ບັນດາຜູ້ນຳອາຊຽນໄດ້ເຂົ້າຮ່ວມເປັນສັກຂີພິຍານໃນພິທີປະກາດເປັນທາງການ ການທົບທວນກາງສະໄໝແຜນແມ່ບົດວິໄສທັດປະຊາຄົມອາຊຽນ 2025, ພິທີປະກາດເປັນທາງການແຜນຟື້ນຟູຮອບດ້ານອາຊຽນ ແລະ ແຜນຈັດຕັ້ງປະຕິບັດ ແລະ ພິທີປະກາດສ້າງຕັ້ງຄັງແຮຢາປົວພະຍາດ ແລະ ອຸປະກອນການແພດ ສໍາລັບພາວະສຸກເສີນດ້ານສາທາລະນະສຸກພາກພື້ນອາຊຽນ ທີ່ ກອງປະຊຸມສຸດຍອດອາຊຽນ ຄັ້ງທີ 37 ແບບທາງໄກ ທີ່ໄດ້ຈັດຂຶ້ນເມື່ອວັນທີ 12 ພະຈິກ 2020 ທີ່ຜ່ານມາ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມດັ່ງກ່າວ ພາຍໃຕ້ການເປັນປະທານຂອງ ທ່ານ ຫງວຽນ ຊວັນ ຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ, ໃນຖານະເປັນເຈົ້າພາບຈັດກອງປະຊຸມດັ່ງກ່າວ.
ນອກນັ້ນ, ບັນດາຜູ້ນຳອາຊຽນ ໄດ້ຮັບຮອງເອົາ 6 ເອກະສານສຳຄັນປະກອບມີຖະແຫຼງການຮ່າໂນ້ຍ ວ່າດ້ວຍປະຊາຄົມອາຊຽນ ຫຼັງປີ 2025, ຖະແຫຼງການ ຮ່າໂນ້ຍ ວ່າດ້ວຍການຮັບຮອງເອົາຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 4 (2021-2025), ຖະແຫຼງການອາຊຽນ ວ່າດ້ວຍ ການສ້າງແລວການເດີນທາງພິເສດພາຍໃນອາຊຽນ, ຖະແຫຼງການອາຊຽນ ວ່າດ້ວຍ ການທ່ອງທ່ຽວໃນຮູບແບບດີຈີຕອນ, ການຍົກສູງເອກະລັກອາຊຽນ ແລະ ຖະແຫຼງການຮ່າໂນ້ຍ ວ່າດ້ວຍການສ້າງຄວາມເຂັ້ມແຂງວຽກງານສັງຄົມສົງເຄາະ ເພື່ອກ້າວໄປສູ່ປະຊາຄົມອາຊຽນທີ່ເຂັ້ມແຂງ ແລະ ຕອບສະໜອງຕໍ່ສະພາບການ.
ຂໍ້ມູນ: ກະຊວງການຕ່າງປະເທດ
