ການປະທະກັນດ້ວຍກຳລັງອາວຸດຢູ່ໃນຕາເວັນອອກກາງ ກຳລັງເຮັດໃຫ້ຫຼາຍປະເທດທົ່ວໂລກ ປະເຊີນກັບການຂາດແຄນພະລັງງານເຊື້ອໄຟ ຢ່າງໜັກ, ລາຄາແພງຂຶ້ນຢ່າງຕໍ່ເນຶ່ອງ ໃນໄລຍະເວລາສັ້ນ ແລະ ຄາດວ່າຈະມີທ່າງອ່ຽງສືບຕໍ່ເພີ່ມຂຶ້ນ ຖ້າຫາກການຕໍ່ສູ້ຍັງສືບຕໍ່ຮຸນແຮງ.
ສະພາບການດັ່ງກ່າວ ສົ່ງຜົນກະທົບຢ່າງຫຼວງຫຼາຍ ເປັນວົງກວ້າງ ຕໍ່ການດຳລົງຊິວິດ ຂອງ ປະຊາຊົນ, ເສດຖະກິດພົບຄວາມຫຍຸ້ງຍາກ, ລາຄາສິນຄ້າແພງຂຶ້ນ, ການບໍລິການຂົນສົ່ງສິນຄ້າຊັກຊ້າ ແລະ ຄວາມຕ້ອງການເງິນຕາຕ່າງປະເທດ ໃນການຊຳລະການນຳເຂົ້ານ້ຳມັນມີແນວໂນ້ມເພີ່ມຂຶ້ນ.
ສປປ ລາວ ກໍ່ບໍ່ສາມາດຫຼີກລ່ຽງຜົນກະທົບດັ່ງກ່າວ. ສະນັ້ນ ສະພາບເງິນຕາຕ່າງປະເທດ ແລະ ເງິນເຟີ້ ຂອງ ສປປລາວ ຈະມີທ່າອ່ຽງແນວໃດ ໃນເມື່ອ ສະຖານະການຂອງສົງຄາມຍືດເຍື້ອ, ການສະໜອງນ້ຳມັນເຊື້ອໄຟ ຢູ່ໃນໂລກບໍ່ພຽງພໍກັບຄວາມຕ້ອງການ ບວກກັບ ລາຄາແພງຂຶ້ນຢ່າງຕໍ່ເນຶ່ອງ?.
ການສະໜອງນຳມັນເຊື້ອໄຟບໍ່ທັນກັບຄວາມຕ້ອງການ ໄດ້ເຮັດໃຫ້ບັນດາຜູ້ປະກອບການປ້ຳນ້ຳມັນພາຍໃນປະເທດ ບໍ່ສາມາດໃຫ້ການບໍລິການໄດ້ເຕັມທີ່. ບາງປ້ຳເປີດບໍລິການຕອນເຊົ້າ ແລະ ປິດຕອນສວາຍ ໂດຍໃຫ້ເຫດຜົນວ່ານ້ຳມັນໝົດ, ບາງປ້ຳຕິດປະກາດແຈ້ງໃຫ້ລູກຄ້າວ່າ: ນ້ຳມັນກາຊວນໝົດ ຫຼື ບາງປ້ຳກໍ່ແຈ້ງວ່າ: ນ້ຳມັນແອັດຊັ່ງໝົດ. ປະກົດການດັ່ງກ່າວ ໄດ້ເຮັດໃຫ້ເກີດລົດແອອັດຕໍ່ແຖວຍາວເພື່ອລໍຖ້າຕື່ມນ້ຳມັນຢູ່ປ້ຳ. ຄວາມແອອັດ ເຮັດໃຫ້ການຈາລະຈອນຕິດຂັດໃນບາງຂົງເຂດ ເພາະລົດລໍຖ້າເຂົ້າຕື່ມນ້ຳມັນຢູ່ປ້ຳ ກີດຂວາງຊ່ອງທາງການສັນຈອນຂອງທາງ.
ອິງຕາມບົດລາຍງານ ສະຖິຕິປະຈຳໄຕມາດ4 ປີ 2025 ຂອງທະນາຄານ ແຫ່ງ ສປປ ລາວ, ບົດລາຍງານລະບຸວ່າ: ຄັງສຳຮອງເງິນຕາຕ່າງປະເທດ ກຸ້ມການນຳເຂົ້າໄດ້ 6.45 ເດືອນ. ນອກຈາກນັ້ນ ບົດລາຍງານຍັງໄດ້ຄາດຄະເນ ທ່າອ່ຽງເສດຖະກິດ ໄຕມາດ1 ປີ2026 ວ່າ: ເສດຖະກິດ ຂອງ ສປປ ລາວ ຄາດວ່າຈະສືບຕໍ່ຂະຫຍາຍຕົວໃນໄຕມາດ1 ຂອງ ປີນີ້ ໃນລະຫວ່າງ 4.2% ຫາ 5.9% ຈະມີທ່າອ່ຽງດີຂຶ້ນ ແຕ່ໃນຈັ່ງຫວະທີ່ຊ້າລົງ ເນຶ່ອງມາຈາກ ຄວາມສ່ຽງຂອງສະພາບການໃນໂລກ ເປັນຕົ້ນແມ່ນ ຄວາມຂັດແຍ່ງດ້ານການຄ້າ, ການເມືອງ-ການທະຫານ ຂອງຄູ່ຄ້າ-ຄູ່ລົງທຶນຫຼັກ, ລາຄາພະລັງງານເພີ່ມຂື້ນ ແລະ ອື່ນໆ… ພ້ອມດຽວກັນ, ອັດຕາເງິນເຟີ້ ຂອງ ສປປ ລາວ ໃນໄຕມາດນີ້ ຈະເຄື່ອນໄຫວ ຂ້ອນຂ້າງຜັນຜວນ ແລະ ອາດປັບຕົວເພີ່ມຂຶ້ນ ໂດຍສະເພາະໃນເດືອນມີນາ ທີ່ຄາດວ່າ ອັດຕາເງິນເຟີ້ ມີທ່າອ່ຽງເພີ່ມຂຶ້ນ ໃນລະດັບ 2 ຕົວເລກ ເນຶ່ອງມາຈາກ ຜົນກະທົບ ຂອງສົງຄາມ ໃນຕາເວັນອອກກາງ ທີ່ສົ່ງຜົນກະທົບ ຕໍ່ລາຄານ້ຳມັນ ໃນທົ່ວໂລກ ແລະ ສປປ ລາວໄດ້ປັບລາຄາຂຶ້ນຢ່າງໄວວາ.
ອັດຕາເງິນເຟີ້ ໃນເດືອນມັງກອນ ປີນີ້ ແມ່ນ 5.10% ແລະ ເດືອນກຸມພາ ແມ່ນ 6.20% ເພີ່ມຂື້ນ 1.20% .
ການແພງຂື້ນຂອງລາຄານ້ຳມັນ ເຮັດໃຫ້ຜູ້ຜະລິດ, ຜູ້ສະໜອງສິນຄ້າບໍລິໂພກ ແລະ ຊາວຄ້າຂາຍ ຍ່ອຍ ຕ້ອງໄດ້ປັບລາຄາສິນຄ້າໄປຕາມໆກັນ.
ເພື່ອຮັບມືກັບສະພາບການທີ່ຫຍຸ້ງຍາກ ແລະ ຫຼຸດຜົນກະທົບຕໍ່ເສດຖະກິດ, ຊິວິດການເປັນຢູ່ ຂອງປະຊາຊົນ ແລະ ພະນັກງານ, ລັດຖະບານ ລາວ ໄດ້ອອກຫຼາຍມາດຕະການຮຽບຮ້ອຍແລ້ວ. ໜຶ່ງໃນບັນດາມາດຕະການເຫຼົ່ານັ້ນແມ່ນ ການຜັດປ່ຽນກັນໄປປະຈຳການຢູ່ສຳນັກງານຕ່າງໆ ຕາມຄວາມເໝາະສົມ, ສົ່ງເສີມການປະຊຸມທາງໄກ ແທນການເດີນທາງໄປປະຊຸມຢູ່ຕ່າງແຂວງ, ການສົ່ງເສີມການນຳໃຊ້ພາຫະນະໄຟຟ້າແທນລົດນຳໃຊ້ນ້ຳມັນເຊື້ອໄຟ, ການຄຸ້ມຄອງລາຄາສິນຄ້າ ແລະ ສົ່ງເສີມການຜະລິດສິນຄ້າບໍລິໂພກພາຍໃນ ແລະ ອື່ນໆ.
