ການບິນລາວຮຽກຮ້ອງໃຫ້ພະນັກງານລາພັກແບບສະໝັກໃຈ

ການບິນລາວຮຽກຮ້ອງໃຫ້ພະນັກງານລາພັກແບບສະໝັກໃຈ

ລັດວິສາຫະກິດການບິນລາວຮຽກຮ້ອງໃຫ້ພະນັກງານລາພັກແບບບໍ່ເອົາເງິນເດືອນ​ ດ້ວຍຄວາມສະໝັກໃຈ ເພື່ອຫຼຸດຜ່ອນລາຍຈ່າຍພາຍໃນບໍລິສັດ​ ຫຼັງຈາກຈໍານວນຜູ້ໂດຍສານຫຼຸດລົງ.

ຜູ້ໂດຍສານລະຫວ່າງປະເທດຫຼຸດລົງກວ່າ 37% ​ໃນເດືອນຜ່ານມາມີພຽງແຕ່ 38.​000 ຄົນ ​ຫຼຸດລົງຈາກ 61.​000 ຄົນໃນໄລຍະດຽວກັນຂອງປີຜ່ານມາ​ ແລະ​ ຜູ້ໂດຍສານພາຍໃນຫຼຸດລົງ 21% ເຫຼືອພຽງ 31.​600​ ຄົນ​ ຈາກ ​41.000 ຄົນໃນປີຜ່ານມາສາຍເຫດການຫຼຸດລົງຍ້ອນການແຜ່ລະບາດຂອງພະຍາດ ໂຄວິດ-19 ຢູ່ປະເທດຕ່າງໆ.​

ທ່ານ​ ໜູແດງ ຈັນທະຜາສຸກ ຫົວໜ້າພະແນກການຄ້າ ການຕະຫຼາດ ຂອງລັດວິສາຫະກິດການບິນລາວ ກ່າວວ່າ:​ ການຮຽກຮ້ອງດັ່ງກ່າວແມ່ນຂື້ນກັບຄວາມສະໝັກໃຈຂອງພະນັກງານເອງວ່າຈະພັກດົນປານໃດ ພະນັກງານທຸກຄົນຕ່າງກໍ່ໃຫ້ຄວາມຮ່ວມມືເພາະເຂົາເຈົ້າເຂົ້າໃຈສະພາບການທີ່ເກີດຂຶ້ນໃນປະຈຸບັນ.

ເຖິງຢ່າງໃດກໍ່ດີ,​ ທ່ານ ​ໜູແດງ ໄດ້ຢືນຢັນວ່າ ນະໂຍບາຍດັ່ງກ່າວຈະບໍ່ກະທົບຕໍ່ວຽກງານ ແລະ​ ການບໍລິການຂອງສາຍການບິນ ເພາະ ພະນັກງານແຕ່ລະຄົນ​ແມ່ນຕ້ອງສະສາງໜ້າວຽກຂອງຕົນເອງໃຫ້ແລ້ວກ່ອນ ແລະ​ ພະນັກງານແມ່ນຈະພັກບໍ່ພ້ອມກັນ.

ການບິນລາວມີຖ້ຽວບິນໄປ 7 ປະເທດ​ ລວມມີ: ສິງກະໂປ,​ ມາເລເຊຍ,​ ຈີນ,​ ກຳປູເຈຍ,​ ຫວຽດນາມ,​ ໄທ,​ ແລະ​ ສ.​ເກົາຫຼີ.

ປະຈຸບັນການບິນລາວໂຈະທຸກໆຖ້ຽວບິນທີ່ ບິນໄປ​ ສ.ເກົາຫຼີ​ ໄວ້ຊົ່ວຄາວ ແລະ​ ໂຈະຖ້ຽວບິນໄປບາງເສັ້ນທາງທີ່ບິນໄປ ສປ ຈີນ​ ຈາກທັງໝົດ 9​ ເສັ້ນທາງ​ ເຫຼືອພຽງ​ 3 ເສັ້ນທາງ.​

ຂ່າວ: ສຸກສະໄໝ

ພາບ ປະກອບ

Related Articles

Leave a Reply