ພະຍາດໄຂ້ຍຸງລາຍ ເປັນອີກພະຍາດໜຶ່ງ ຕ້ອງໄດ້ເອົາໃຈໃສ່ ເຝົ້າລະວັງຢ່າງເຂັ້ມງວດ, ຊຶ່ງ ປະຈຸບັນ ສະພາບການລະບາດຂອງ ພະຍາດໄຂ້ຍຸງລາຍ ໃນຂອບເຂດທົ່ວປະເທດ ຍັງມີທ່າອ່ຽງເພີ່ມຂຶ້ນເລື້ອຍໆ, ໂດຍສະເພາະ ນະຄອນຫຼວງວຽງຈັນ ເປັນອັນດັບໜຶ່ງທີ່ມີຜູ້ຕິດເຊື້ອພະຍາດໄຂ້ຍຸງລາຍ 1.604 ຄົນ, ຖັດລົງມາແມ່ນ ແຂວງບໍລິຄຳໄຊ 785 ຄົນ, ບໍ່ແກ້ວ 690 ຄົນ, ວຽງຈັນ 672 ຄົນ, ສະຫວັນນະເຂດ 679 ຄົນ ແລະ ແຂວງ ອື່ນໆ.
ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ໃນວັນທີ 6 ຕຸລາ 2020 ວ່າ: ນັບແຕ່ເດືອນມັງກອນ ປີ 2020 ມາຮອດປັດຈຸບັນ, ທົ່ວປະເທດ ມີຜູ້ຕິດເຊື້ອໄຂ້ຍຸງລາຍເພີ່ມຂຶ້ນທັງໝົດ 6.999 ກໍລະນີ, ໃນນັ້ນ ເສຍຊີວິດລວມແລ້ວ 12 ຄົນ (ນະຄອນຫຼວງວຽງຈັນ 4 ຄົນ, ແຂວງ ບໍລິຄໍາໄຊ 2 ຄົນ, ຄຳມ່ວນ 02 ຄົນ, ໄຊຍະບູລີ 01 ຄົນ, ຊຽງຂວາງ 01 ຄົນ, ສະຫວັນນະເຂດ 01 ຄົນ ແລະ ຜົ້ງສາລີ 01 ຄົນ ).
ເພື່ອເປັນການປ້ອງກັນ ແລະ ສະກັດກັ້ນການລະບາດຂອງພະຍາດດັ່ງກ່າວ, ທຸກພາກສ່ວນໃນສັງຄົມ ລວມເຖິງພໍ່ແມ່ປະຊາຊົນ ຈົ່ງພ້ອມໃຈກັນເອົາໃຈໃສ່ອະນາໄມ ຕາມສະຖານທີ່ຕ່າງໆ, ທຸກຄົນຄວນເປັນເຈົ້າການໃນການທຳລາຍ ແຫຼ່ງເພາະພັນຂອງຍຸງລາຍ ໃນເຮືອນ ຂອງຕົນເອງເປັນປະຈໍາ, ພ້ອມນັ້ນ ນາຍບ້ານ ແຕ່ລະບ້ານ ຄວນເປັນເຈົ້າການໃນການ ຊີ້ນຳລູກບ້ານ ເຮັດອະນາໄມ ທຳລາຍແຫຼ່ງ ເພາະພັນຂອງຍຸງລາຍ ຄວບຄູ່ກັບການປະຕິບັດມາດຕະການ 5ປ ທີ່ກະຊວງສາທາລະນະສຸກ ວາງອອກວາງຢ່າງເຂັ້ມງວດ, ໂດຍສະເພາະທຳລາຍ ແຫຼ່ງເພາະພັນໜອນນໍ້າຍຸງລາຍ ບໍ່ມີໜອນນ້ຳ ກໍຈະບໍ່ມີຍຸງລາຍ.
ຂ່າວ: ວຽງຈັນທາຍ
