ເພື່ອຊຸກຍູ້ການເຕີບໂຕທາງເສດຖະກິດ, ສປປ ລາວ ກໍາລັງກ້າວຂຶ້ນເປັນໜຶ່ງໃນຜູ້ນຳອຸດສາຫະກຳໂກໂກ້ແຫ່ງໃໝ່ຂອງອາຊຽນ ຜ່ານໂຄງການລົງທຶນປູກໂກໂກ້ຄຸນນະພາບສູງ 500 ເຮັກຕາ ທີ່ແຂວງຫຼວງພະບາງ ແນໃສ່ສ້າງວຽກເຮັດງານທຳ, ເພີ່ມມູນຄ່າການສົ່ງອອກ ແລະ ພັດທະນາເສດຖະກິດຊຸມຊົນຢ່າງຍືນຍົງ.
ໂຄງການດັ່ງກ່າວໄດ້ຮັບການສຳປະທານທີ່ດິນຂອງລັດໃນເນື້ອທີ່ກວ້າງເຖິງ 500 ເຮັກຕາ, ເຊິ່ງປັດຈຸບັນໄດ້ສຳເລັດການປູກຕົ້ນໝາກໂກໂກ້ໄປແລ້ວກວ່າ 550,000 ຕົ້ນ ແລະ ຕົ້ນກາເຟອີກ 100,000 ຕົ້ນ ໂດຍຄາດວ່າຈະສາມາດເກັບກ່ຽວຜົນຜະລິດໄດ້ພາຍໃນໄລຍະເວລາ 5 ປີ.
ຂໍ້ມູນດັ່ງກ່າວ ຖືກລາຍງານໂດຍ ທ່ານ ເອກະພົດ ມີສະອາດ ປະທານໂຄງການພັດທະນາໂກໂກ້ຄຸນນະພາບສູງ ເມື່ອບໍ່ດົນມານີ້ໃນໂອກາດ ທ່ານ ບຸນເລື່ອມ ມະນີວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6 ພ້ອມດ້ວຍຄະນະ ໄດ້ລົງຢ້ຽມຢາມໂຄງການພັດທະນາປູກຕົ້ນໝາກໂກໂກ້ຄຸນນະພາບສູງ ແລະ ເສດຖະກິດຊຸມຊົນແບບຢັ້ງຢືນ ຂອງ ບໍລິສັດ ຢູນີເທັກ ທີ່ບ້ານຫ້ວຍອອນ ເມືອງຈອມເພັດ ແຂວງຫຼວງພະບາງ. ຕາມການລາຍງານຂອງ ໂທລະພາບແຂວງຫຼວງພະບາງ.
ທ່ານ ເອກະພົດ ມີສະອາດ ໄດ້ລາຍງານຄວາມຄືບໜ້າແກ່ຄະນະນຳໂດຍເນັ້ນໜັກວ່າ: “ໂຄງການມີວິໄສທັດ ແລະ ເປົ້າໝາຍ ພັດທະນາຫຼວງພະບາງສູ່ສູນກາງການຜະລິດໂກໂກ້ ໃຫ້ມີຄຸນນະພາບສູງ ໃນ ສປປ ລາວ ແລະ ເປັນໜຶ່ງໃນຜູ້ນຳອຸດສາຫະກຳໂກໂກ້ແຫ່ງໃຫມ່ຂອງອາຊຽນ”.
ນອກຈາກການຜະລິດແລ້ວ, ເປົ້າໝາຍຫຼັກຂອງໂຄງການຍັງກວມເອົາການສ້າງອຸດສາຫະກຳໂກໂກ້ມູນຄ່າສູງ, ການສ້າງວຽກເຮັດງານທຳເພື່ອແກ້ໄຂຄວາມທຸກຍາກ, ການສົ່ງເສີມກະສິກຳທີ່ເປັນມິດຕໍ່ສິ່ງແວດລ້ອມ ແລະ ການເຊື່ອມໂຍງສວນໂກໂກ້ໃຫ້ກາຍເປັນແຫຼ່ງທ່ອງທ່ຽວທາງການກະເສດທີ່ສຳຄັນຂອງແຂວງອີກດ້ວຍ.
ການຊຸກຍູ້ອຸດສາຫະກຳໂກໂກ້ໃນໄລຍະນີ້ຖືວ່າສອດຄ່ອງກັບທ່າອ່ຽງ ແລະ ໂອກາດຂອງຕະຫຼາດໂລກຢ່າງຍິ່ງ ເນື່ອງຈາກຕະຫຼາດໂກໂກ້ກຳລັງປະເຊີນກັບພາວະການຂາດແຄນການສະໜອງຢ່າງໜັກຈາກກຸ່ມຜູ້ຜະລິດລາຍໃຫຍ່ໃນທະວີບອາຟຣິກາຕາເວັນຕົກ ຍ້ອນບັນຫາສະພາບອາກາດປ່ຽນແປງ ແລະ ພະຍາດພືດ.
ອີງຕາມການປະເມີນຫຼ້າສຸດຂອງອົງການຄົ້ນຄວ້າຕະຫຼາດ IMARC Group ບໍລິສັດທີ່ປຶກສາ ແລະ ວິໄຈຕະຫຼາດ ຊັ້ນນຳລະດັບໂລກ ເຫັນວ່າອຸດສາຫະກຳໂກໂກ້ທົ່ວໂລກມີມູນຄ່າສູງເຖິງ 16.88 ຕື້ໂດລາສະຫະລັດໃນປີ 2025 ແລະ ຍັງສືບຕໍ່ມີຄວາມຕ້ອງການທີ່ເພີ່ມຂຶ້ນຢ່າງໄວວາ.
