ໃນໄລຍະເດືອນມີຖຸນາຜ່ານມາ, ໄດ້ເກີດອຸປະຕິເຫດບົນທ້ອງຖະໜົນ 459 ກໍລະນີ ໃນທົ່ວປະເທດ, ມີຜູ້ເສຍຊີວິດ 105 ຄົນ, ທຽບໃສ່ເດືອນພຶດສະພາແມ່ນ ເພີ່ມຂຶ້ນ 59 ຄົນ.
ພະແນກຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ລາຍງານໃຫ້ຮູ້ ຫວ່າງບໍ່ດົນມານີ້ວາ່: ປະຈຸບັນ, ການເກີດອຸບັດເຫດຢູ່ຕາມສາຍທາງຕ່າງໆໃນທົ່ວປະເທດ ສ່ວນໃຫຍ່ແມ່ນເກີດ ຍ້ອນນັກຂັບຂີ່ບໍ່ເຄົາລົບກົດລະບຽບຈະລາຈອນ ໂດຍສະເພາະ ເມົາແລ້ວຂັບ, ຂັບຂີ່ໄວເກີນກຳນົດ, ບໍ່ໃຫ້ກຽດກັບຜູ້ໃຊ້ເສັ້ນທາງຮ່ວມກັນ ແຊງຊ້າຍ-ຂວາບໍ່ຮັບປະກັນ ແລະ ອື່ນໆ, ຊຶ່ງເຮັດໃຫ້ໃນ ເດືອນມີຖຸນາຜ່ານມາ, ທົ່ວປະເທດມີອຸບັດເຫດເກີດຂຶ້ນທັງໝົດ 459 ກໍລະນີ, ມີຄົນເສຍຊີວິດ 105 ຄົນ ຊຶ່ງ ອຸບັດເຫດໃນແຕ່ລະຄັ້ງ ເຮັດໃຫ້ມີພາຫະນະເປ່ເພທັງໝົດ 807 ຄັນ, ໃນນີ້ ມີຄົນໄດ້ຮັບບາດເຈັບທັງໝົດ 651 ຄົນ.
ເພື່ອຫຼຸດຜ່ອນການເກີດອຸບັດເຫດ ທາງເຈົ້າໜ້າທີ່ຕຳຫຼວດຈະລາຈອນຈຶ່ງຮຽກຮ້ອງມາຍັງຜູ້ທີ່ໃຊ້ລົດໃຊ້ຖະໜົນຕ້ອງຮ່ວມໃຈກັນປະຕິບັດກົດລະບຽບການສັນຈອນທາງບົກໃຫ້ເຄັ່ງຄັດ, ມີສະຕິໃນການຂັບຂີ່ແຕ່ລະຄັ້ງ ເຊັ່ນ: ເມົາແລ້ວຫ້າມຂັບ, ຂັບຂີ່ລົດຈັກຕ້ອງໃສ່ໝວກກັນກະທົບທຸກຄັ້ງ ແລະ ກວດກາສະພາບລົດໃຫ້ມີຄວາມພ້ອມ ແລ້ວຈຶ່ງອອກເດີນທາງ ບັນຫາການເກີດອຸບັດເຫດມັນຈຶ່ງຈະຫຼຸດລົງ.
ຂ່າວ: ວຽງຈັນທາຍ
ຮູບ: ໜ່ວຍກູ້ໄພ
