ໃນຂະນະທີ່ ປວງຊົນລາວທັງຊາດ ພວມຢູ່ໃນບັນຍາກາດແຫ່ງຄວາມປິຕິຊົມຊື່ນ ແລະ ສຸມໃສ່ສ້າງຂະບວນການແຂ່ງຂັນຮັກຊາດ ແລະ ພັດທະນາ ເພື່ອຂໍ່ານັບຮັບຕ້ອນ ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ທີ່ຈະມາເຖິງນີ້ ແຕ່ກໍຍັງມີກຸ່ມຄົນບໍ່ຫວັງດີ ຈຳນວນໜຶ່ງ ໄດ້ສວຍໂອກາດເຄື່ອນໄຫວສ້າງຄວາມວຸ້ນວາຍຜ່ານສື່ສັງຄົມອອນລາຍ ຢ່າງຕໍ່ເນື່ອງ ຊຶ່ງຮຽກຮ້ອງໃຫ້ສັງຄົມຕ້ອງຮູ້ ແລະ ເຂົ້າໃຈເລິກເຊິ່ງ ເຖິງກົນອຸບາຍຂອງກຸ່ມຄົນທີ່ບໍ່ຫວັງດີຄື:
ກຸ່ມຄົນບໍ່ຫວັງດີດັ່ງກ່າວນີ້ ໄດ້ພະຍາຍາມຜະລິດ ແລະ ເຜີຍແຜ່ຂໍ້ມູນຂ່າວສານທີ່ບິດເບືອນຄວາມຈິງ (Fake News), ໃສ່ຮ້າຍປ້າຍສີການນຳ ແລະ ສ້າງກະແສຂ່າວລືທີ່ບໍ່ມີມູນຄວາມຈິງ ໂດຍມີຈຸດປະສົງອັນຊົ່ວຮ້າຍ ເພື່ອຫວັງທຳລາຍພາບພົດ, ບົດບາດການນຳພາຂອງພັກ-ລັດ ແລະ ສ້າງຄວາມແຕກແຍກ, ຄວາມເຂົ້າໃຈຜິດ ແລະ ຄວາມປັ່ນປ່ວນພາຍໃນສັງຄົມ.
ຮຽກຮ້ອງທົ່ວສັງຄົມ ຮູ້ເທົ່າທັນ ແລະ ບໍ່ຕົກເປັນເຄື່ອງມື:
ຕໍ່ກັບປະກົດການດັ່ງກ່າວ, ຂໍຮຽກຮ້ອງມາຍັງ ປະຊາຊົນ, ພະນັກງານ, ທະຫານ, ຕຳຫຼວດ ແລະ ຊາວ ໜຸ່ມ-ໄວໜຸ່ມ ຜູ້ທີ່ນຳໃຊ້ສື່ສັງຄົມອອນລາຍທຸກທ່ານ ຈົ່ງເພີ່ມທະວີສະຕິລະວັງຕົວ ແລະ ປະຕິບັດດັ່ງນີ້:
ຢ່າເຊື່ອຂ່າວລືແບບງ່າຍໆ: ຂໍໃຫ້ມີວິຈາລະນະຍານຢ່າງໜັກແໜ້ນ, ໄຕ່ຕອງຂໍ້ມູນຢ່າງຮອບຄອບ ກ່ອນທີ່ຈະປັກໃຈເຊື່ອ. ຂໍ້ມູນທີ່ໂຈມຕີບຸກຄົນ ຫຼື ອົງການຈັດຕັ້ງ ດ້ວຍຖ້ອຍຄຳທີ່ຮຸນແຮງ ມັກຈະເປັນຂ່າວປອມ.
ກວດສອບແຫຼ່ງທີ່ມາຂອງຂ່າວ ແລະ ຄວນຮັບຂໍ້ມູນຂ່າວສານຈາກສື່ທາງການຂອງລັດ (ເຊັ່ນ: ໂທລະພາບແຫ່ງຊາດ, ວິທະຍຸແຫ່ງຊາດ, ໜັງສືພິມປະຊາຊົນ, ສຳນັກຂ່າວສານປະເທດລາວ ແລະ ເພຈທາງການຂອງກະຊວງຕ່າງໆ) ເທົ່ານັ້ນ.
“ຢຸດ-ຄິດ-ກ່ອນແຊ”: ການກົດ Like ຫຼື Share ຂ່າວປອມ ເທົ່າກັບວ່າທ່ານໄດ້ຕົກເປັນເຄື່ອງມືຂອງກຸ່ມຄົນບໍ່ຫວັງດີ ແລະ ເປັນການຊ່ວຍຂະຫຍາຍຄວາມແຕກແຍກໃນສັງຄົມ ໂດຍບໍ່ຮູ້ຕົວ.
ປະຕິເສດ ແລະ ຕອບໂຕ້: ຫາກພົບເຫັນຂ່າວປອມ ໃຫ້ຊ່ວຍກັນ ລາຍງານໄປຍັງຜູ້ໃຫ້ບໍລິການ ແພລັດຟອມນັ້ນໆ ແລະ ຕັກເຕືອນຄົນໃກ້ຊິດບໍ່ໃຫ້ຫຼົງເຊື່ອ.
ທັງນີ້, ກອງປະຊຸມໃຫຍ່ ຄັ້ງທີ XII ຂອງພັກ ແມ່ນເຫດການການເມືອງທີ່ມີຄວາມໝາຍຄວາມສຳຄັນຢ່າງຍິ່ງ ຕໍ່ຊາຕາກຳ ແລະ ອະນາຄົດຂອງປະເທດຊາດ. ດັ່ງນັ້ນ, ຄວາມສາມັກຄີເປັນປຶກແຜ່ນ, ຄວາມສະຫງົບ ແລະ ຄວາມເຂົ້າໃຈທີ່ຖືກຕ້ອງຂອງປະຊາຊົນ ຄືເກາະກຳບັງທີ່ດີທີ່ສຸດ ທີ່ຈະຕີຕ້ານທຸກກົນອຸບາຍຂອງກຸ່ມຄົນບໍ່ດີ.
ຂໍໃຫ້ທຸກຄົນຮ່ວມໃຈກັນ ເປັນຫູເປັນຕາ ແລະ ຮັບຂ່າວຢ່າງມີສະຕິ ເພື່ອຄວາມສະຫງົບສຸກຂອງບ້ານເມືອງເຮົາ.
ທີ່ມາ: ປະຊາຊົນ
