Vientiane Times Lao
ມີ 3.973.017 ຄົນທີ່ອອກໄປໃຊ້ສິດປ່ອນບັດເລືອກຕັ້ງ ສສຊ ແລະ ສສຂ ໃນຂອບເຂດທົ່ວປະເທດ

ມີ 3.973.017 ຄົນທີ່ອອກໄປໃຊ້ສິດປ່ອນບັດເລືອກຕັ້ງ ສສຊ ແລະ ສສຂ ໃນຂອບເຂດທົ່ວປະເທດ

ທ່ານ ປອ ສົມພູ ດວງສະຫວັນ ​ຄະນະປະຈໍາສະພາແຫ່ງຊາດ, ກໍາມະການອະນຸກໍາມະການເລຂານຸການ, ໂຄສົກ ຂອງຄະນະກໍາມະການເລືອກຕັ້ງລະດັບຊາດ ໄດ້ຖະແຫຼງຂ່າວຕໍ່ສື່ມວນຊົນໃນວັນທີ 5 ມີນາ 2021 ນີ້ກຽ່ວກັບຜົນສໍາເລັດຂອງການເລືອກຕັ້ງສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາຂັ້ນແຂວງ (ສສຂ) ທີ່ໄດ້ຈັດຂຶ້ນເມື່ອວັນທີ 21 ກຸມພາ 2021 ທີ່ຜ່ານມາໃຫ້ຮູ້ວ່າ: ສປປ ລາວມີພົນລະເມືອງທັງໝົດ 7.155.315 ຄົນ (ຍິງ 3.557.270 ຄົນ), ສະເພາະການເລືອກຕັ້ງຄັ້ງນີ້ໂດຍມີຜູ້ມີສິດປ່ອນບັດເລືອກຕັ້ງໃນທົ່ວປະເທດທັງໝົດ 4.053.151 ຄົນ ແລະໄດ້ມີຜູ້ໄປໃຊ້ສິດປ່ອນບັດເລືອກຕັ້ງຕົວຈິງໃນມື້ເລືອກຕັ້ງ ຈຳນວນ 3.973.017 ຄົນ, ກວມເອົາ 98,02% ຂອງຈໍານວນຜູ້ມີສິດປ່ອນບັດເລືອກຕັ້ງທັງໝົດ. ມີໜ່ວຍປ່ອນບັດເລືອກຕັ້ງທັງໝົດ 7.217 ໜ່ວຍ, ໃນນີ້ ມີໜ່ວຍປ່ອນບັດເລືອກຕັ້ງຢູ່ຕ່າງປະເທດທັງໝົດ 40 ໜ່ວຍ, ຊຶ່ງມີຜູ້ມີສິດປ່ອນບັດເລືອກຕັ້ງ 13.404 ຄົນ (ຍິງ 5.493 ຄົນ) ໃນນີ້ມີຜູ້ໄປໃຊ້ສິດຕົວຈິງທັງ ໝົດ 13.283 ຄົນ (ຍິງ 5.423 ຄົນ), ເທົ່າກັບ 99%.

ທ່ານ ປອ ສົມພູໃຫ້ຮູ້ຕື່ມວ່າ: ຈຳນວນຜູ້ລົງສະໝັກຮັບເລືອກຕັ້ງ ສສຊ ທັງໝົດ 224 ທ່ານ (ຍິງ 49 ທ່ານ) ເລືອກເອົາ 164 ທ່ານ (ຍິງ 35 ທ່ານ) ແລະ ຈຳນວນຜູ້ລົງສະໝັກ ສສຂ ມີທັງໝົດ  788 ທ່ານ (ຍິງ 227 ທ່ານ) ເລືອກເອົາ 492 ທ່ານ (ຍິງ 150 ທ່ານ). ໃນສະເພາະໜ້ານີ້, ຄະນະກຳມະການເລືອກຕັ້ງແຕ່ລະຂັ້ນຈະໄດ້ສືບຕໍ່ຈັດຕັ້ງປະຕິບັດແຜນການວຽກງານໃນບາດກ້າວທີ 4 ເປັນຕົ້ນ: ສຸມໃສ່ສະຫຼຸບຕີລາຄາວຽກງານຮອບດ້ານໃນການກະກຽມ, ການດຳເນີນການເລືອກຕັ້ງ ແລະ ການກະກຽມເນື້ອໃນທີ່ສຳຄັນຕ່າງໆກ່ຽວກັບການເລືອກຕັ້ງຄັ້ງນີ້ ຕໍ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ IX ຊຶ່ງຈະເປີດຂຶ້ນໃນຕໍ່ໜ້ານີ້.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ