Vientiane Times Lao
ຈຳປາສັກຢຸດຕິການເກັບເງິນຄ່າເຂົ້າຊົມແຫຼ່ງ ທ່ອງທ່ຽວອຸທິຍານນ້ຳຕົກສອງແຫ່ງ

ຈຳປາສັກຢຸດຕິການເກັບເງິນຄ່າເຂົ້າຊົມແຫຼ່ງ ທ່ອງທ່ຽວອຸທິຍານນ້ຳຕົກສອງແຫ່ງ

ນັບວ່າເປັນຂ່າວດີສຳລັບນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ມີແຜນເດີນທາງມາທ່ອງທ່ຽວພາກໃຕ້ຂອງ ລາວ ໂດຍສະເພາະສວນອຸທິຍານນ້ຳຕົກຕາດ ຄອນພະເພັງ ແລະ ນ້ຳຕົກຕາດສົມພະມິດ ເມືອງໂຂງ ແຂວງຈຳປາສັກ ນັບແຕ່ວັນທີ 23 ມັງກອນ 2020 ເປັນຕົ້ນມາໄດ້ຢຸດຕິການ ເກັບເງິນຄ່າບໍລິການເຂົ້າຊົມແຫຼ່ງທ່ອງທ່ຽວທັງ 2 ແຫ່ງ.

ດັ່ງນັ້ນໃນມື້ວັນທີ 24 ມັງກອນ 2020 ຄະນະອານຸກຳມະການເຂົ້າຄຸ້ມຄອງໂຄງການພັດທະນາແຫຼ່ງທ່ອງທ່ຽວທັງ 2 ແຫ່ງນຳໂດຍທ່ານ ບຸນເຮັງ ກົມປະເສີດ ຮອງເຈົ້າເມືອງໂຂງ ພ້ອມຄະນະຊຶ່ງປະກອບມີພະແນກການເງິນ ແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ມີພະນັກງານວິຊາການຫ້ອງການທີ່ກ່ຽວຂ້ອງ ພາຍໃນເມືອງ ໄດ້ລົງເຄື່ອນໄຫວເຮັດວຽວຕົວຈິງໂດຍໄດ້ນຳເອົາແຜ່ນປ້າຍທີ່ມີເນື້ອໃນຂຽນເປັນພາສາລາວ ແລະ ພາສາອັງກິດ ຢຸດຕິການເກັບເງິນຄ່າເຂົ້າຊົມ ໄປຕິດໄວ້ໃນສະຖານທີ່ທ່ອງທ່ຽວເພື່ອເຮັດໃຫ້ ນັກທ່ຽວທ່ອງສາມາດຮັບຮູ້ຂໍ້ມູນໄດ້ຫຼາຍຂຶ້ນ.

ໂອກາດນີ້ທ່ານ ບຸນເຮັງ ກົມປະເສີດ ໄດ້ໃຫ້ສຳພາດຕໍ່ຜູ້ສື່ຂ່າວໂດຍສັງເຂບວ່າ: ທັ້ງນີ້ກໍ່ເພື່ອປະຕິບັດຕາມແຈ້ງການເລກທີ 058/ຫວຂ.ຈສ ລົງວັນທີ 23 ມັງກອນ 2020 ຂອງຫ້ອງວ່າການປົກຄອງແຂວງ ຈຳປາສັກ ໃຫ້ຢຸດຕິການເກັບເງິນຄ່າເຂົ້າຊົມແຫຼ່ງທ່ອງທ່ຽວທັງ 2 ແຫ່ງ ແລະ ຢຸດຕິບໍລິການຮ້ານອາຫານຢູ່ທີ່ສາລາຊົມວີວສວນອຸທິຍານນ້ຳຕົກຕາດຄອນພະເພັງ ເລີ່ມແຕ່ວັນທີ 23 ມັງກອນ 2020 ໄປຈົນກວ່າຈະມີທິດຊີ້ນຳຈາກຂັ້ນເທິງ. ດັ່ງນັ້ນ ການລົງມາເຮັດວຽກໃນວັນທີ 24 ມັງກອນ ນີ້ພວກຂ້າພະເຈົ້າພ້ອມທີມງານແມ່ນຈະໄດ້ມີ ການຂຶ້ນບັນຊີຊັບສິນ ຢູ່ຮ້ານອາຫານສາລາຊົມວີວໃນແຫຼ່ງທອງທ່ຽວ ທັງ 2 ແຫ່ງໃຫ້ສຳເລັດ.

ນອກຈາກການຢຸດຕິເກັບເງິນຄ່າເຂົ້າຊົມແຫຼ່ງ ທ່ອງທ່ຽວທັງ 2 ແຫ່ງນີ້ແລ້ວ ແຕ່ຄ່າບໍລິການອື່ນໆເປັນຕົ້ນ: ບໍລິການຫ້ອງການ, ຂີ່ລົດໄຟຟ້າເພື່ອຊົມພາຍໃນອຸທິຍານ, ຄ່າຝາກລົດ ແມ່ນຍັງຈະດຳເນີນເກັບເງິນເປັນປົກກະຕິຕາມທີ່ເຄີຍໄດ້ປະຕິບັດໃນປີຜ່ານມາ.

ຂ່າວ: ພຸດທະສິນ ວົງວິໄລທອງ

ພາບ: ນັກຂ່າວສະຖານີວິທະຍຸ-ໂທລະພາບເມືອງໂຂງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ