ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງການດ່ວນເມື່ອວັນທີ 7 ກໍລະກົດ 2021 ນີ້, ເຖິງປະຊາທີ່ອາໄສຢູ່ ແຂວງຜົ້ງສາລີ, ຫົວພັນ, ຊຽງຂວາງ, ອຸດົມໄຊ, ຫຼວງນໍ້າທາ, ບໍ່ແກ້ວ, ຫຼວງພະບາງ, ໄຊຍະບູລີ, ນະຄອນຫຼວງວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ ແລະ ແຂວງຄໍາມ່ວນ ຈົ່ງມີສະຕິລະມັດລະວັງພາຍຸລູກໝູນເຂດຮ້ອນດີເປຼ ຊັນ ທີ່ຈະເກີດຂຶ້ນໃນ 3 ວັນຕໍ່ໜ້ານີ້, ລະຫວ່າງວັນທີ 7-9 ກໍລະກົດ 2021, ຊຶ່ງຈະມີຝົນຕົກໜັກ ພ້ອມທັງ ມີລົມພັດແຮງ, ອາດຈະເຮັດໃຫ້ມີດິນເຈື່ອນ, ນໍ້າຖ້ວມ ກະທັນຫັນ ແລະ ນໍ້າຖ້ວມຊຸ ເກີດຂຶ້ນ.
ພາຍຸດັ່ງກ່າວກໍາລັງເຄື່ອນທີ່ຢູ່ເຂດທະເລຈີນໃຕ້ຕອນກາງ ທີ່ມີຈຸດສູນກາງຢູ່ເສັ້ນຂະໜານ 18.1 ອົງສາ ເໜືອ ແລະ ເສັ້ນແວງທີ 111 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກສ່ຽງເໜືອ ດ້ວຍ ຄວາມໄວ 5 ກິໂລແມັດຕໍ່ຊົ່ວໂມງ ແລະ ຄວາມໄວລົມ ສູງສຸດຢູ່ໃກ້ຈຸດສູນກາງ 55 ກິໂລແມັດຕໍ່ຊົ່ວໂມງ. ຄາດວ່າຈະເຄື່ອນໄປທາງເກາະໄຮໜານ ແລະ ຈະຜ່ານ ພາກເໜືອຂອງ ສສ ຫວຽດນາມ ໃນຄໍ່າຄືນຂອງວັນທີ 8 ກໍລະກົດ 2021 ແລະ ສືບຕໍ່ເຄື່ອນທີ່ຜ່ານເມືອງ ແອດ ແລະ ເມືອງຊໍາເໜືອ ແຂວງຫົວພັນໃນຕອນ ບ່າຍຂອງວັນທີ 8 ກໍລະກົດ. ຈາກນັ້ນພາຍຸຫົວນີ້ຈະອ່ອນກໍາລັງລົງເປັນຍ່ອມຄວາມກົດດັນອາກາດຕໍ່າ ທີ່ມີກໍາລັງແຮງປົກຄຸມເຂດ ພາກ ເໜືອ ຊຶ່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງເປັນບໍລິເວນກວ້າງ ແລະ ຕົກໜັກ ພ້ອມມີ ລົມພັດແຮງຢູ່ບາງທ້ອງຖິ່ນແຂວງພາກເໜືອ, ພາກ ກາງໃນໄລຍະ 3 ວັນດັ່ງກ່າວ.
ຂໍ້ມູນ: ກົມອຸຕຸນິຍົມ ແລະ ອຸທົກກະສາດ
