ໂຮງໝໍແມ່ ແລະ ເດັກເກີດໃໝ່ ແລະ ບໍລິສັດ ລິດປັນຍາ ອອກແບບ – ກໍ່ສ້າງ ຈຳກັດຜູ້ດຽວໄດ້ລົງທຶນຮ່ວມກັນເພື່ອສ້າງຕຶກນອນພິເສດ ຂອງໂຮງໝໍແມ່ ແລະ ເດັກເກີດໃໝ່ ຢູ່ບ້ານ ໜອງພະຍາ ເມືອງໄຊທານີ ນະຄອນຫຼວງວຽງຈັນ ຊຶ່ງໂຮງໝໍແມ່ ແລະ ເດັກເກີດໃໝ່ຈະສົມທົບທຶນ 30% ແລະ ບໍລິສັດ ສົມທົບທຶນ 70% ຊຶ່ງຈະໃຊ້ເວລາໃນການກໍ່ສ້າງ 3 ປີ.
ຕຶກນອນພິເສດດັ່ງກ່າວມີເນື້ອທີ່ດິນປຸກສ້າງ 3.700 ຕາແມັດ, ເປັນອາຄານ 3 ຊັ້ນ, ຍາວ 58,8 ແມັດ ແລະ ກວ້າງ 27,4 ແມັດ, ມີ 52 ຫ້ອງນອນ ຫ້ອງນໍ້າ ແລະ ສິ່ງອຳນວຍຄວາມສະດວກຕ່າງໆເຊັ່ນ: ຕູ້ເຢັນ, ແອ, ຕຽງນອນ, ຕູ້ໃສ່ເຄື່ອງບໍລິໂພກ ແລະ ໃສ່ເສື້ອຜ້າ ແລະ ອື່ນໆ.
ພິທີເຊັນສັນຍາການກໍ່ສ້າງຕຶກນອນດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ກະຊວງສາທາລະນະສຸກ ເຊັນໂດຍທ່ານ ທ່ານ ສີວັນໄຊ ຈັນທະວົງສັກ ຜູ້ອຳນວຍການໂຮງໝໍແມ່ ແລະ ເດັກເກີດໃໝ່ ແລະ ທ່ານ ນາງ ສຸນັດຕາ ລິດປັນຍາ ຜູ້ອຳນວຍການ ບໍລິສັດ ລິດປັນຍາ ອອກແບບ – ກໍ່ສ້າງ ຈໍາກັດຜູ້ດຽວ.
