ສະພາບໄພນ້ຳຖ້ວມຢູ່ ເມືອງສອງຄອນ ແຂວງສະຫວັນນະເຂດຮອດມື້ເຊົ້ານີ້ວັນທີ 24 ຕຸລາ, ນໍ້າເຊບັງຫຽງຍັງສືບຕໍ່ຍຶ່ງຂຶ້ນຖ້ວມ 23 ບ້ານ ລວມມີ 2.428 ຄອບຄົວ, ພົນລະ ເມືອງ 14.400 ຄົນ ທີ່ໄດ້ຮັບຜົນກະທົບ. ນອກນັ້ນຍັງມີເນື້ອທີ່ນາ ເກືອບ 5.000 ເຮັກຕາ ທີ່ກຳລັງຈະເກັບກ່ຽວຜົນຜະລິດກໍຖືກນ້ຳຖ້ວມເສຍຫາຍ.
ເຈົ້າເມືອງສອງຄອນ ທ່ານ ລຳຄູນ ວໍລະວົງ ໄດ້ລາຍງານສະພາບນໍ້າຖ້ວມພາຍໃນເມືອງສອງຄອນຕໍ່ນັກຂ່າວວ່າ: ພາຍຫຼັງເກີດນ້ຳຖ້ວມ ໄດ້ມີການລົງຕິດຕາມສະພາບນໍ້າຖ້ວມຢ່າງໃກ້ຊິດ, ທັງລະດົມກຳລັງ ທະຫານ-ຕຳຫຼວດ ຊ່ວຍເກັບກູ້ສິ່ງຂອງ, ສັດລ້ຽງ ໄປໄວ້ເຂດທີ່ສູງປອດໄພ, ພ້ອມທັງນຳເອົາເຄື່ອງຊ່ວຍເຫລືອທີ່ໄດ້ຮັບຈາກພາກສ່ວນຕ່າງໆທີ່ຈຳເປັນ ໄປມອບໃຫ້ປະຊາຊົນແຕ່ລະບ້ານຢ່າງຮີບດ່ວນ ແລະ ຕໍ່ເນື່ອງ. ຜົນເສຍຫາຍຄັ້ງນີ້ ຍັງມີຫນອງປາ 314 ຫນອງ, ເນື້ອທີ່ສວນ 96 ເຮັກຕາ, ສັດຕາຍ ( ງົວ6 ໂຕ), ວິດຖ່າຍ 1.289 ຫນ່ວຍ, ເລົ້າເຂົ້າ 1 ຫລັງ, ນໍ້າບາດານ 54 ຫນ່ວຍ, ລະບົບຊົນລະປະທານ 9 ແຫ່ງ ແລະ ສະພາບເສັ້ນທາງຄົມມະນາຄົມທາງບົກ ໃນບາງຈຸດພົບຄວາມຫຍຸ້ງຍາກໃຊ້ການບໍ່ໄດ້ມີທັງຫມົດ: 10 ເສັ້ນ, ຍາວ 7.700 ແມັດ, ໂຮງຮຽນຢຸດການຮຽນ-ການສອນຊົ່ວຄາວມີ ທັງຫມົດ 22 ແຫ່ງ, ໂຮງຮຽນຖືກຖ້ວມ 11 ແຫ່ງ, ໃນນີ້, ອານຸບານ 1 ແຫ່ງ ແລະ ໂຮງຮຽນ ມໍຕົ້ນ 2 ແຫ່ງ, ສາຍໄຟຟ້າຂາດ ແລະ ອື່ນໆ. ຄວາມຕ້ອງການຊ່ວຍເຫລືອຈາກສັງຄົມຮີບດ່ວນແມ່ນເຂົ້າສານ, ອາຫານແຫ້ງ, ນ້ຳດື່ມ ແລະ ຢາປົວພະຍາດ.
ຂ່າວ: ຣາສະວົງ
