Vientiane Times Lao
ນາຍົກເຂົ້າຮ່ວມກອງປະຊຸມສຸດຍອດຜູ້ບໍລິຫານພາກທຸລະກິດແລະສະຫຼອງອາຊຽນ-ສ.ເກົາ​ຫລີ

ນາຍົກເຂົ້າຮ່ວມກອງປະຊຸມສຸດຍອດຜູ້ບໍລິຫານພາກທຸລະກິດແລະສະຫຼອງອາຊຽນ-ສ.ເກົາ​ຫລີ

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມພິທີເປີດກອງປະຊຸມສຸດຍອດຜູ້ບໍລິຫານພາກທຸລະກິດ ອາຊຽນ-ສ.ເກົາຫລີ ໃນຕອນເຊົ້້າຂອງມື້ນີ້ ວັນທີ 25 ພະຈິກ 2019 ພາຍໃຕ້ຫົວຂໍ້ ການຮ່ວມມື ແລະ ໜ້າວຽກໃນການບັນລຸຄວາມສົມບູນພູນສຸກຮ່ວມກັນ.

ກອງປະຊຸມດັ່ງກ່າວນີ້, ບັນດານັກທຸລະກິດຂອງ ອາຊຽນ-ສ.ເກົາຫລີ ໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນ ແນ່ໃສ່ຜັນຂະຫຍາຍສັນຍາເຂດການຄ້າເສລີ ອາຊຽນ-ສ.ເກົາຫລີ ເພື່ອປະກອບສ່ວນເຂົ້າໃນການເພີ່ມທະວີການຄ້າ, ການລົງທຶນ ແລະ ທ່ອງທ່ຽວ ອາຊຽນ-ສ. ເກົາຫລີ ໃຫ້ນັບມື້ນັບເພີ່ມຂຶ້ນໃນທ່າມກາງທີ່ສະພາບເສດຖະກິດໂລກທົດຖອຍ ອັນເນື່ອງມາຈາກລັດທິປົກປ້ອງພາຍໃນ ແລະ ສົງຄາມການຄ້າໃນປະຈຸບັນ.

ຫຼັງຈາກນັ້ນ, ທ່ານ ນາຍົກລັດຖະມົນຕີ ທອງລຸນ ສີສຸລິດໄດ້ສືບຕໍ່ເຂົ້າຮ່ວມກອງປະຊຸສຸດຍອນະວັດຕະກຳທາງດ້ານວັດທະນະທຳ ອາຊຽນ-ສ.ເກົາຫລີ ທີ່ແນໃສ່ປຶກສາຫາລື ກ່ຽວກັບ ການສ້າງຄວາມສົມບູນພູນສຸກຮ່ວມກັນ ໃນຂະແໜງວັດທະນະທໍາ-ສັງຄົມ ລະຫວ່າງ ອາຊຽນ, ສ. ເກົາຫລີ ເປັນຕົ້ນ: ຂະແໜງສິລະປະ, ບັນເທີງ, ຮູບເງົາ ແລະ ອື່ນໆ.

ໃນມື້ວານທີ່ຜ່ານມາ ທ່ານ ທອງລຸນ ຍັງໄດ້​ເຂົ້າ​ຮ່ວມ​ພິ​ທີວາງ​ສີ​ລາ​ລືກໂຄງການ​ເມືອງ​ອັດ​ສະ​ລິ​ຍະປູ​ຊານ ທີ່ ​ປູ​ຊານ ​ສ. ເກົາ​ຫລີ ເນື່ອງໃນໂອກາດເຂົ້າຮ່ວມກອງ​ປະຊຸມ​ສຸດ​ຍອດ ​ອາຊຽນ-ສ.ເກົາ​ຫລີ ເພື່ອ​ສະ​ເຫຼີມ​ສະ​ເຫຼີມ​ສາຍ​ພົວ​ພັນ ອາ​ຊຽນ-ສ.ເກົາ​ຫລີ ຄົບ​ຮອບ 30 ປີ.

ໂຄງການດັ່ງກ່າວເປັນໜຶ່ງໃນໂຄງການທົດລອງລະດັບຊາດຕົວເມືອງອັດສະລິຍະຂອງ ສ. ເກົາຫລີ ແນ່ໃສ່ສ້າງຕົວເມືອງທັນສະໄໝ ແລະ ເປັນ​ມິດ​ກັບ​ສິ່ງ​ແວດ​ລ້ອມ. ເຂົ້າຮ່ວມໃນພິທີວາງສີລາລືກຄັ້ງນີ້ຍັງມີ ປະທານາທິບໍດີ ສ. ເກົາຫລີ ແລະ ນາຍົກລັດຖະມົນຕີ ແຫ່ງ ສສ. ຫວຽດນາມ ແລະ ໄທ.

ຂ່າວ: ວຽງຈັນທາຍ

ພາບ: ສຳນັກງານນາຍົກລັດຖະມົນຕີ

Related Articles

Leave a Reply