫວັດດີການສັງຄົມ (ຮສສ) ທົ່ວປະເທດປະຈໍາປີ 2025 ໄດ້ປິດລົງດ້ວຍຜົນສໍາເລັດອັນຈົບງາມໃນວັນທີ 23 ມັງກອນ 2026 ທີ່ຜ່ານມານີ້ ທີ່ນະຄອນຫຼວງວຽງຈັນ (ນວ) ໂດຍເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ.
ໂອກາດເຂົ້າຮ່ວມກອງປະຊຸມຄັ້ງນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ຜົນ ງານ ແລະ ຜົນສໍາເລັດຂອງຂະແໜງ ຮສສ ທີ່ຍາດມາໄດ້ໃນໄລຍະ 1 ປີຜ່ານມາ. ໃນປີ 2026 ໄດ້ເນັ້ນໜັກໃຫ້ຂະແໜງ ຮສສ ສືບຕໍ່ເອົາໃຈໃສ່ຫຼາຍບັນຫາສໍາຄັນຄື: ເອົາໃຈໃສ່ພັດທະນາສີມືແຮງງານ ໃຫ້ກໍາລັງແຮງງານລາວໄດ້ຄຸນນະພາບ, ຖືກຮັບຮູ້ ແລະ ສາມາດຕອບສະໜອງຕາມຄວາມຕ້ອງການຂອງຕະຫຼາດທັງພາຍໃນ ແລະ ຕ່າງປະເທດ, ຕ້ອງເຮັດວຽກເປັນລະບົບຢ່າງແຂງແຮງ ກັບຫົວໜ່ວຍແຮງງານທີ່ເປັນຜູ້ນໍາໃຊ້ແຮງງານຕົວຈິງ ໂດຍໃຫ້ຫົວໜ່ວຍແຮງງານເຫຼົ່ານີ້ໄດ້ເຂົ້າມາມີສ່ວນຮ່ວມໃນການສ້າງແຜນຄວາມຕ້ອງການ ແລະ ການພັດທະນາສີມືແຮງງານໃຫ້ຫຼາຍຂຶ້ນ ແລະ ຮັບເອົາແຮງງານທີ່ໄດ້ຜ່ານການຝຶກທີ່ມີຄຸນນະພາບເຂົ້າສູ່ຕຳແໜ່ງງານເລີຍ ເຮັດໃຫ້ຜູ້ອອກແຮງງານໄດ້ຝຶກທັກສະ, ມີຄວາມຊຳນານງານ, ມີລະບຽບວິໄນ, ມີວຽກເຮັດງານທໍາທີ່ໝັ້ນທ່ຽງ, ມີລາຍຮັບສາມາດເພິ່ງຕົນເອງ ແລະ ລ້ຽງຄອບຄົວໄດ້; ເອົາໃຈໃສ່ພັດທະນາລະບົບຖານຂໍ້ມູນຂ່າວສານຕະຫຼາດແຮງງານໃຫ້ເປັນເຄື່ອງມື ເປັນກົນໄກດັດສົມ ລະຫວ່າງຄວາມຕ້ອງການ ແລະ ການສະໜອງກໍາລັງແຮງງານຂະແໜງເສດຖະກິດ-ສັງຄົມ ແລະ ສາມາດເຊື່ອມຕໍ່ລະບົບຖານຂໍ້ມູນແຮງງານ ກັບລະບົບຖານຂໍ້ມູນອື່ນໆ ເປັນຕົ້ນຖານຂໍ້ມູນອາກອນເງິນເດືອນໃຫ້ເປັນລະບົບ; ພັດທະນາລະບົບປົກປ້ອງສັງຄົມໃຫ້ມີຄວາມເຂັ້ມແຂງ ເພື່ອປະຕິບັດນະໂຍບາຍສັງຄົມຂອງລັດ ຜ່ານລະບົບປົກປ້ອງສັງຄົມ ໃຫ້ສາມາດບໍລິການຕໍ່ປະຊາຊົນທີ່ດ້ອຍໂອກາດ, ຜູ້ທຸກຍາກ, ຜູ້ປະສົບໄພພິບັດຕ່າງໆ, ພະນັກງານທີ່ມີຜົນງານໃນພາລະກິດປະຕິວັດ, ຜູ້ອອກແຮງງານພາກວິສາຫະກິດ ແລະ ຜູ້ປະກອບອາຊີບອິດສະຫຼະສ່ວນບຸກຄົນທີ່ມີປະສິດທິພາບທີ່ດີຂຶ້ນ ໂດຍຕ້ອງໄດ້ສຸມໃສ່ພັດທະນາລະບົບປະກັນສັງຄົມໃຫ້ມີຄວາມເຂັ້ມແຂງ ແລະ ມີປະສິດທິພາບ ແນໃສ່ເຮັດໃຫ້ຜູ້ອອກແຮງງານ ສາມາດເຂົ້າເຖິງການປະກັນຕົນ ແລະ ເຂົ້າເຖິງການບໍລິການປະກັນສັງຄົມທີ່ມີປະສິດທິຜົນ ແລະ ກວ້າງຂວາງກວ່າເກົ່າ, ສ້າງສິ່ງອໍານວຍຄວາມສະດວກໃຫ້ຜູ້ອອກແຮງງານນອກລະບົບຕາມກຸ່ມອາຊີບຕ່າງໆໃນຂັ້ນທ້ອງຖິ່ນ ໄດ້ເຂົ້າຮ່ວມລະບົບປະກັນສັງຄົມແບບສະໝັກໃຈໃຫ້ຫຼາຍຂຶ້ນ ພ້ອມທັງປັບປຸງກົນໄກການຄຸ້ມຄອງ ແລະ ບໍລິຫານກອງທຶນປະກັນສັງຄົມແຫ່ງຊາດມີຄວາມໂປ່ງໃສຍືນຍົງ, ສາມາດຕອບສະໜອງການບໍລິການທີ່ມີຄຸນນະພາບ ແລະ ວ່ອງໄວ; ພັດທະນາລະບົບສະຫວັດດີການ-ສັງຄົມ ໃຫ້ສາມາດປະຕິບັດນະໂຍບາຍຊ່ວຍເຫຼືອສົງເຄາະ ແລະ ບັນເທົາທຸກໃຫ້ປະຊາຊົນທີ່ທຸກຍາກ, ດ້ອຍໂອກາດ ແລະ ຜູ້ປະສົບໄພພິບັດຕ່າງໆ ໂດຍສົ່ງເສີມໃຫ້ທຸກພາກສ່ວນໃນສັງຄົມມີສ່ວນຮ່ວມຢ່າງກວ້າງຂວາງ; ເພີ່ມທະວີເອົາໃຈ ໃສ່ປະຕິບັດບັນດາມາດຕະການປ້ອງກັນ ເພື່ອຫຼຸດຜ່ອນຄວາມເສຍຫາຍຈາກໄພພິບັດ, ການຄວບຄຸມຊ່ວຍ ເຫຼືອແກ້ໄຂສຸກເສີນ ແລະ ການຟື້ນຟູຄືນຫຼັງໄພພິບັດ ທີ່ຮັບປະກັນຄວາມທົນທານປອດໄພໃນອະນາຄົດ ລວມທັງວຽກງານການແກ້ໄຂລະເບີດບໍ່ທັນແຕກທີ່ຕົກຄ້າງໃຫ້ມີປະສິດທິຜົນຫຼາຍຂຶ້ນ; ສືບຕໍ່ເອົາໃຈໃສ່ຕັ້ງໜ້າປະຕິບັດນະໂຍບາຍໃຫ້ການຊ່ວຍເຫຼືອຜູ້ມີຜົນງານປະຕິວັດຊາດ ໃນເປົ້າໝາຍບຸລິມະສິດໃຫ້ສໍາເລັດໄວຂຶ້ນ ແຕ່ສິ່ງສໍາຄັນພາກສ່ວນທີ່ຮັບຜິດຊອບຢູ່ກະຊວງ ແລະ ທ້ອງຖິ່ນ ຕ້ອງມີຄວາມຊັດເຈນທາງດ້ານຂໍ້ມູນ ແລະ ມີຄວາມເປັນເອກະພາບກັນ ຫຼີກເວັ້ນປະຕິບັດນະໂຍບາຍຊໍ້າຊ້ອນ ຫຼື ບໍ່ຖືກເປົ້າໝາຍ ພ້ອມທັງເອົາໃຈໃສ່ຕິດຕາມໃຫ້ເງິນນະໂຍບາຍທີ່ຮັບປະກັນດ້ານຄວາມໂປ່ງໃສ, ຍຸຕິທຳ ແລະ ມອບສົ່ງ ຫຼື ເບີກຈ່າຍໃຫ້ໄປຮອດໄປເຖິງເປົ້າໝາຍຢ່າງຄົບຖ້ວນ ສົມທົບງົບປະມານຂອງລັດ ກັບການປະຕິບັດໂຄງການ ການສະແດງຄວາມຮູ້ບຸນຄຸນກະຕັນຍູ ແລະ ປະກອບສ່ວນຈາກສັງຄົມຕໍ່ຜູ້ທີ່ມີຜົນງານຕໍ່ການປະຕິວັດ ແລະ ຕໍ່ປະເທດຊາດ; ວຽກງານຄຸ້ມຄອງບໍລິຫານວຽກງານ ຮສສ ຕ້ອງໄດ້ຮັບການສ້າງຄວາມເຂັ້ມແຂງ ຕາມທິດຄຸ້ມຄອງດ້ວຍກົດໝາຍ ແລະ ລະບຽບການໃຫ້ມີຄວາມສັກສິດ ໂດຍສຸມໃສ່ສ້າງ ແລະ ປັບປຸງກົດໝາຍ, ນິຕິກຳລຸ່ມກົດໝາຍ ເພື່ອເປັນເຄື່ອງມືໃນການບໍລິຫານວຽກງານໃຫ້ມີຄວາມສັກສິດ; ເອົາໃຈໃສ່ການຈັດຕັ້ງຜັນຂະຫຍາຍນະໂຍບາຍ ແລະ ສ້າງວິໃສທັດແຜນຍຸດທະສາດ ໃນການພັດທະນາວຽກງານ ຮສສ ລະຫວ່າງສູນກາງ ແລະ ທ້ອງຖິ່ນໃຫ້ມີຄວາມກົມກຽວກວ່າເກົ່າ, ຈັດຕັ້ງປະຕິບັດບັນດາຄາດໝາຍສູ້ຊົນໃນປີ 2026 ຕາມທີ່ໄດ້ກຳນົດແຕ່ລະດ້ານ ໂດຍໃຫ້ມີການແບ່ງງານແບ່ງຄວາມຮັບຜິດຊອບ ລະຫວ່າງກະຊວງ ແລະ ທ້ອງຖິ່ນຢ່າງຈະແຈ້ງ ເພື່ອພ້ອມກັນຈັດຕັ້ງປະຕິບັດໃຫ້ເກີດຜົນຢ່າງເປັນຮູບປະທໍາຕົວຈິງ, ເພີ່ມທະວີການຮ່ວມມືກັບຕ່າງປະເທດ, ບັນດາປະເທດເພື່ອນມິດຍຸດທະສາດ, ພາກພື້ນ ແລະ ສາກົນ ຢ່າງກວ້າງຂວາງ ເພື່ອຍາດແຍ່ງການລະດົມແຫຼ່ງທຶນ ແລະ ເຕັກນິກວິຊາການໃຫ້ຫຼາຍຂຶ້ນ ເພື່ອປະກອບສ່ວນເຂົ້າໃນການພັດທະນາວຽກງານ ຮສສ ໃຫ້ເຕີບໃຫຍ່ຂະຫຍາຍຕົວ; ໃຫ້ເອົາໃຈໃສ່ສືບຕໍ່ປັບ ປຸງການຈັດຕັ້ງຂະແໜງ ຮສສ ໃຫ້ມີຄວາມເຂັ້ມແຂງ ແລະ ສາມາດຕອບສະໜອງກັບຄວາມຕ້ອງການຂອງໜ້າທີ່ວຽກງານ ພ້ອມທັງສືບຕໍ່ຍົກລະດັບຄວາມຮູ້-ຄວາມສາມາດ ແລະ ຫົວຄິດປະດິດສ້າງດ້ານວິຊາການຂອງພະນັກງານ-ລັດຖະກອນ ເພື່ອເປັນກໍາລັງແຮງສໍາຄັນ ປະກອບສ່ວນເຂົ້າໃນການປະຕິບັດແຜນພັດທະນາ ຮສສ ຕາມທິດ 3 ສ້າງກະຊວງ ເຮັດບົດບາດມະຫາພາກເພີ່ມສິດ, ວຽກ, ງົບປະມານ ແລະ ບຸກຄະລາກອນໃຫ້ທ້ອງຖິ່ນ ເປັນເຈົ້າການປະຕິບັດວຽກຕົວຈິງຫຼາຍຂຶ້ນ ກໍຄືບັນດາຄາດໝາຍທີ່ໄດ້ກຳນົດໃຫ້ບັນລຸຜົນສໍາເລັດໃນປີ 2026.
ຂ່າວ-ພາບ: ວັນເພັງ
