ແຂວງຊຽງຂວາງ ເປັນແຂວງດຽວຢູ່ພາກເໜືອຂອງປະເທດລາວ ທີ່ຍັງບໍ່ມີກໍລະນີສະສົມຄົນເຈັບຈາກພະຍາດໄຂ້ຍຸງລາຍເທື່ອ ນັບແຕ່ທ້າຍປີ 2019 ຫາ ວັນທີ 7 ມີຖຸນາ 2020, ໃນຄະນະທີ່ປະຈຸບັນການລະບາດຂອງພະຍາດໄຂ້ຍຸງລາຍ ຍັງສືບຕໍ່ແຜ່ຢ່າງກວ້າງຂວາງໃນທົ່ວປະເທດ.
ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ໃນວັນທີ 7 ມີຖຸນາ 2020 ວ່າ: ທົ່ວປະເທດ ມີຜູ້ຕິດເຊື້ອໄຂ້ຍຸງເພີ່ມຂຶ້ນທັງໝົດ 1,641 ກໍລະນີແລ້ວ, ແຕ່ກໍລະນີເສຍຊີວິດ ຍັງບໍ່ເພີ່ມ ຍັງຢູ່ 4 ຄົນ ຢູ່ນະຄອນຫຼວງວຽງຈັນ 2 ຄົນ, ໄຊຍະບູລີ 1 ຄົນ ແລະ ແຂວງຄຳມ່ວນ 1 ຄົນ. ໃນນັ້ນ ນະຄອນຫຼວງວຽງຈັນ ເປັນອັນດັບໜຶ່ງທີ່ມີຜູ້ຕິດເຊື້ອພະຍາດໄຂ້ຍຸງລາຍ 381 ກໍລະນີ, ແຂວງ ວຽງຈັນ 235 ກໍລະນີ, ອັດຕະປື 213 ກໍລະນີ ແລະ ແຂວງອື່ນໆ, ເຊິ່ງແຂວງທີ່ຍັງບໍ່ມີການລາຍງານຄົນເປັນໄຂ້ຍຸງລາຍ ແມ່ນແຂວງຊຽງຂວາງ.
ປະຈຸບັນພະຍາດໄຂ້ຍຸງລາຍໄດ້ເກີດຢູ່ຫຼາຍແຂວງ ສົ່ງຜົນໃຫ້ມີຜູ້ເສຍຊີວິດ ແລະ ຈຳນວນຄົນເຈັບເພີ່ມຂຶ້ນ ເຊິ່ງທາງດຽວທີ່ຈະປ້ອງກັນພະຍາດນີ້, ບໍ່ໃຫ້ມີການແຜ່ລະບາດແຜ່ລາມ ເປັນວົງກວ້າງ ແລະ ບໍ່ໃຫ້ມີກໍລະນີໃໝ່ນັ້ນ ທຸກຄົນຄວນ ພ້ອມກັນປ້ອງກັນ ບໍ່ໃຫ້ຍຸງລາຍກັດ ໄປຄຽງຄູ່ກັບການປະຕິບັດຫລັກການ 5 ປ ທີ່ກະຊວງສາທາລະນະສຸກ ວາງອອກເປັນປະຈຳ ໂດຍສະເພາະທຳລາຍ ແຫລ່ງເພາະພັນໜອນນ້ຳຍຸງລາຍ ບໍ່ມີໜອນນ້ຳ ກໍຈະບໍ່ມີຍຸງລາຍ.
ຂ່າວ: ວຽງຈັນທາຍ
