ເມື່ອມໍ່ໆມານີ້, ໜ່ວຍງານຊັບສິນທາງປັນຍາ, ມາດຕະຖານ ແລະ ການວັດແທກ ຫ້ອງການອຸດສາຫະກຳ ແລະ ການຄ້າເມືອງ ໂຂງ ແຂວງຈຳປາສັກ ໄດ້ ທຳລາຍສິນຄ້າໝົດອາຍຸສິນຄ້າຕ້ອງຫ້າມ, ສິນຄ້ານອກລະບົບ ແລະ ຢາປົວພະຍາດ ທີ່ກວດກາ ແລະ ຍຶດໄດ້ຈາກທ້ອງຕະຫຼາດ ແລະ ຮ້ານຄ້າຕ່າງໆພາຍໃນເມືອງ ເພາະສິນຄ້າດັງກ່າວເປັນອັນຕະລາຍຕໍ່ສຸຂະພາບ.
ທ່ານ ບົວສີ ລ້ວນໄຊຍະວົງ ຫົວໜ້າໜ່ວຍງານຊັບສິນທາງປັນຍາ, ມາດຕະຖານ ແລະ ການວັດແທກ ຫ້ອງການອຸດສາຫະກຳ ແລະ ການຄ້າເມືອງ ຍົກໃຫ້ເຫັນວ່າ: ສິນຄ້າທີ່ນຳມາທຳລາຍໃນຄັ້ງນີ້, ປະກອບມີຫຼາຍລາຍການ ເປັນຕົ້ນແມ່ນ: ສິນຄ້າອຸປະໂພກ-ບໍລິໂພກທີ່ໝົດອາຍຸການໃຊ້ງານ, ສິນຄ້າຕ້ອງຫ້າມ ແລະ ສິນຄ້າທີ່ນຳເຂົ້າໂດຍບໍ່ຖືກຕ້ອງຕາມລະບຽບກົດໝາຍ ລວມໄປເຖິງຢາປົວພະຍາດທີ່ບໍ່ໄດ້ມາດຕະຖານ ແລະ ບໍ່ມີໃບອະນຸຍາດຖືກຕ້ອງ ມີຈຳນວນ 102 ລາຍການ.
ທ່ານ ບົວສີ ກ່າວຕື່ມວ່າ: ການທຳລາຍສິນຄ້າດັ່ງກ່າວ, ແມ່ນປະຕິບັດຕາມລະບຽບກົດໝາຍ ເພື່ອແນໃສ່ການຄຸ້ມຄອງລາຄາສິນຄ້າ ແລະ ຄຸນນະພາບສິນຄ້າໃນທ້ອງຕະຫຼາດ ໃຫ້ມີຄວາມປອດໄພຕໍ່ສຸຂະພາບ ແລະ ຊີວິດຂອງຜູ້ບໍລິໂພກ. ທັງນີ້ ກໍເພື່ອເປັນການເຕືອນໃຫ້ຜູ້ປະກອບການ, ຮ້ານຄ້າ ໃຫ້ມີຄວາມຮັບຜິດຊອບ ແລະ ເອົາໃຈໃສ່ກວດກາສິນຄ້າຂອງຕົນເອງຢ່າງເປັນປະຈຳ, ບໍ່ໃຫ້ນຳສິນຄ້າທີ່ເສື່ອມຄຸນນະພາບມາຈຳໜ່າຍໃຫ້ແກ່ສັງຄົມ.
ແຫຼ່ງຂໍ້ມູນຂ່າວ-ພາບ: ພຸດທະສິນ ວົງວິໄລທອງ
