ໃນເດືອນພຶດສະພາຜ່ານມາ, ມີຜູ້ເສຍຊີວິດແລ້ວ 46 ຄົນຈາກອຸບັດຕິເຫດບົນທ້ອງຖະໜົນທີ່ ເກີດຂຶ້ນທັງໝົດ 368 ກໍລະນີ ໃນທົ່ວປະເທດ, ທຽບໃສ່ເດືອນເມສາ ຫຼຸດລົງ 67 ກໍລະນີ ແລະ ຈຳນວນຜູ້ເສຍຊີວິດກໍຫຼຸດລົງ 25 ຄົນ.
ອີງຕາມການລາຍງານສະພາບການເກີດອຸບັດຕິເຫດທົ່ວປະເທດປະຈຳເດືອນພຶດສະພາ 2020 ຂອງກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບໃຫ້ຊາບວ່າ: ທົ່ວປະເທດມີອຸບັດຕິເຫດເກີດຂຶ້ນທັງໝົດ 368 ກໍລະນີ, ມີຄົນເສຍຊີວິດ 46 ຄົນ, ຍິງ11ຄົນ ເຊິ່ງອຸບັດຕິເຫດໃນແຕ່ລະຄັ້ງ ເຮັດໃຫ້ມີພາຫະນະເປ່ເພທັງໝົດ 635 ຄັນ ໃນນີ້ ມີຄົນໄດ້ຮັບບາດເຈັບທັງໝົດ 549 ຄົນ, ຍິງ 99ຄົນ.
ປັດຈຸບັນ, ການເກີດອຸບັດຕິເຫດຢູ່ຕາມສາຍທາງຕ່າງໆໃນທົ່ວປະເທດ ສ່ວນໃຫຍ່ແມ່ນເກີດ ຍ້ອນນັກຂັບຂີ່ບໍ່ເຄົາລົບກົດລະບຽບຈະລາຈອນ ໂດຍສະເພາະ ເມົາແລ້ວຂັບ, ຂັບຂີ່ໄວເກີນກຳນົດ, ບໍ່ໃຫ້ກຽດກັບຜູ້ໃຊ້ເສັ້ນທາງຮ່ວມກັນ ແຊງຊ້າຍ-ຂວາບໍ່ຮັບປະກັນ ແລະ ອື່ນໆ.
ເພື່ອຫຼຸດຜ່ອນການເກີດອຸບັດຕິເຫດ, ທາງເຈົ້າໜ້າທີ່ຕຳຫຼວດຈະລາຈອນຈຶ່ງຮຽກຮ້ອງມາຍັງຜູ້ທີ່ໃຊ້ລົດໃຊ້ຖະໜົນຕ້ອງຮ່ວມໃຈກັນປະຕິບັດກົດລະບຽບການສັນຈອນທາງບົກໃຫ້ເຄັ່ງຄັດ, ມີສະຕິໃນການຂັບຂີ່ແຕ່ລະຄັ້ງ ເຊັ່ນວ່າ, ເມົາແລ້ວຫ້າມຂັບ, ຂັບຂີ່ລົດຈັກຕ້ອງໃສ່ໝວກກັນກະທົບທຸກຄັ້ງ ແລະ ກວດກາສະພາບລົດໃຫ້ມີຄວາມພ້ອມ ແລ້ວຈຶ່ງອອກເດີນທາງ, ບັນຫາການເກີດອຸບັດເຫດມັນຈຶ່ງຈະຫຼຸດລົງ.
ຂ່າວ: ວຽງຈັນທາຍ
