ອົງການສາກົນຊ່ວຍອຸປະກອນ ເພື່ອຮັບໃຊ້ວຽກງານການແກ້ໄຂທຸກຮູບ ແບບຄວາມຮຸນແຮງ ແລະ ການຄ້າມະນຸດໃນແມ່ຍິງ ແລະ ເດັກນ້ອຍຢູ່ລາວ

ອົງການຢູນິເຊັບ (UNICEF) ປະຈໍາ ສປປ ລາວ ໄດ້ມອບຍານພາຫະນະ, ອຸປະກອນ ໄອທີ, ອຸປະກອນສຸຂະອະນາໄມທີ່ຈໍາເປັນ ແລະ ຊຸດອຸປະກອນການຫຼີ້ນຂອງເດັກເພື່ອ ການຮຽນຮູ້, ສ້າງຈິນຕະນາການ ແລະ ເພື່ອການຜ່ອນຄາຍ ລວມເປັນມູນຄ່າ 48,545 ໂດລາສະຫະລັດ ໃຫ້ກັບກົມແຜນການ ແລະ ການຮ່ວມມືສາກົນ, ກົມພັດທະນາແມ່ຍິງ, ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ເດັກນ້ອຍ ແລະ ສູນໃຫ້ຄໍາປຶກສາ ແລະ ປົກປ້ອງເດັກນ້ອຍ 2 ແຫ່ງ ໃນນະຄອນຫຼວງວຽງຈັນ ແລະ ແຂວງຫຼວງນໍ້າທາ ເພື່ອສະໜັບສະໜູນຂົງເຂດວຽກງານການ ແກ້ໄຂທຸກຮູບແບບຄວາມຮຸນແຮງ ແລະ ການຄ້າມະນຸດໃນແມ່ຍິງ ແລະ ເດັກນ້ອຍ ຊ່ວງໄລຍະການລະບາດຂອງພະຍາດ ໂຄວິດ-19 ໃນ ສປປ ລາວ.
ທຶນໃນການຈັດຊື້ອຸປະກອນດັ່ງກ່າວແມ່ນໄດ້ຮັບການສະໜັບສະໜູນຈາກລັດຖະບານຍີ່ປຸ່ນ, ອົງການຄອຍກາ KOICA, ຢູນິເຊັບ ອົດສະຕຣາລີ ແລະ ອົງການພັດທະນາສາກົນອາເມລິກາ USAID.
ພິທີມອບຮັບເຄື່ອງດັ່ງກ່າວໄດ້ຈັດຂຶ້ນເມື່ອວັນທີ 10 ກັນຍາທີ່ຜ່ານມາ ຢູ່ ນະຄອນຫລວງວຽງຈັນ, ປະກອບມີ: ລົດຕູ້ 1 ຄັນ, ຄອມພິວເຕີ 12 ໜ່ວຍ, ເຄື່ອງພິມ 6 ອັນ, ໂປຣເຈັກເຕີ 3 ຊຸດ, ພັອກເກັດໄວຟາຍ 6 ອັນ, ອຸປະກອນສຸຂະອະນາໄມທີ່ຈໍາເປັນ ແລະ ຊຸດອຸປະກອນການຫຼີ້ນຂອງເດັກເພື່ອ ການຮຽນຮູ້, ສ້າງຈິນຕະນາການ ແລະ ເພື່ອການຜ່ອນຄາຍ ເຊິ່ງຄາດວ່າເດັກ ແລະ ແມ່ຍິງ 1.000 ກວ່າຄົນ ຈະໄດ້ຮັບຜົນປະ ໂຫຍດ ຈາກອຸປະກອນດັ່ງກ່າວ.

ພາບ-ຂ່າວ: ວຽງດາວັນ